حکومەتو ئاکەپە-مەهەپە  ساڵەوۆ ٢٠١٦ـ ئیرادەو دەنگدەرا پاشێل مکەرۆ و قەیوم جە شارەوانییەکانە منیۆرە. نیارەو قەیومەکا کە جە ساڵەوۆ ٢٠١٦ـ نریێنێرە، دماو هورچنیەی خۆجێیی  ٢٠١٩ بەردەوامێ بیێ، دماو هورچنیەی دلینەکا ٣١و ئادارو ٢٠٢٤ یش هەمان سیاسەت درێژەش پنەدریا. ٧ شارەوانیێ دەم پارتی و ٢ شارەوانیێ جەهەپەی ئەرەگیرکەردێنێ و قەیومش یاگێشەنە نیانەرە.

عەداڵەت کایە، پەرلەمانتارەو دەم پارتی ئامەدی، سەبارەت با دۆخەیە چنی ئاژانسو هەواڵو فوراتی قسێش کەردە و واتش: "ئا دۆخەی ئێمە ئیسە چنەش مژیومی تازە نییا، حکومەتو ئاکەپەی، دماو شکستی گۆرەی جە هورچنیە دلینەکا، دان بە ئیرادەو گەلو کوردینە مەنیۆ و هەوڵمرۆنە شارەوانییەکاما تاوانبار بکەرا. داخەم مەشۆ هامسەرۆکا شارەوانیما کە حیچ ونەپەرسایشاوە چنی مەکریۆ، بە خێرایی جە ڕاو 'شایەتحاڵی نهێنی'ـیۆ ونەپەرسایشا چنی کریۆ و با بەهانێ دەمودەس  قەیومی یاگێشانە منیۆرە. ئینە بە تەمامەتی یۆن جە کردەوە نایاساییەکا حکومەتی و دەسەڵاتی دادوەری پێسەو ئامرازێوە پەی وێش بەکارش مارۆنە. گەلو کوردی و گەلا تورکیای حەجگیز ئینەیە قەبوڵ مەکەرا."

'قەیوم دمای بە پرۆسەو ئاشتی مارۆنە'

عەداڵەت کایە ئەرەیاوناش، نیارەو قەیومەکا بەشێوەن جە هەرمانە دژە دیموکراسیەکا دەسەڵاتی و واتش: "پێسە مزاندێ دماو نیارەو قەیومی جە مێردینەنە، ئێلح و خەلفەتی، چيرو چەترەو پەرلەمانینە ئەرەمەزیان پەیوەندیدارەکاما و هامسەرۆکا ئێمە کارێوەشا کەرد کە جە ئەنجامەنە، پڕۆژە یاسێوە هامبەشە جەلایەن لایەنە ئۆپۆزسیۆنی پێشکەشە کریا. بە پڕۆژە یاساکێ پێشنیارو هەموارکەردەیۆ یاساو ئاوارتەی کە دەرفەت پەی نیارەو قەیومی دروس مکەرۆ فاڕیۆنە. ئی پڕۆژە یاسایێ ئیمزاو ١٠لایەنا ئۆپۆزسیۆنیش هەن. مشۆم خێرا فاڕیای یاسایی بەپاو دەستووری کریۆ، چونەکە ئی دۆخە ئیتر قەبوڵکریا نییا.

هەر یاگێنە قەیوم نریۆرە، گەل وەرەنگار بییەنۆ. دەسەڵات خاس ئانەیە مزانۆ ئیتر جە گلێرگەنە یاگێش نەمەنێنە. دماو هورچنیەکا دلینەی چەمەڕاو ئانەی کەرێنمێ حکومەتو ئاکەپەی جە دۆخو وەڵینیش دەرسش هۆرگێرتە بۆ. بەڵام داخەم مەشۆ نیارەو قەیومەکا وینمێ کە سەرو هەمان سیاسەتو وەلێنیشا ملا. حکومەتو ئاکەپە-مەهەپەی، جەکاتێنە کە چارەسەرو دیموکراسیانەو پرسو کوردی وسیان ڕۆژەڤۆ و زەمینێوە پەی ئینەی وەشکریان و هەرپاسە پرۆسێوە پەی هۆرگێرتەی گۆشەگیری سەرو ئێژا عەبدوڵا ئۆجالانی ڕەخسیان زەمینێوە پەی ئازادیش خوڵقیان بە نیارەو قەیومەکا ئی پرۆسەیە تێکدریۆنە."

'پەنەوازا گرڏ کەسێ جە دژو ئی کودەتایێ کە ئینا دژو دیموکراسینە دەنگش بەرز بکەرۆوە'

عەداڵەت کایە ئەرەیاوناش، مشۆم هێڵێوە پتەوەو ئەوەکۆشای جە دژو سیاسەتەکا قەیومی مەرزیۆرە و واتش: "بانگەوازو من تەنیا پەی لایەنو چەپی و سۆسیالیستەکا تورکیای نییا، بەڵکووم پەی گرڏو گەلاو تورکیاین، ئا قەیومێ دژ بە ئیرادەو گەلو کوردی نریێنێرە مەبۆ تەنیا پێسەو هەوڵێوە دژو کوردی تەماشە کریا، بەڵکووم ئارۆ وینمێ جە بەشیکتاش و ئەسەنیورتش قەیوم نریارە، مشۆم ئانەی وینمێ قەیوم کودەتان و دژو دیموکراسین و دەستوورو تورکیاین، پۆکەی پەنەوازا گرڏو چینەکا گلێرگەی دژو ئی کردەوە نایاساییا دەنگو وێشا بەرز کەراوە.