دادگاو پەدەکەی هەولێرەنە سزاو زیندانییش ملوو مامۆسێوی ناڕازیرە سەپنا
واوەی پەدەکە ڕاو دادگایوە و بە ئەرەتاشتەی تۆمەتی بێبنەمای، سزاو زیندانییش سەروو چالاکیوە سەپنا، کە وەڵتەرێ پەی داواکەردەی مافەکاش بەشداروو چند کۆبییەیۆێوە بییەبێ.
ئارۆ، دادگاو هەولێری، بە تۆمەتێوی ناڕەوا و ئەرەتاشیا سزاو ساڵێوە و شش مانگا زیندانییش ملوو مامۆسای ناڕازیی لوقمان نەجمیرە سەپنا.
لوقمان نەجم، مامۆسا بێ دماناوەندیی سیدەکانوو ئیدارەو سۆرانینە، پارێزگاو هەولێرینە، ڕۆو ٢٣ێ تشرینوو دووەموو٢٠٢٣ێ، بۆنەو بەشدارییشۆ جە کۆبییەوە ناڕەزایەتییەکانە و داواکەردەی سایسە داراییەکاش و ڕەخنگێرتەی وەنەو دەسەڵاتوو پەدەکەی، چەکداراو پەدەکەی ئڕفانا.
ئارۆیچ، دادگایێوە شانۆگەری ئاسا و ئەرەتاشیانە، هامشێوەو زیندانییایو تەری بە تۆمەتەو بەردەی یەرێ کارتۆنە پسکیتا، پەی گەریلایاو پەکەکەی سزاو ساڵیوە و شش مانگا زیندانییش ملەرە سەپیا.
یاگێ باسینە ئینە ئوەڵ جار نییەن، دادگایەکاو چێروو دەسەڵاتوو پەدەکەی، ئازادیوازا مامۆسایا، ڕۆنامەنویسا و چالاکا بە تۆمەتێ ئەرەتاشیێ سزا بسەپنۆ ملشارە، بەڵکوم هەرکەسێوە ڕەخنە جە دەسەڵاتوو پەدەکەی بگێرۆ، تۆمەتەو ئەندامبییەی جە پەکەکەی و سیخوڕیکەردەی دەوڵەتا یا تەرسی سەروو دامودەزگایەکاو حکومەتی مدۆ پاڵش و سزای قرسەش ملەرە سەپنۆ.
سەپنای ئا سزێ سەروو مامۆسێوە ناڕازیرە بە تۆمەتیوە ئەرەتاشیای چانە ئینا وەختێونە، پەدەکە نەک هەر ئاسانکاری پەی هجوومە ئەرەگیرکەرییەکاو دەوڵەتوو تورکی بنکێ و بارەگێشا پەی وەش مکەرۆ، ئاوی و کارەباو پەنەوازیی لۆجستییچ پەی ئا بنکە و بارەگایا دابین مکەرۆ
