سیاسەتمەدارۍ و نوێنەراو ڕێکوزیایە دیموکراتیکەکا، کە پەی داواو ئازاڎیی جەستەیی ڕابەروو گەلوو کوردی عەبدوڵا ئۊجالان و چارەسەروو کێشەی سیاسیی کوردی وان قەرسۊ ڕاپیمایشا دەس پەنە کەرڎەبێ، یاوۍ مەنتێقەو جورنە ڕەشی. دماو ڕاپیمایەکەی وەرڎەموو ناوەندوو مەنتێقەکەینە دروشمۍ بەرزۍ کریێوە، وەڵۍ ناوەندوو بارەگاو دەم پارتیینە ئەرەیاونایۍ ونیاوە.

پەرلەمانتاروو جولەمێرگوو دەم پارتی ئۊزنور بارتین چا واتش: "لوێبیمۍ حەرلێوە خێرامای خاسما بە جۊشوخرۊشۊ کریان، منەتبارۍ خەڵکوو وەشڵێۍ داواکاریی زیندانییا و ئەدایا یاونیۍ یاگۍ و گۊشەگیری دماییش پەنە ئامێ. پیلانگێڵنی میاننەتەوەیی شەرمەزار کەرمۍ و داواو ئێمە ئازاڎیی جەستەیی بەڕێز عەبدوڵا ئۊجالانین. پەی چارەسەرکەرڎەی کێشەکاو کوردی پێویسا زووتەرین وەختنە چەمپەنەکەوتەی کریۊ، سەرکەوتەی پەی ئێمەن".

وەختوو ئەرەئاونایەکەینە گەنجۍ پانکارتوو "ئازاڎیی ڕابەریما ئازاڎیی ئێمەن"شا چا ورواستۍ و بە چەپڵۍ و هەلهەلۍ  جوابشا دریاوە. دماو ئەرەیاونایەکای دروشمەکاو "بمرۊ کۊیلاتی"، "بژیوۊ مرامانوو زیندانییا" بەرزۍ کریێوە.

دماتەر کادرە سەرمەشقەکاو پەکەکەی ساڵەح کانداڵ و هامڕێکێش سەروو قەبرەکاشاوە یادۍ کریێوە. پەرلەمانتاروو دەم پارتی جەنگیز چیچەک یادکەرڎەیۊکەینە قسێش کەردۍ و واتش: " پەی ئازاڎیی جەستەیی بەڕێز ئۊجالانی کەوتێنمۍ ڕا. کۊشیایما دووەلایەنەن؛ یۊشا دژوو سیستمین، ئەوشا دژوو خیانەتوو دلێن ".

چالاکۍ دماو یادکەرڎەیۊکەی ولیشا سەروو قەبرەکاوە نیارە و سەرۍ قەبرەو جومعە تاکی و خەلیل چاڤگونیشا دا.