نوسینگەو پەیوەندییە گرڏییەکا ئەنجوومەنو سووریای دیموکراتیکی (مەسەدە) بە نامنیشانو 'سووریا و ڕوانگەو چارەسەری' یانەو ئێزدییا شارو تربەسپی پانێڵێوەش ئەنجام دا. جە پانێڵەکەنە ئەندامو ئیدارەو ڕاوەبەری سووریای، ڕیش چەرما گلێرگەی، ڕێکوزیاکا ئاشووری، ئێزدی، سریانی، ئەنداما ڕێکوزیای گلێرگە مەدەنییەکا و ئەنداما ئەنجوومەنو سووریای دیموکراتیک ئامادێ بێنێ. هەرپاسە ئاڵاو سەربەخۆبییەی سووریاو دیموکراتیکی هوردریا.

جە سەرەتانە دەقێوە پەی گەشمەرڏا شۆڕشی ڕێزگیریا و دماتەر ئەندامو کۆمیتەو پەیوەندییە گرڏییەکا ئەنجوومەنو سووریای دیموکراتیکی باقی هەمزە سڵامش جە ئامادەبییا پانێڵەکەی کەرد.

یاگە گیرو هامسەرۆکایەتی ئەنجوومەنو سووریای دیموکراتیکی جاندا محەمەد، جە سەرەتاو قسەکاشەنە باسش جە کاتو ڕژێمو بەعسی کەرد و واتش:

"چنین کەسێ کاتو ڕژێمینە کوشیێ، بڕفانریێ و گەشمەرڏێ کریێ. هەرپاسە چنی ئامای حکومەتی تازەی گەرەکما نییا ئینە جارێوەتەر  واوەی بۆوە و ژیوای وەڵین بەردەوام بۆنە. گەرەکمانە چی سیستەمەنە یەکسانی بۆنە. سیستەم بە پاو بەرژەونی گەلی ئەرەمەرزیۆرە. وینمێنە ئی حکومەتە تازەو سووریای گەرەکشا جارێوەتەر ئی سیستەمەیە زینە بکەرۆوە و پڕۆژەی چارەسەرییش پنە نییا. پەنەوازا پێسەو گەلوو سووریای بیمێ بە یەک دەس و جە واراوەرو ئی سیستەمە گڵاوەیە مدرمێوە. جە هەرێمەکامانە بە تایبەت سەرنیشتوو و وەرکەوتوو سووریای جەنگ بەردەواما، ئینەیچ وەرو ئانەین دووژمن مزانۆ کە پڕۆژەو هەرێمەکەی ئازادی و سەربەخۆبییەین. هرووژم مکەرۆ گەرەکشا ئی پڕۆژەیە تێک بداتدۆنە. هەرپاسە بابەتی فرە گرنگ پرسو گەلوو کوردین، گەرەکشا نییا کوردێ بانە بەیۆ و بۆ وێشا ژیوایێ ئازاد مەرزنارە. سیستەمو بەعسی گرڏ کاتێ گەرەکش بییەن بە هەر جۆرێ بۆنە کوردی سەڕۆوە و نەتەوەکا جە یۆی دور وزۆوە، بەڵام ئینە بە دی ناما، چونکە پڕۆژەو یەکسانی گەلا کاریگەریش جە تەمامو وەرکەوتوو مییامینی کەردەن و ئیدارەو وێڕاوەبەری پاوشیش پەی گرڏو نەتەوەکا کەردەنۆ.

دماو قسەکا بەشداربیێ هورسەنگنێکێ وێشا وەڵا کەردێوە و ئاماژەشا پانەیەدا مشۆم ژەنی جە دەستووری تازەو سووریای دیموکراتیکنە دەورێ گرنگ گێڵنانە. پانێڵەکە بە هورسەنگنای قەیرانی و ویناو ڕای چارەسەری دمایش ئاما".