ساڵح ئێزدین، ئەندامو کەنەکەی و  ئەندام مەکتەب سیاسی پادێ جە ۋەرا ۋەرو قەرارەکەو دادگاو فیدراڵی عێراقینە ناڕەزایی ۋێش بەربڕی و واتش: "دماو وڕای ڕژێمو سەدامی، پارتەکەما جە عێراقەنە دەسش بە هەرمانەی سیاسی کەرڎەن. ئا وەختە نامێش پادێ نەبۍ، بەڵام پېسە جمیەرێوە سەرو ئاستو عێراقی هەرمانە کەرۍ و ڕسمی بۍ. دماو فەرمانەو ساڵەو ٢٠١٤ی، ئیتر جمیەرێوە سیاسی پېسە جوابێوە پەی گلېرگەکەیما جوابدەر نەبۍ، پۊکەی ۋێش فاڕا و بەپاو یاسا و دەستوورو عێراقی بی بە پارت و دەسش بە هەرمانۍ کەرڎ.

هەرپاسە ساڵح ئێزدین ئەرەیاۋناش، پارتەکەشا حەجگیز پێچەوانەو دەستوورو عێراقی هەڵسوکۆتش نەکەرڎەن و واتش: "چا ساڵانەی کە پادێ پېسە پارتۍ هەرمانەش کەرڎێنە، ٣ کەڕەتۍ بە چەمڎاری پارتە عێراقییەکا کۆنگرەش بەستەن و بە شێوێوە یاسایی گلېرۆبیەی یاساییش ڕاوەبەر کەرڎەن و ئەندامەکێش هۊرچنیێنۍ. هەرپاسە ٣جارۍ جە هۊرچنیەکا عێراقینە به شداریش کەرڎەن، ٢جارۍ پەی پەرلەمانی و جارێوەیچ پەی ئەنجومەنو پارێزگاکا."

جە درێژەو قسەکاشەنە ساڵح ئیزدی واتش: "ئێمە پېسە پارتێوە سیاسی سەر بە هیچ لایەنێوە تەری نەبێنمۍ، ڕەنگە ۋەرو ئانەی ماچا ئێمە سەر بە پەکەکەی بیمۍ یان پەشتیوانیشا ۋنەمکەرمۍ، پارتەکەماشا وستەنەرە. بەڵام ئینە تەنیا بەهانێنە، وستەیرەو پادێ جە ئاکامو کۆبیەیۆ ئەردۆغانی چنی دەسەڵاتدارا عێراقی ڕووەشدان. عێراقیچ داواکارییەکەش قبوڵ کەرڎ و ئەردۆغانیچ بە سەرکۆتەی تەماشەش کەرڎ."

فرەو کەسا بەنامۍ ئێزدییەکاوە لوێنۍ پەرلەمانو عێراقی، بەڵام هیچ کامشا هیچ هەرمانێشا پەی گلێرگەو ئێزیدی نەکەرڎەن. بەتایبەت ئانۍ کە بە نامۍ پەدەکەیۆ لوێنۍ، ئێمە پېسە پێکئاماو ئێزیدی هەستما پا پەنەوازیە کەرڎەن کە مشۆم پارتوو ۋێما بۆ هەتا پەرلەمانو بەغڎاینە هەرمانە پەی گەلوو ئێزیدی بکەرۆ. بەڵام بەردەوام جە لایەنو بڕۍ پارتاوە پەی ئێمە ۋەربەس وەش مکریۆ. یۆ چا پلانا ڕێککۊتەی ٩و تشرینو یووەمی بۍ و گەرەکشا بۍ جە ڕوو سیاسی، کۆمەڵایەتی و سەروازییۆ گلېرگەو ئێزیدی پارچە پارچە بکەرا، بەڵام مڎرامانوو گەلەکەیما سەرکۆت و پلانەکۍ کازمی و پەدەکەی و دۆڵەتو تورکی هۊرشێویاوە.

ئەندامو کەنەکەی و ئەندامو مەکتەب سیاسی پادێ، ساڵح ئیزدین ئەرەیاۋناش، هەرچڼەیچ جە دژشا قەرار بڎریۆ، بەڵام ئاڎۍ درێژە بە ئەرەکۊشای ۋێشا مڎا و واتش: "بەڵام قەرارۍ چامنە جە ١٠ەمین ساڵەو فەرمانەو سەرو شەنگالینە، بێ ڕێزی بۍ بە گلېرگەکەیما. ئەگەر حکومەت داواکارییەکاما قبوڵ نەکەرۆ، ئێمە تانە جە دادگاکا مافو مرۆڤی مڎەیمۍ. چا ڕوۆن دۆڵەتو عێراقی ئەرەمەرزیان تا ئیساتۍ گلېرگەو ئێزیدیشا پېسە هاموڵاتی ۋێشا قبوڵ نەکەرڎەن. ئێمەیچ مافو ئانەیما هەن جە ڕای جیا جیاوە داواو مافە ڕەواکا ۋێما بکەرمۍ."