داڎگاو باڵاو دەوڵەتوو تورکیای قەراروو بێتاوانییش پەی حەر یەۊ جە سەروازا "عەلی کایا، ئۊزجان ئیل دەنیز" و دڎانپۊرەنییەر "وەیسەڵ ئاتەش"ی بەر کەرد، کە جە شەمزینان هجوومشا کەرڎەبۍ سەروو کتێبخانەو ئومێدی.
سەروازۍ "عەلی کایا، ئۊزجان ئیل دەنیز و ددانپۊرەنییەر "وەیسەڵ ئاتەش" بە بۊمب هجوومش کەرڎەبۍ سەروو "کتێبخانەو ئومێدی" جە مەنتێقەو "شەمزینانوو جۊلەمێرگ"ی و دماو ئانەی ڕەمێبێنۍ خەڵکی گێرتێبێنۍ، وەلیم دەوڵەتوو تورکی دماو ماوێوە زینداننە بەرش ئاردۍ و تەنیا دۊسییەکەشا داڎگانە مەنەنۊ. ئیسەیچ داڎگاو باڵاو دەوڵەتوو تورکی قەراروو بێتاوانیی هەریەریشاش پەسەند کەرد. ئا یەرە سەروازۍ تۊمەتبارۍ بێنی بە "کوشتەی خەڵکی"، "وەشکەرڎەی ڕێکوزیای" و "هەوڵۍ پەی کوشتەی خەڵکی".
وەڵتەر لقوو ١وو داڎگاو سزا قورسەکاو وانی قەراروو بێتاوانییش پەی ئا یەرەسەروازا بەرە کەرڎێبۍ، ئا قەراریچە فەرمانگەو ٣موو داڎگاو باڵاو تاوانەکاو دەوڵەتوو تورکینە پەسەند کریاوە و داڎگاو باڵای ئەرەیاونابێش، حیچ بەڵگێوە ڕۊشن و کۊنکرێتی نییا، تا ئینسان واچۊ ئا تاوانە نەکریان.
"یاشار بویوک ئانێت" فەرماندەو ئا وەختەو هێزە وشکاییەکاو سوپاو تورکی پەی سەروازا "عەلی کایا و ئۊزجان ئیل دەنیز"ی کە بۊمبەکەشا وستەبۍ کتێبخانەکەوە، واتەبێش: "من مشناسووشا، ئانە کەسیۍ خاسێنێ".
ڕۊو ٩و تشرینوو دووەموو ٢٠٠٥ بە بۊمبۍ پەلامارەو سەروو کتێبخانەو ئومێدی جە مەنتێقەو "شەمزینانوو جۊلەمێرگ"ی دریا و حەر یەرە پەلامارڎەرەکۍ خەڵکی گێرتۍ و دەسیچ گیریا ملوو سەیارەکەیشارە. دلۍ سەیارەکەیشانە چنڎین بەڵگۍ تاوانکاریۍ بێنۍ و سەلەمنێنێش کە گرووپە تاوانکارەکاو دەوڵەتوو تورکینۍ و چا وەختەنە ئا هجووم و پەلامارەو ئا گرووپە تاوانکارا بییەبۍ بە گەورەتەرین باسوو تورکیای و میدیا و ئەرەیاونایەکاو ئا وڵاتی.
"سەفەری یڵماز:" ساعیبوو کتێبخانەو ئومێدی بۊنەو کۊشایش پەی ئازاڎیی گەلوو کورڎی، چنڎین ساڵۍ دلۍ زیندانەکاو دەوڵەتوو تورکینە بۍ و دماو ئازاڎبییەیش کتێخانەو ئومێدیش نیابێرە، بەڵام دەوڵەتوو تورکی ئا کتێبخانەشە پەنە قبووڵ نەکریا و هجوومش کەرد سەرش.
س.ز
