دما و وەڵابییەیۆ دیمەنو کاتو گێرتەی و فاڕایۆ ئا کەسا جە ئۆپەراسیۆنو دژ بە شارەوانییەکا سەر بە شارەوانی گۆرە شارو ئەستەنبوڵینە باڵبەسێ کریێ، دەم پارتی بە پەیامێوە گېرتەیەکێش شەرمەزارکەردێ و بە 'هەراسانکەردەی سیاسی' نامێش بەرد.
جە پەنچەم ئۆپەراسیۆنو دژ بە پەنچ شارەوانییەکا جەهەپەی سەر بە شارەوانی گۆرە و شار و ئەستەنبوڵینە ٣٨ کەسێ باڵبەسێ کریێ، دما و ڕێکارەکا جە بنکەو پۆلیسینە ڕەوانەو دادگای کریێ. جە کاتو ڕەوانەکەردەیشانە باڵبەسیێکێ گرڏ دلێ تەوقە و پۆلیسینە ڕیزکریێبێنێ وێنەشا وەڵاکریانۆ. ئی کردەوێ ناڕەزایەتییێ گۆرەشا چنە کەوتۆ.
هامسەرۆکێ گرڏی پارتو یەکسانی و دیموکراسی گەلا (دەم پارتی) تولای حاتەم ئۆغوللاریە و تونجەر باقرخان جە پەیامێوەنە دیمەنو گرتنەبەرەکا پۆلیسیشا شەرمەزار کەرد، کە باڵبەسکریێکێ ڕیزێ کریانە و بار بە ترۆمبیلی گێرانە پەی ڕەوانەکەردەیشا پەی دادگای. دەم پارتی ئی کردەوێشە شەرمەزار کەردێ و بە 'هەراسنکەردەی سیاسی' نامێش ئاردێ.
تونجەر باقرخان سەر و هەژمارو ئێکسی تایبەت بەوێش پەیامێوەش وەڵاکەردۆ و ئەرەیاوناش ئی کردەوە هامشێوەو 'دادگایکەردە و ١٢ـو ئەیلولی و ئۆپەراسیۆنە قڕکەردەکا کەجەکەین' نیشانێ هەراسانکەردەی سیاسی و پاشێلکەردە و یاسایین.
لاو وێشۆ تولای حاتەم ئۆغوللاریە گێرتەی وەرو ئیسەی بە درێژکریایۆ نایاساییەکا وەڵینی هورسەنگنا و واتش: "فرە بەڕوونی وینمێش کردەوێ چی جۆرە چ جۆرە زەرەرێ یاونانە بە ئاشتی کۆمەڵایەتی. ئۆپەراسیۆنو سیاسی و هەوڵە پروپاگەندەییەکا، زەرەری فرە یاونانە بە تورکیای. مشۆم دەمودەس دمای پی کردەوا و فشارو دادوەری سەر و سیاسەتی بێنە."
