پاڕێزەر جەمال دەمیر باسش چانەیە کەرد، کە پەلامارە نەژاڎپەرسییەکۍ یاگۍ بوومەلەرزەکەینە، کوشتەی خەڵکی جە بنکە سەربازییەکانە، ئەشکەنجە و مامەڵەی نەشیا زیاڎتەر‌ۍ بیێنۍ و واتش، سەبەبوو ئینیشا سیاسەتوو سیاسەتو نەبییەی سزێن.
دماو بوومەلەرزەکەی پەلامارۍ و قۊمیایۍ کوشتەی مەنتێقەکەنە ڕووە مڎا. دیمەنوو ئانەیە وەڵا کریاوە، کە بە بانگەشەو ئانەی بۊنەو تاڵانکەرڎەی یاناوە کەسێفرۍ سزا دریێنۍ. هاتای-ینە "ئەحمەد گورەشچی" کە بە بانگەشەو 'تاڵانکاری' فاڕیابێوە پەی بنکەو جەندرما و چاگە مەرڎە بۍ. جە تۊکاریشنە بەر کەوتەبۍ، کە لووتەو گورەشچی مەڕیێنەو ونی یاوێنە لاو مەژگیش. ئاشکرا بی، یاگۍ دایوەنەی سەروو جەسەو برایۍ ئادیوە بە نامۍ "سەبری گورەشچی"یوە بۍ.
پارێزەر "جەمال دەمیر" سەبارەت بە فرەبییەی پەلامارەو نەژاڎپەرستی دماو بوومەلەرزەکەی، بۍ سزا و نەجاتبییەی تاوانبارا، ئەشکەنجە و مامەڵەی نەشیا و قسێش پەی بۊ ئاژانسوو هەواڵوو فورات (ANF)ی کەرڎۍ.
دەمیر سەرنجەش پەی بۊ ئانەی کێشتە، کە ئەشکەنجە و مامەڵەی خراپوو کاربەدەسە ئەمنییەکا، جە ئەرەیاونایەکانە وەڵا کریێنۊ و واتش، "ئا پەلامارۍ بۊنەو نەبییەی مافی و یاسێوە دریێنۍ. گرد کەس زانۊ کە دەسەڵاتوو ئیسەی چی ساڵاو دمایینە بە سیاسەتوو نەژاڎپەرستانەو ویش درێژە بە دەسەڵاتداریی وێش مدۊ".
وەروو ئانەی بکەرۍ وێزیاوە، مشۊم گنا جمووجووڵۊ
"دەمیر" باسش چانەیە کەرد کە مشۊم داواکاریی گرڎین دەمودەس دەس بە وەنەپەرسایۊ کەرۊ و تۊمەتبارا دەسنیشانۍ کەرۊ و ئانەی سەرش پیویسا کەرۊش. حەرپاسە واتش، "ئەگەر دەوڵەتێوە بانگەشەو ئانەی کەرۊ کە دەوڵەتێوە یاسایین، مشۊم سەرەتا پابەنڎوو یاسایەکاو وێش بۊ. مشۊم یاسا دژوو بکەراو ئا تاوانی گنا جمووجووڵۊ".
"دەمیر" ئاخروئۊخروو قسەکاشنە واتش، "سەرباروو ئانەی مزانیۊ وڵاتەکە ئینا سەروو خەتەو بوومەلەرزەیۊ و وەڵتەر بوومەلەرزۍ فرۍ کەوتێنۍ، دەسەڵاتداری وڵاتڕاوەبەر، تا ئیساتۍ ڕاکاری پیویسش نەگێرتەنرە وەر، گەرەکش بە یاواینەی بیناسازی سەروو بنەماو رانت و بەرتیلی ئا وڕایرەیە زیاڎتەر کەرۊ. دماو بوومەلەرزەکەی جە وەختوو وێشنە دەستوەردای نەکریا، وەنەقۊمیایا بوومەلەرزەکەی بەتەنیا جێی ئازیۍ. دماو کارەساتەکەو ئی دمایە، ئێمە ڕووبەڕوو وڕیایرەی و قەیرانوو دەوڵەتی بییەیمێوە. چەنی ئانەی وەختوو وێشنە دەس نەیاوا فریای، دەسوو هامکاری نەیاوا خەڵکی، ڕێکوزیایە مەدەنییەکۍ ئەرەمەرزیۍ میاننەتەوەییەکۍ ڕاشا وەنە گیریا".
س.ز
