پەیامو مەسعود بارزانی پەی کۆنفرانسو یەکڕیزی و یەکهەڵوێسی کوردی جە وەرنیشتوو کوردەسانینە واوەی کریاوە کە پەشتگیری جە چارەسەری ئاشتییانەی و دیپلۆماتیکی مکەرمێ و مشۆم مافو کوردا جە دەستووری تازە و سوریاینە مسۆگەرۍ بکریانە.
کۆنفرانسو یەکڕیزی و یەکهەڵوێسی کوردی جە وەرنیشتوو کوردەسانی جە پارکو ئازادی شارو قامیشلۆینە بەردەواما.
جە کۆنفرانسەکەنە، وەرپرسو دۆسیەو سوریای جە دیوانو سەرۆکایەتی هەرێمو کوردەسانی، د. حەمید دەربەندی پەیامو مەسعود بارزانیش واناوە.
جە پەیامەکەنە موبارەک بای بەستەو کۆنفرانسەکەی کریان و پێسەو هەنگامێوە گرنگ پەی یۆبییەو کوردا جە سوریانە پێناسەکریان.
مەسعود بارزانی سوپاسو مەزڵوم عەبدیش کەرد کە دەوری سەرەکیش بییەن جە بەستەو کۆنفرانسەکەی، هیواش واست ئی کۆنفرانسە بۆنە مایەو بەدیئاردەو داوا و ئاواتەکا گەلوو کوردی.
ئاماژەش پانەیە کەردەن، ڕووەدایەکا هەرێمەکەی پاسەش کەردەن گەلوو کوردی پەی مافەکا وێش ئەوەکۆشۆنە، ماچۆنە: "پەشتگیری جە چارەسەرو ئاشتییانە و دیپلۆماسی مکەرمێنە. بەهیوانمێ گەلوو کوردی پەی مافەکا وێش ئەوەکۆشای بکەرۆ،
پەیامەکەو مەسعود بارزانی، ڕاوەش کەر بۆنە پەی یەکڕیزی هێزە کوردی و کوردەسانییەکا و یەکڕیزی ڕوانگەو گەلوو کوردی جە سوریای تازەنە، ئینەیچ کاریگەری ئەرێنیش سەرو وڵاتا هامسای بۆنە.
