ژەنا و قەومو کەسوکارو زینانیا جە شارو سنەینە جە ۋەرکۊتوو کوردەسانی دژو قەرارو جە قەنارەدای پەخشان عەزیزیۍ بانگەوازشا کەرڎ و واتشا: " پەنەوازا گرڎما دژو جە قەنارەدای پەخشان عەزیزیۍ مردمێوە".
هێزی جە شارو سنەینە ژەنە چالاکا و بنەیانە وڵاتپارێزنەکا و بنەیانەو زینانیا سیاسی دەربارەو قەرارو جە قەنارەدای زینانیەی سیاسیە پەخشان عەزیزیۍ جە لایەنو دەسەڵاتو ئێرانیوە دلۍ شارەکەینە کوۍ بیێوە و ئەرەیاۋنێوەشا ۋەناوە.
جە ئەرەیاۋناکەینە ماچا:
"پېسە ژەنە چالاکا و بنەیانەو ئازادیوازا و زینانییا سیاسیی پەسینای سزاو جە قەنارەدای ناڕەواو پەخشان عەزیزیۍ شەرمەزار مکەرمۍ و داوا جە رێکوزیاکا مافو مرۆڤی و ڕێکوزیا جەهانییەکا مکەرمۍ دەنگ هۊربڕا.
ژیۋای پەخشان عەزیزیۍ ئینا مەترسینە کە دەسەڵاتداراو ئێرانی گەرەکشانە ژیۋای و ئازادیش چنە بساناوە، پەنەوازا گرڎ کوردێوە بە یۊگێرتەیی دژو سزاو جە قەنارەدای پەخشان عەزیزیۍ و زینانیا سیاسیی تەری مرداوە.
گەلوو کوردی جە شۆڕشو "ژەنی ژیۋای ئازادی"نە بەسەڎان قوربانیێش دێنۍ و هەڵای چارەنوویسو هاموڵاتیاما کە گیریێنۍ نادیارا و وەرگەو زامێوەتەری نمەگێرمۍ و داوا جە گلێرگەی مېیاننەتەوەیی مکەرمۍ ڕا جە جابەجێکەردەی سزاو جە قەنارەدای پەخشان عەزیزیۍ بگێرا و بە زووتەرین کات سزاکۍ هۊرشێویۆوە".
