وەزارەتی دەرەوەی عێراق لە بارەی هێرشە ئاسمانیەکەی دوێنێ فرۆکە جەنگیە بێفڕۆکەوانەکەی دەوڵەتی تورک بۆ سەر کەمپی پەنابەرانی مەخموری ئیدانە کرد و لەم بارەیەوە بەیاننامەیەکی بڵاو کردەوە.

لە بەیاننامەکەی وەزارەتی دەرەوەی حکومەتی عێراقدا هاتووە:

"فەرماندەی هێزە ئاسمانیەکانی عێراق، بەدواداچوونی کرد بۆ بەزاندنی سنووری عێراق لە لایەن فڕۆکەیەکی بێفڕۆکەوانی سوپای تورکیا. هاوکات کەمپی پەنابەران لە نزیک شاری مەخمور بوردومان کرا و لە ئەنجامدا ٣ ژنی پەنابەری دانیشتووی کەمپەکە بوون بە قوربانی. (١٥ی نیسانی ٢٠٢٠).

وەزارەتی دەرەوەی عێراق ئەو هێرش و دەستدرێژیەی دەوڵەتی تورکیا بە توندی ئیدانە دەکات کە سەروەری خاکی عێراقی بنپێ کردووە، کە ئەمەش بە پێچەوانەی پەیوەندی دراوسێیەتیە و لە دژی ماف و یاسا نێودەوڵەتیەکانە. بۆیە وەزارەتی دەرەوەی عێراق داوای وەستاندنی ئەو هێرشانە دەکات. هاوکات داوا لە دەوڵەتی تورکیا دەکەین رێز لە سەروەری خاکی عێراق بگرێت و لە پاراستنی سنوورەکاندا هاوکار بێت. ئەم هێرشە بەردەوامانە هیچ کات ئاسایشی تورکیا مسوگەر ناکەن و نابنە هۆکاری بەدیهێنانی ئارامی لە ناوچەکە بە گشتی."

ز.ش