گۊهدار زێباری یۊ چا دەیان ڕۊنامەنویس و چالاکا و هاموەڵاتاو بادینانی بێ، کە ساڵەو ٢٠٢٠ هێزە ئەمنییەکاو پەدەکەی بەبێ قەراروو دادگای و بەبێ حیچ تۊمەتێوە بەڵگەداری گیریا و دادگاو هەولێری سزاو یەرێ ساڵا زینڎانىش ملەرە سەپنا.

ئارۊ دماو مەنەیۊ یەرێ ساڵا و شش مانگا زینڎانوو پەدەکەینە و دماییئامای سزاکێش گۊهدار زێباریی ئازاڎ کریا و گێڵاوە دلێ کەسوکاریش.

حەرچند سزاو گۊهدار زێباریی یەرێ ساڵێ بێ و تەمامنێبێش، وەلێ ئاسایشوو پەدەکەی زینڎاننە تۊمەتێوە تەرشا پەی وەش کەرد، کە ورگێرتەی چەکی بێمۊڵەتی بێ، پەی ئانەیچ دادگاو هەولێری سزاو شش مانگای تەریش ملەرە سەپنا، وەختێوەنە چەکەکە تاپڕێوە ساڵەو ١٩٦٠ بێ و هینوو بابایش بێ و یانەو واڵێوەیچشنە بێ.

ئڕفانای و گێرتەی ڕۊنامەوانا و چالاکا لاو پەدەکەیۊ، ڕووبەڕوو ڕەخنەی فراوانوو دلێ و میاننەتەوەیی بییەنۊ و بە هەوڵێ ئا حزبەیە پەی وەرتەسککەردەیۊ ئازاڎیی ڕابەروستەی و بەکارئاردەی دادگای پەی سەرکوتوو ڕەخنەگێرا منریۊرە.

ئیساتێنە چندین ڕۊنامەوانێ و چالاکێ بادینانی ئینێ زینڎاننە و فشارەکاو پەدەکەی پەی سەروو ئەرەیاونای ئازاڎی، ڕۊنامەواناو پارچەکای تەریچش گێرتەنۊ و نموونەی ڕۊشن، سلێمان ئەحمەد هەواڵسازوو بەشوو عەرەبی ڕۊژنیوزین کە نزیکەو ٤ مانگان پەدەکەی ئڕفانان و هەڵای ڕا بە پارێزنەراش نەدریان ویناش.