بنەیانەو شەنیاشاری: بە دڵنیاییوە یۊ بە یۊ داڎگایی کریا!
بنەیانەو شەنیاشاری، کە ئەنداماو بنەیانەکەیشا کۊکوش کریێنۍ ئەرەیاوناشا، وەختۍ دەسەڵات فاڕیۊ گرڎوو ئانیشا کە پەشتیشا بە ئەردۊغانی بەستێنە یوە بە یوە داڎگایی کریا.
١٤و حوزەیرانوو ٢٠١٨ جە مەنتێقەو پرسوسوو "ڕحا"ینە، کەسوکار و پاسەوانۍ "ئیبراهیم خەلیل یڵدز"ی پەرلەمانتاروو ئاکەپەی، هجوومشا کەرد سەروو بنەیانەو "شەنیاشار"ی عاقیبەتنە مێردوو دێدە "ئامینە شەنیاشار"ۍ و دووۍ جە کوڕەکاشا کوشتۍ و "فەرید"ی کوڕیچش چا هجوومنە بریندار بی. بنەیانەو "شەنیاشار"ی پەی بەدیئاردەی داڎپەروەری وەردەموو داڎگاو "ڕحا"ینە خەریکۍ چالاکیی ئێشکگێریی داڎپەروەرینۍ.
بنەیانەو "شەنیاشار"ی جە ٩و ئازاروو ٢٠٢١ دەسشا بە چالاکییەکەیشا کەردەن، وەلێم بۊنەو بوومەلەرزەکەو ٦ شوباتوو ٢٠٢٣ پەی ماوەو ١٥ ڕوا چالاکییەکەشا مرڎنا. بنەیانەو "شەنیاشار"ی جە ٢٠و شوباتیوە دەسشا بە چالاکییەکەیشا کەرڎۊ.
جە ٧٠٢ەمین ڕۊو چالاکیی ئێشکگرییشانە پەی داڎپەروەری، بنەیانەو "شەنیاشار" ئی پەیامەشا سەروو هەژماروو تویتەرەکەشاوە وەڵا کەرڎۊ: "ئانۍ بە بەکارئاردەی دەسەڵاتی سیاسی تاوانوو دژوو ئینسانییەتیشا کەردەن، لاو گلێرگەیۊ ویرۍ مەشاوە. ئێساتۍ هەرمانەو ئێمەنە، کە حیچما ویر نەشۊوە. وەختێوە دەسەڵاتی سیاسی فاڕیا، داڎگا سەربەوێکانە، یۊ بە یۊ ئا کەسۍ داڎگایی کریا، کە وێشا پەشتەو ئەردۊغانیوە شارتەنۊ".
س.ز
