هرووژمەکۍ سوپاو تورکی سەرو هێزەکاو گەریلای کە ئینۍ ئاژەو ئایێربەسینە، جە لایەنو کوردەسانیاوە جە شارو بیلفێلدو ئەڵـمانیاینە بە گلېرۆبیەیۍ شەرمەزارې کریې.

جەماوەر سەعات ١٨:٠٠ ۋەردەمو وێستگەو قیتارو مېیانینە گلېرۍ بیێوە، بە بەرزکەردەیۆ ئاڵا و وێنەو گەشمەرڎا ڕاو ڕزگاری ناڕازیبیەی ۋێشا جە دژو زیاڎبیەی هرووژمەکا سوپاو تورکی پەی سەرو هێزەکاو گەریلای بەربڕی، کە پی دماییانە سەرەڕاو ئاژەو ئایێربەسو گەریلای بە گرڎ چەک و شێوازێوە قەڎەغەکریا ئینا پېگەو هرووژمکەردەینە.

جە سەرەتاو چالاکییەکەینە بەنامۍ ناڤ-یەکیۆ، سۆسین کارتاڵە قسێش کەردۍ بەسەرنج وستەی سەرو سیاسەتەکا سەڎساڵەو تاونایۆ و دلېنەبەردەی، هرووژمەکۍ سوپاو تورکیش شەرمەزار کەردۍ و واتش: "دۊڵەت جە کاتێنە باس جە پرۆسەو واڵەو-برایەتی مکەرۆ، پەنەوازا هەنگامەش پەی بنیۆ. بەردەوامی ئی هرووژما یاگۍ قبوڵ کەردەیما نییا و دمایی پی فاشیزمیە باردێنە. داواو کوردی ژیۋایۍ ئازادانەن."

دماتەر حەسەن ئۆزدەن بەنامۍ مېیانو گلېرگەو کوردی دیموکراتیکی بیلفێلدی قسێش کەردۍ و ئاماژەش پانەی دا ئامانجو ئی هرووژما شېونای پرۆسەو چارەسەری ئاشتیانەین، کە دەسوەڵێوستەکەو ٢٧و شوباتو ڕابەر ئاپۆی پاش نیا قۆناغێوە کاریگەرۆ و واتش: "پەنەوازا ئی هرووژمۍ دمایشا پنە بۍ، مشۊم گەلاو تورک و کوردی پێوەرە ئاشتی بنیاڎ بنیا."

گلېرۊبیەکەی دماو تەمامبیەی قسەکا بە بەشداربیەی جە فێستیڤاڵو ژیۋای زیلانې دمایش ئاما.