دەوڵەتی داگیرکەری تورک لە نزیک سەیدسادقی سەر بە پارێزگای سلێمانی ئۆتۆمبیلێکی کردە ئامانج، بەهۆیەوە دوو ڕۆژنامەنووسی ژنی کۆمپانیای چەتر (گوڵستان تارا و هێرۆ بەهادین) شەهیدبوون، کۆردیناسیۆنی ژنانی بەڕێوەبەری خۆسەری کانتۆنی فرات و ڕۆژنامەوانانی ژن ڕاگەیاندراوێکی خویندەوە و هێرشەکەی شەرمەزار کرد و سەرەخۆشی لە بنەماڵەی هەردوو شەهید کرد و هیوای چارەسەری بۆ برینداران خواست.

لە ڕاگەیاندراوەکەدا ئاماژە بە هێرشەکانی دەوڵەتی تورک کرا و بە کارێکی دڕندانە دانرا و هاتووە: "ماوەیەکە دەوڵەتی تورک بە هاوکاری پەدەکە هێرشێکی دڕندانەی داگیرکاری بۆسەر باشووری کوردستان دەستپێکردووە، لەو چوارچێوەیەشدا ڕۆژانە هاوڵاتییان دەکات بە ئامانج. ئەوانەی ئەم ڕووداوانە بۆ ڕای گشتی و جیهان ئاشکرادەکەن، چاپەمەنی ئازاد و ڕۆژنامەوانان. بۆیە ئامانجی هێرشەکان لەسەر ڕۆژنامەوانان بۆ بێدەنگکردنی ڕاستی و ڕاوەستاندنی پێنوسی ڕۆژنامەوانانە. بۆیە ڕۆژنامەوانی راگەیاندنی ئازاد لە هەموو لایەکی جهیانەوە مەترسی بە ژیانی خۆیانەوە دەکەن و دەبنە ئامانجی هێرشەکان."

لە بەشێکی دیکەی ڕاگەیاندراوەکەدا هاتووە: "وەک کۆردیناسیۆنی ژن لەبەرامبەر ڕووداوەکاندا بێ هەڵوێست نامێنینەوە و تێکۆشانی گوڵستان تارا و هێرۆ بەهادین و هەموو شەهیدان بکەین بە بنەمای خەبات و تێکۆشانی ژیانی ئازاد. بانگەوازیمان بۆ هەموو ژان ئەوەیە تێکۆشانمان بەهێزتربکەین. داوا لە فیدراسیۆنەکان، یەکێتی ئەوروپا و رێکخراوەکانی مافەکانی مرۆڤ دەکەین لەبەرامبەر هێرشەکانی دەوڵەتی تورکدا هەڵوێست وەرگرن."