ناوەندی هەواڵ

هێزەکانی رزگاری عەفرین سەبارەت بە شەهیدبوونی دوو شەرڤانیان رایانگەیاندووە: "سەرەخۆشی لە بنەماڵەی بەڕێز و بەنرخی کەمال پیر و شەهید رەنج و تێکۆشان خالید محەمەد و سەرجەم گەلە وڵاتپارێزەکەمان دەکەین".

لە راگەیەندراوەکەدا ئاماژە بەوەدراوە، کەمال پیر لە ناوچەی راجۆ لە بنەماڵەیەکی وڵاتپارێزدا لەدایکبوو، لەسەرەتای شۆڕشی رۆژئاوا و لەو کاتەی هێشتا تەمەنی گەنج بووە لە ناو کاروباری شۆڕشدا گەورە دەبێت و دواتر بۆ بەرپەرچدانەوەی گروپە چەتەکانی وەک نوسرە و داعش و گروپەکانی دیکەی سەر بە دەوڵەتی تورک کە پەلاماری گەل دەدەن، روودەکاتە سەنگەرەکانی شەڕ. لە رووی سەربازی و بیردۆزییەوە خۆی قووڵدەکاتەوە و دەبێتە شەڕڤانێکی نمونەیی.

ئەوەش خراوەتەڕوو، کە دوای داگیرکردنی عەفرین لە ساڵی ٢٠١٨ روودەکاتە بەرەکانی پێشی پێشەوەی شەڕ لە دژی دەوڵەتی تورکی داگیرکەر و گروپە چەتەکانی و تا کۆتا ساتی ژیانی بە ئاوات و ئامانجی گەورەوە بەشداری لە رێپێوانی ئازادیدا کرد. لە ریزەکانی پێشەوە جێیگرت و بە گیانبازی ئەرکەکانی راپەڕاند.

سەبارەت بە شەهید خالید محەمەدیش راگەیەندرا، کە لە بنەماڵەیەکی وڵاتپارێز بە کولتوری کوردایەتیەوە گەورە بووە و لەسەر ئەو بنەمایە رەنجێکی زۆری لە پێناو گەلەکەی و گەڕانەوەی گەلەکەی بۆ سەر خاکەکەی کێشاوە. رۆژی ٧ی ئەیلول لە ناوچەی شەرای سەر بە عيفرین لە ئەنجامی هێرشێکی دڕندانەی دوژمندا شەهید بووە و بووەتە شەهیدێکی رەنج و تێکۆشان.

ناسنامەی شەهیدان بەم جۆرەیە:

ناسناو: کەمال پیر

ناو و پاشناو: لوقمان حەنان

ناوی دایک: ئەمینە

ناوی باوک: رەشید

کات و شوێنی شەهیدبوون: ٧ی ئەیلولی ٢٠٢٤/ هەرێمی عەفرین

ناو و پاشناو: خالید محەمەد محەمەد

ناوی دایک: خالیە

ناوی باوک: محەمەد

کات و شوێنی شەهیدبوون: ٧ی ئەیلولی ٢٠٢٤/ هەرێمی عەفرین