ئەندامەو کۆردیناسیۆنو کۆنگرە ستاری شیراز حەمۆ سەرنجش وست سەرو هرووژمەکا دۆڵەتو تورکی دژو ژەنا و ئەرەیاۋناش، دۆڵەتو تورکی پرۆژەو نەتەوەی دیموکراتیکی کە ژەنی سەرمەشقیش مکەرۆ، بەمەتەرسی پەی سەرو ۋێش منیۆشەرە.
ئەندامو کۆردیناسیۆنو کۆنگرە ستاری شیراز حەمۆ سەبارەت بە هرووژمەکا دۆڵەتو تورکی ئەرەگیری پەی سەرو سەرنیشتوو ۋەرکۆتوو سوریای بەتایبەتی پەی سەرو ژەنا، قسێش پەی ئاژانسوو هەواڵوو فوراتی (ANF)ی کەرڎۍ.
شیراز حەمۆ جە سەرەتاو قسەکاشەنە باسش چانەیە کەرڎ کە هرووژمەکۍ دۆڵەتو تورکی مگنانە ئاستو تاوانەو جەنگیۆ و واتش، "هرووژمەکۍ دۆڵەتو تورکی پەی سەرو هەرێمو سەرنیشتی و ۋەرکۆتوو سوریای، تاوانۍ جەنگی و کردەوۍ نائەخلاقیێنۍ. دۆڵەتو تورکی چا هرووژمانە چڼین مەرامێش هەنۍ. بەمەڵامەتوو وەڵێکۊتەی نەتەوەی دیموکراتیکی جە هەرێمەکەنە و سەرمەشقایەتی ژەنا، ئا هەرێمۍ مکریانە مەرام. ئی شۆڕشە جە تەمامو دنیێنە دەنگش دانۆ، هەرپۊکەی دۆڵەتو تورکی تەرسیش ۋنە نیشتێنە. دۆڵەتو تورکی گەرەکشا گلێرگېوە کۆیلە وەش بکەرۆ. هەرپۊکەی پرۆژەو نەتەوەی دیموکراتیکی پەی ۋێش بە مەتەرسی مزانۆ.
دۆڵەتو تورکی جە هرووژمەکاشەنە بە پلەی یوەم ژەنا مکەرۆ مەرام. جە ٢٨و ئابو ٢٠٢٤ینە خالیدە عیسا و کوڕەکەش هەژار سلێمانش کەرڎۍ مەرام. خالیدە ژەنێوە بۍ کە بەردەوام رۆحی وڵاتپارێزنی جە نەواخنشەنە بۍ. هەرپۊکەی کریا مەرامو هرووژمەکا دۆڵەتو تورکی. ئا پڕۆژۍ کە ژەنی سەرمەشقایەتیش بکەرا، دۆڵەتو تورکی بە مەتەرسی پەی سەرو ۋێش موینۆش. دۆڵەتو تورکی ژەنا مکەرۆ مەرام چونکی مزانۆ ئا ئیراڎەی جە هەرێمەکا سەرنیشتوو ۋەرکۊتوو سوریاینە بنیاڎنریان، ئیراڎەو ژەنۍ ئازاڎۍ و گلېرگەکا ڕاوەبەر مکەرۆ و کۆمۆناڵ بیەی ساز مکەرۆ".
شیراز حەموە ئەرەیاۋناش کە بەمەڵامەتوو هرووژمەکا دۆڵەتو تورکیوە ژەنی رووبەڕوو مەترسی گۆرەی بیێنێوە و دەسنیشانس کەرڎ کە جە هەرێموو سەرنیشتوو ۋەرکۊتوو سوریاینە ژەنی رووبەڕوو مەترسی جدی مباوە و دژو ئانەیچ رێکوزیاکۍ ژەنا چا هەرێمانە جە دژو تنوتیژی ئەرەکۊشا.
ئەندامەو کۆردیناسیۆنو کۆنگرە ستاری شیراز حەموە ئەرەیاۋناش، کە ئاڎۍ ۋێشا میاونا بە ژەنا و واتش، "پېسە کۆنگرەو ستاری و جمیەرەکا ئەرەکۊشای ژەنا، جە هەرێمەکەنە هەوڵەکێما وستێنۍ گەڕ، کە بەردەوام دلۍ گلێرگەینە بیمۍ و ۋێما بیاونمۍ بە گرڎ ژەنێوە. مشۆم ژەنی یۆبگێرا پەی ئانەی بتاوا جە دژوو هرووژمەکا ژەنا پارێزنا".
