کوشتەی تراژیدی ”ژینا ئەمینۍٚ خەڵکو شارو سەقزی چل ڕۋێش سەرەنە شی و ئارۊ جە چلێشەنە جە شارو سەقزی و سەرو مەزارەکەیشەوە، بە بەشداری دەیان هەزار کەسان و واتەیۆ دروشمو (ژەنی ژیوای ئازادی) مەڕاسیمی جەماوەری گەورە ڕێکۋزیا.
پەی ئامادەبییەی جە مەڕاسیمەکەنە، جە سەرسەبای زووەوە خەڵک جە سەقز و شارەکۍٚ تەرۍٚ وەراسانو کوردستانی و ئێرانیەوە ڕووەشان نیا شارو سەقزی. سەرڕاو ئانەی هێزەکۍٚ ڕژێمی ئاستەنگیشان پەی خەڵکی دروست کەرد، بەڵام دیسانەوە نەتاواشان ڕاگیری جە مەڕاسیمو چلۍٚ ژینای بگێرانۍٚ و هەزاران کەسۍٚ وێشان یاوانا سەرو مەزارەکەیش. جەماوەری ناڕازی پەیتا پەیتا دورشمێشان پەی ژیناو ئازادی واتێوە. 
جە سەرو مەزارەکەیچشنە بنەماڵەکەش قسێشان کەردۍٚ و چنڎین وتارۍٚ، شعرۍٚ وانێوە ، کە گوزارە بێنۍٚ جە بێزاری و توڕەیی جە کوشتەی ژینا و جەختکەردەیۆ سەرو ئازادی.
بەهۆکارو یورشو هێزە ئەمنێیەکۍٚ ڕژێمی، جەماوەری ناڕازی پەرچەکەردارشان نیشانەدا و ڕووبەڕووبییەی میانو هەردۋۍٚ لانە ڕوەشدا و جە ئاکامشەنە هێزە ئەمنیەکۍٚ بە تەقەشان جە خەڵکی ماتەباری و ناڕازی کەرد و بەهۆشەوە چنڎین هاموڵاتیۍٚ زامدارۍٚ بیۍٚ و چنڎینۍٚ تەرێچ دەستگیرۍٚ کریێ.

هاوەخت چەنی سەقزی، جە فرێوە جە شارۍٚ و شارەکڵەکانو وەراسانو کوردستانی و ئێرانیەنە بە چالاکیۍٚ جۆربەجۆرۍٚ چلۍٚ ژینا ئەمینیۍٚ ڕێکوزیا و جە میانشانە جارێۋی تەر سەرکۆنەو کوشتەکەیش کریا و داواو حساب پەرسای جە بکوشەکانش کریاوە.