ڕابەر ئاپۆ پەیامێوەش پەی شاندەکەو ئۊرووپای کیاست، کە بە مەبەسو دیداری چنی ڕابەر ئاپۆی ماوەو دووې ڕوان ئینې تورکیا و واتش: " هیواڎارەنا جە ژیۋگێوەنە کە گلېرگەی دیموکراتیکش چنە بنیاڎ نریا بۆ، بتاومې چەمێما بەیۆترینی گنا."
شاندێوە ٣٩ کەسی کە جە چوارچێوەو هەڵمەتۆو 'گەرەکما دیدار چنی عەبدوڵا ئۆجالانی بکەر'و چېرو چەترەو پلاتفۆڕمو ئاشتی و ئازادی ئۊروپاینە (EFFP) ئەرەمەرزیان، دوو ڕوێن بە مەبەسو دیدارو ئیمراڵی ئینې تورکیانە و پەی ئا مەبەسیچە هېزی داواو دیڎەنی ڕابەر ئاپۆیشا ڕادەسو نوسینگەو یاسایی سەدەی کەرد.
شاندەکە دماو بڕې دیدارا و گفتوگۆی جە ئوتێلېوە تەقسیمینە گلېرۊبیێوەشا ڕێکوست. جە گلېرۆبیەکەینە پەیامو ڕابەر ئاپۆی کە پەی شاندەکەیش کیاستەبې ۋنیاوە.
دەقو پەیامەکەو ڕابەر ئاپۆی پی جۊرەنە:
"دۆسا ئېژای
پەی من فرە بە مانان ڕێوە ئاڼنە دوورەتا بڕیێنە، هەوڵمڎەیدې گېڵای ئازادیی کە جە کەسایەتی منەنە چەسپیان بکەردۍ بە ڕۆژەڤ و جە هەمانکاتەنە دیدارم چنی ئەنجام بڎەیدې. وەڵې گرڎ چێوێنە ئی کۊششەیتا تەنیا پېسە پەشتیوانیێوە کەسی یان پەی گێڵای کەسی من پەی ئازادیی نمەوینو، بەڵكم پېسە پارچێوە جە ئیدارەو ژیۋای ئازادی پێوەرەیی گەلا و چارەسەریی دیموکراتیکی، ئاشتی کۆمەڵایەتی موینو.
حیچ وەختې ئازادی کەسی ۋێمم جیاواز جە ئازادی کۆمەڵایەتینە نە وینان. هەمیشە واتەنەم، تا ئازادیی کۆمەڵایەتی پێکنې ئانە ئازادی کەسیچم حیچ مەعنێوە حەقەتینەش نمەبۆ. هەر پۊکەی من ئی هەنگامې شمە بە هامپەشتی و بانگەوازێوە ئازایانە پەی ئایندەو دیموکراتیکی هامبەشو گەلاما موینو.
ئاگاڎارو داواکارییەکەیتا هەنا پەی ئەنجامدای دیداری چنیم. هیواڎارەنا جە چن ڕۆی ئایندەنە هەلومەرجو دیداری بە شێوێوە بڕەخسیۆ. چی چوارچێوەنە سڵام و ڕێزو ۋێم پێشکەش بە گرڎو ئا کەسا مکەرو کە ڕەنج مڎا، نەک تەنیا پەی من، گرڎو ئانیشا کە پەشتیوانی جە گېڵای ئازادیی و ئیرادەو دیموکراتیکی گەلاما مکەرا.
هیواڎارەنا جە ڕوانێوە ئازادەنە، جە ژیۋگێوەنە چەمما بە یۆی گنۆ کە گلېرگێوە دیموکراتیک بنیاڎ نریا بۆ.
عەبدوڵا ئۆجالان
زینانو ئاسایشو باڵاو جۆروF ی جە ئیمراڵی"
