ڕێکوزیاو مافەکا مرۆڤو هەرانای و سەرچەمە میدیاییەکا تەری ئەرەیاۋناشا، دووۍ ژەنۍ جە ئێرانەنە سزاو زینانیی کەردەیشا سەرەرە سەپیا و یەرۍ ژەنۍ تەریچ باڵبەسۍ کریۍ.

جە هەواڵەکانە ئامان: " ڕۆیا ساباتە ژەنێوە بەهایی خەڵکەو شیرازی و ئەرەنیشتۍ ئیماراتی بە تۆمەتو”هامکاریکەردەی هاموڵاتیا و حکوومەتو ئیسرائیلی، شێونای ئەمنیەتی نەتەوەیی و  پروپاگەندەی دژو دۊڵەتی” جە لایەنو لقو یووەم و دادگاو شۆڕشو شیرازیوە سزاو ٢٥ ساڵا زینانییکەردەی، دووۍ ساڵۍ قەڎەغەکەردەی بەرشیەی جە وڵاتی، هۊرشێونایۆ پاسپۆرتی، بێبەشکەردەی جە مافە کۆمەڵایەتییەکا و قەڎەغەکەردەی چالاکی جە پالیانە کۆمەڵایەتییەکاش سەرەرە سەپیان. سزاكۍ جە ڕۊو ٢٨ـو ئایارو ئێساڵینە بە ڕۆیا ساباتۍ ئەرەیاویېان."

جە بەردەوامیینە ماچۆ: " ڕۆیا ساباتە ماوەو ٢٣ ساڵان جە ئیماراتەنە مژیوۆ و جە ٤و کانوونو دووەمو ٢٠٢٤ پەی چەمڎاری ئەڎاو تاتەیش، کە نەوەشۍ بێنۍ، گەشتو شیرازیش کەرڎ، بەڵام جە لایەنو وەزارەتو ئیتلاعاتو ئێرانیوە باڵبەسە کریا و دماو حۊت مانگا جە زینانو عادل ئابادینە جە شیراز بە شێوێوە کاتی ئازاڎە کریا. یەرۍ ژەنۍ بەهایی تەرۍ بە نامەکا شەیدا ڕۆحانیۍ، شیدە تەواکوڵیۍ و شیلا تەواکوڵیۍ جە لایەنو هێزە ئەمنییەکا ئێرانیوە بە بێ ئەمرەو دادوەری باڵبەسۍ کریۍ و تا ئیساتۍ چارەنوویسشا نادیارا."

پەلیانێوە هەواڵی تەریچ ئاماژەش بە سزادای ژەنێوە کەردەن و ئامان: " مەهشید گۆهەریە توێژەرە و نوویسەرە و مامۆسای وەڵینەو زانشتگەو فێردەوسی بە تۆمەتۊو”پروپاگەنڎەی دژو دۊڵەتی” جە لایەنو لقو یووەمو دادگاو شۆڕشو مەشهەدیوە سزاو نۆ مانگا زینانییکەردەیش سەرەرە سەپیا. ئا ژەنە مامۆسۍ بە مەڵامەتو چالاکییە ئەدەبی و ڕۆشنیرییەكاش و پەشتیوانیکەردەی جە پۊشای جلوبەرگی ئارەزوومەندانەی و پاڵپەشتیكەردەی جە خۊنکارا ناڕازی جە ئاخێزو”ژەنی ژیۋای ئازادیی” جە زانشتگەنە جە پیشەکەیش دورە وزیێنۆ."