سەرۆکی ئەمریکا دۆناڵد ترامپ پێشنیاری کرد غەززە کۆنتڕۆڵ بکات و هاوڵاتیانی شارەکە بگوازێتەوە بۆ وڵاتانی جیاواز، کۆمیسەری باڵای مافەکانی مرۆڤی نەتەوە یەکگرتووەکان، ڤۆلکەر تورک لەم بارەیەوە قسەی کرد.

ڤۆلکەر گوتی: "دیاریکردنی چارەنووس ڕەگەزێکی سەرەکییە لە یاسای نێونەتەوەیی، وەک دیوانی دادی نێونەتەوەیی بەم دواییانە ڕامانگەیاند، پێویستە ئەم ڕەگەزە لەلایەن هەموو دەوڵەتانەوە بپارێزرێت. ڕاگواستن و ئاوارەکردنی زۆرەملێی هاوڵاتیان لە هەرێمە داگیرکراوەکان بێگومان قەدەغەیە".

ڤۆلکەر تورک ڕایگەیاند کۆتاییهاتنی شەڕ لە هەرێمەکە و ئاوەدانکردنەوەی غەززە بەگوێرەی یاسا نێونەتەوەییەکان زۆر گرنگە.

لەکۆتاییدا گوتی: "فەڵەستینی و ئیسرائیلییەکان پێویستیان بە ئاشتی و ئاسایش و یەکسانییە".