پەکەکە ئەرەیاوناش، تەڤگەرو ئازادیی کوردەسانی و گەلوو کوردی جە ١و ئایارینە ئەوەکۆشای دیموکراسی و ئازادیشا بەرزکەردۆ و پی جۆرە ژیوایێ فرە بە نرخشا خوڵقنا. پەکەکە ١و ئایاریش موبارەک کەرد و سەبارەت بە پرۆسەکەئ پەیامی گرنگش ئەرەیاونا.
کۆمیتەو ڕاوەبەری پەکەکەی بە بۆنۆو ١و ئایاری ڕۆو جەهانی کرێکارا بەیاننامێوەش وەڵاکەردۆ. جە بەیاننامەکەنە ئامان:
"ئێمە جە ١و ئایارینە ڕوێ تازە و یەکڕیزی، یۆگێرتەی و ئەوەکۆشای چینو کرێکارانە ژیومێنە، دماو ٨و ئاداری و نەورۆزی، جە ١و ئایارینە، کرێکارێ و گەلوو کرێکارا مچیا مێڏانەکا و دژو فاشیستی پەی دیموکراسی جە گرڏو بوارەکانە ئەوەکۆشایشا بەرز مکەراوە. بە دەنگی بەرز داوا ڕەواکێ وێشا پەی ئەرەمەزنارەو سیستمێوە ئازاد، یەکسان و دادپەروەرانە بەربڕا و دژو فاشیزمی ئەوەکۆشای بەرز مکەراوە. پەی بنیادنیاو گلێرگێوە دیموکراتیک سەرو بنەماو ئازادی ژەنا و ئیکۆلۆژی یۆبییەو کۆمەڵایەتی، یەکڕیزی و ئەوەکۆشای وێشا بەهێز مکەرا.
سەرو ئی بنەمێ ١و ئایاری جە گرڏ و هەڤاڵاما و بەتایبەت ڕابەر ئاپۆی، کرێکارا، زەحمەتکێشا، ژەنا و جوانا، گەلوو وڵاتپارێزی و دۆسا دێموکراتیما موبارەک مکەرمێنە، وە هیواو سەرکەوتەی پەی گرڏو ئا کەسا وازمێ کە جە ١و ئایارو ئێساڵینە هەوڵو ئازادی و دیموکراسی مدانە. هەرپاسە بە ڕێز و پنەزانایۆ یاڏو گرڏو گەشمەرڏا ڕۆو ١و ئایاری، بەتایبەت گەشمەرڏا مێڏانو تەقسیمی جە ساڵەو ١٩٧٧ و فەرماندەکا گەریلای پێسەو محەمەد قەرەسونگور، محەمەد ئەمین ئاسڵان، و ڕەمەزان کاپلان یاڏ کەرمێ. هەرپاسە بەبۆنۆ ١و ئایاریۆ، هیواو تەندروستیێ خاس و خاسبییەیۆ و خێرای پەی هەمڕێیا و دۆسا فرە بەقیمەتیما پەی، سری سۆرەیا ئۆندەری قارەمانیما کە جە سەختترین دۆخەنە پەی ژیوای مڏرامان مکەرۆ وازمێنە.
١و ئایار ئەستێرێ درەوشاوە و ڕا نیشاندەرا جە هۆشیاری چینو کرێکارانە
فرە ڕۆشنا کە ١و ئایار بەنرخترین و زینە تەرین میراتا کە جە سۆسیالیزمو ڕاستەقینەینە مەنەنۆ. بێ گومان ئانری پاسەش پنە کەردەن، حەقیقەتو مڏرامانی و گەشمەرڏەبییەکاشا. وەرەنگاربییەیۆ ئازادی جە ستەمی، چەوسنایۆ و سەرکوتکەردەی و وەڵکەوتەی بە درێژایی هێڵەو گەشمەرڏا بەهێوە پاسەش خوڵقنان کە هەمیشە ئەوەکۆشای ئازادی، یەکسانی و دادپەروەری ڕێنمایی و هێزش پنە بەخشان.
تەڤگەرو ئازادیی کوردەسانی و گەلوو کوردی با مڏرامانە تاریخییەی کە پەی ئازادی کە بە سەرمەشقایەتی ڕابەر ئاپۆی پەرەش پنەدریان، حەر چنین جە ٨و ئادار و نەورۆزینە بە پاو مانا حەقەتینەکێ وێش بەرش ئارد، جە ١و ئایارینە بەهەمان شێوە بە پەرەدای بە ئەوەکۆشای ئازادی و دیموکراسی بەنرخترین ژیوایش خوڵقنان،. ئاڏێ گرڏ مانگێ ١و ئایاریشا نەک حەر پێسەو ڕوێ تازەبییەیۆ هۆشیاری و ئیرادەو دیموکراسی-سۆسیالیستی، بەڵکوم پێسەو ڕوێ ڕێکوزتەی و چالاکی بەردەوام پەرەش پنەدریۆنە. تیۆرو شارستانیەتو دیموکراتیکی کە ڕابەر ئاپۆ پەرەش پنەدان، واقیعو ١و ئایاریش بە شێوێ دروستەر و گونجیا تەر پنەیاونان و بە پاو ماناو حەقەتینێ وێش کریان ژیوای.
ئاشتی بە بێ ئازادی و دیموکراسی بییەیش نییا
جمیەرەکەما و گەلەکەما ئی ١و ئایارییە سەرو بنەماو 'بانگەوازو ئاشتی و گلێرگەو دیموکراتیک' ی ئەزموون مکەرا کە ڕابەر ئاپۆ جە ٢٧و شوباتینە پێشکەش کەرد. ڕۆشنا کە ئاشتی بەبێ ئازادی و دیموکراسی مەکریۆنە. بەبێ ئاشتی جە کوردەسانەنە، مەحاڵا دمای بە جەنگی بێنە و ئاشتیێ حەقەتینە جە وەرکەوتوو دلێڕاسەی و جەهانەنە بەدی بێنە. چونکە مۆدێرنیتو سەرمایەداری جەهانی سەرو بنەماو پارچەکەردەی کوردەسانی و هەژموونو ئەرەگیری بنیات نریان. پۆکەی ئاشتی حەقەتینە جە جەهان و وەرکەوتوو دلێڕاسەینە تەنها بە ئاشتی جە کوردەسانەنە یاگێ گێریۆنە. گلێرگەو دیموکراتیکی یاگێ سروشتییەنە کە چنی سروشتو ئینسانی گونجیۆنە. ئی گلێرگە گلێرگێوە ئابووری، ئیکۆلۆژی، ئازادی ژەنێ، کۆنفیدرالیزمو دیموکراتیکی و سۆسیالیستی دیموکراتیکیا. جە رۆو ئارۆینە ژەنێ و گەلوو کوردی و چێر دەسەکێ زیاتەر جە گرڏ کەسێ پەنەوازیشا بە ئاشتی و گەشەپنەدای گلێرگەو دیموکراتیکیا. پۆکەی گەلەکەما و دۆسەکێما بەتایبەت ژەنێ و جوانێ، خاستەر و قووڵتەر جە ماناو 'بانگەوازو ئاشتی و گلیرگەو دیموکراتیک' ی یاوانە و چالاکییەکێ ١و ئایاری مکەرانە دەرفەتێ پەی بەرەو وەڵی ئا هۆشیاری و چالاکییە. بە وەڵاکەردەیۆ پارادایمو مۆدێرنیتو دیموکراتیکی جە سەرانسەرو جەهانی، هۆشیاریی ئینتەرناسیۆنالیستو سۆسیالیستو دیموکراتیکی و هاودەنگی جە گرڏو مێڏانەکانە بەرەو وەڵێ بەرۆنە.
گەلەکەما و جەماوەرو دیموکراتیکی خاس مزانا کە ئێمە پێسەو جمیەرە و گەل جە ٢٧و شوباتینە بە گرڏو تواناماوە پەشتیوانیما جە بانگەوازو ڕابەر ئاپۆی پەی ئاشتی و گلێرگەو دیموکراتیکی کەرد و جە ماوەو ٢ مانگا ویەردەینە هەوڵمادان بە دروسی جە بانگەوازەکەی یاەمێنە و بە سەرکۆتەی جابەجێش کەرمێنە. ئێمە بە ڕۆشنی ئا هەڵوێسەما جە قسەکا ١و ئاداری و نەورۆزینە ئەرەیاونا. سەرەڕاو دماکەوتەو حکومەتو ئاکەپەی، ئێمە بەردەوامێنمێ جە پارێزناو ئی هەڵوێسەیە. چونکە ئێمە قەراری جدییما جە چارەسەرکەردەو کێشەکانە ئەرەیاونان، هەرپاسە بە ئەرەیاونێوە فراوان چنی دۆخەکەی مامەڵە مکەرمێ و هەوڵمڏەیمێ نەبیمێ لایەنێ کە پرۆسەکە هورشنریۆوە. شاندو دەم پارتی لێدوانێ گەشبینانە مڏۆنە. وینمێ کە ڕابەر ئاپۆ هیواش هەن و درێژە بە هەرمانەکاش مڏۆنە. بەڵام تا ئیسە هیچ هەنگامێوە وەرچەم پەی جابەجێ کەردەو ئا بانگەوازەیە جەلایەنو حکومەتیۆ نەنریان. هیوادارێنمێ ئی دۆخە فاڕیۆنە، ڕابەر ئاپۆ تاوۆنە بە ئازادی هەوڵ و هەرمانەکاش بەرۆ وەلێ بەرۆ و تاوۆنە کۆنگرەو حیزبی کە گرڏ چمەڕا مکەرمێ، بەسۆنە.
چێگەنە جارێوە تەر گەل و دۆساما ئاگادار مکەرمێور و خوڵقەتا مکەرمێ پەی ئانەی بە دروستپی جە پرۆسەکەی یاومێنە و بە سەرکەوتەی بانگەوازو ٢٧و شوباتی جابەجێ کەرمێ. فرە ڕۆشنا کە بانگەوازو ٢٧و شوباتی پەی ئاشتی و گلێرگەو دیموکراتیکی، بانگەوازێ نییا پەی ئانەی چەمەڕاو هورگێرتەو چێوێ جە حکومەتی یان دۆڵەتی کریۆنە. بە پێچەوانۆ بانگەوازێوەن پەی پەروەردەی، ڕێکوزتە و چالاکی دیموکراتیکو گلێرگەی بە هۆشیاری ئازادی و دیموکراسیۆ. ئاشتی جە ڕاو ئینەیۆ بەدی مێ و گلێرگەو دیموکراتیکی تەنها سەرو ئی بنەمێ پێکمێ. پۆکەی مەبۆنە کەس جە دۆخو نیگەرانی و چەمەڕاینە بۆ؛ بەڵکوم پەنەوازا گرڏما بەپاو سروشتو یەکڕیزی و یۆگێرتەی و ئەوەکۆشای ١و ئایاری گلێرێ بیمێوە و پەی پەرەپنەدای هۆشیاری، ڕێکوزتە و یەکڕیزی سۆسیال-دیموکراتیک گرڏو چێر دەسا، سەرو ئا بنەمێ دەس بە سەفەربەری بکەرا.
ئی بانگەوازە وەڵێ گرڏ چێوێ بانگەوازێوەن پەی شۆڕشی جە عەقڵیەت و شێوازو ژیواینە
پەی ئی مەبەسەیە وەڵێ گرڏ چێوێ پەنەوازا ویرکەردەیۆ و شێوازو ژیوای فاڕیۆنە. پەنەوازا خاس یاومێنە کە بانگەوازو ئاشتی و گلێرگەو دیموکراتیکی، سەروو گرڏ چێوێ بانگەوازێوەن پەی شۆڕشی جە عەقڵیەت و شێوازو ژیواینە. کاتو فاڕییاین بە ئاراسەو ئاشتی و گلیرگەو دیموکراتیکینە. ئیسە پرۆسێوە جا جۆرە دەسش پنەکەردەن. حەر چنە مڏرامان کریۆنە، کەس مەتاوۆنە چبەرو ئا جۆرە فاڕییایە مەنۆوە. ڕابەر ئاپۆ فارییای شۆڕشگێڵی وێش دەسپنەکەرد. پی جۆرە پەکەکە فاڕییای مکەرۆ. پی جۆرە گرڏو گەلوو کوردی، ژەنێ و جوانێ کوردی فاڕییای دیموکراتیکو وێشا ئەزموون مکەرا و ئینەیچ گرڏو تورکیای و وەرکەوتوو دلێراسەی بەرەو فاڕییای دیموکراتیک بەرۆنە. هەم ١و ئایاری و هەم مانگەو گەشمەرڏا بە سەرمەشقایەتی ژەنا و جوانا ڕا وەشکەرا پەی ئانەی گەل و دۆساما ئا جۆرە فارییایە ئەزموون بکەرا.
سەرو ئی بنەمێ جارێوە تەر ١و ئایاری جە گرڏو کرێکارا و زەحمەتکێشا، ژەنا و جوانا، هێزە سۆسیالیست و شۆڕشگێڵەکا موبارەی مکەرمێ. بە ڕێز و پنەزانایۆ گرڏو گەشمەرڏا مانگەو ئایاری و بەتایبەت هەڤاڵێ حەقی کارەر و محەمەد قەرەسونگور و هۆزان مزگین یاڏ مەکەرمێوە.
