ئەنداماو بنەیانەو "شێخموس فلکی" و "عەلی دەرە"ی کە قەومۍ بنەیانەو "فلکین"ۍ باسشا چا کارەساتی کەرد، کە ئامان ملشارە.

"شێخموس فلکی" ئەرەیاوناش، ئا وەختە بوومەلەرزەکە کەوت، ئاڎ ئامەدنە بۍ و هاگاڎار کریانۊ، کە هەرمانەو گێڵای و ڕزگارکەرڎەی فرە بەخاوی ملۊ ڕاوە، پەوکای فرە زوو وێش یاونان سەمسوور. "فلکی" واتش، هەزاران بینۍ جە سەمسوورنە وڕیێنۍ.

'وێما جەنازەکێما چێروو سەقف و پایە وڕیایەکانە بەر ئارڎۍ و نیێما'

"فلکی" ئاماژەش پانەیە دا، بە قسۍ کەسوکارەکەیش خەڵک پەی ماوەو ٣-٤ ڕوا بە هەوڵ و تواناو وێشا هەرمانەو فریاکەوتەی و ڕزگارکەرڎەیشا کەرڎێنە و واتش: " ئیساتۍ مەتاوو ویر جە حیچی کەرووە و پەی چێولایچ حیچ پلانێوەم نییەنە. ئێش و ئازارما، خەمێما، دۊخی نادیارما گرڎ چێوێش شێونان. ئێمە نەتاواما بە دڵوو وێما پەرسە پەی مەرڎەکاما بنیەیمێرە. تەنیا بنەیانەکەو ئێمە ٣٥ کەسێش مەرڎێنۍ. ئێمە یۊ دماو یۊی جەنازەکێما چێروو یانە وڕیایەکانە بەر ئارڎۍ و ئسپارێما بە خاکی. ئیسەیچ مزانمۍ بڕۍ کەسووکارەکەیما هەڵای ئینۍ چێروو یانە وڕیایەکانە ".

'ئێمە وێما بە هەوڵۍ وێما تەپایی یانەکاما لا بەرد'

"عەلی دەرەش" باسوو ئانەیش کەرد، کە وەختوو بوومەلەرزەکەینە وتەبێنا، کتوپڕ دیواروو یانەکاما وڕا ملمارە و واتش: "گرڎما باوشیما کەرڎە یۊترینیرە و نەتاواما بزیەیمێرە. کارەبا بڕیا و واران وارۍ. وێما بە هەوڵۍ و مانیایی وێما کەسووکارەکەما چێروو سەقفوپایە وڕیایەکانە بەر ئارڎێ".

ئێمە حیچ هەرمانۍ و هەوڵێوە فریاکەوتەی و دەمۊئامایما نەدیۍ. پەی ماوەو دووۍ ڕوا، خەڵک وێش هەوڵێش دۍ بە تواناو وێش جەنازیشا چێروو یانە و بینا وڕیایەکانە بەر ئارڎۍ. ئێمە دووۍ جەنازۍ کەسووکاریما وێما چێروو یانەکانە بەر ئارڎۍ. حەرپاسە ٦-٧ کەسۍ بریندارێچما ڕزگارۍ کەرڎۍ. ئا بینۍ کە من باسس کەروو ٣٠-٤٠ کەسۍ دلیشنە مەرڎۍ. نیمەو ئا کەسا کە مەرڎۍ جەنازەکێشا بەر ئامۍ ونیمەکەی تەرێشا هەڵای ئینۍ چێروو سەقفوپایەو یانەکانە مەنێنۍ.

 ئێمە بە زەڕوو وێما حەفارەما بەکرۍ گێرت و بەکارما ئارڎ پەی لابەرڎەی تەپایرەی بینایەکاو ڕزگارکەرڎەی بریندارەکا و بەرئارڎەی جەنازەکا. پێسە ژنییەبۊم ماچا سەمسوورنە ٣٢ هەزار کەسۍ مەرڎێنێ".

س.ز