جە نامێوە هامبەشەنە دەیان مامۆسۍ ئایینیۍ کوردی دژوو سەپناو سزاو جە قەنارەدای سەروو محەمەڎ خزرنەژاڎیرە مامۆساو ئایینی خەڵکوو بۆکانی مرداۋە و سەرەڕاو رەڎکەردەیۆ ئا تۆمەتا ئاراسەش کریێنۍ، داواو ئازاڎکەردەیش کەرا.
جە نامێوە هامبەشەنە کە جە تەرەفوو ٢٤٢ مامۆسایا ئایینیۆ جە شارە جیاجیاکا ۋەرکەوتوو کوردسانینە ئاراسەو دەسەڵاتی دادوەری ئێرانی کریان، سەپنای سزاو جە قەنارەدای سەروو مامۆسا محەمەڎ خزرنەژاڎیرە بە نادادپەروەرانە نامۍ بریان.
سەبارەڎ پانەی دەسەڵاتوو دادوو ئێرانی ئا مامۆسا ئایننیە کوردەش بە ئەندامیەتی جە گروپە تنڕەوەکا پێسە داعشی، تۆمەتبارکەردەن و پا مەڵامەتۆ سزاو جە قەنارەدایش سەرەرە سەپنان، ئا مامۆسا ئایینیۍ جە نامەکەشانە جەختشا جە میانڕەوی محەمەد خزرنەژاڎی کەردەنۆ و ئەرەیاۋنانشا، سەپنای ئا تۆمەتۍ سەرشەرە "دروێوە ئاشکرا و بێبنەمانە" و خەڵکوو مەنتیقەکەیچ شایەتی سەروو میانڕەوی ئا مامۆسا ئایینیە مڎا.
ئا مامۆسا ئاینیۍ ئاماژەشا پانەیچ کەردەن، کە بە پاو یاسای ئشیۍ محەمەڎ خزرنەژاڎ جە دادگایۍ تایبەت بە مامۆسایا ئایینی و بە شێوەی ئاشکرا دادگایی کریۍ، بەڵام جە دادگایۍ ئاخێزینە و جە ئەرەنیشتێوە وزیایرەنە دادگایی کریان، کە ئینەیچ پێچەوانەو یاسایا.
ئا ٢٤٢ مامۆسا ئایینیۍ ۋەرکەوتوو کوردسانی داواشا جە دەسەڵاتوو دادوەری ئێرانی کەردەن، دۆسیەو ئا مامۆسا ئایینیە گێڵنۊوە پۍ دادگای تایبەت بە مامۆسایا ئایینی و سەرجە نۆ بە دادگاییکەردەیۍ دادپەروەرانە، ڕا پۍ ئازاڎ کەردەیش وەش کریۆ.
محەمەڎ خزرنەژاڎ، مامۆسای ئایینی تەمەن ٤٥ ساڵ خەڵکوو بۆکانیا کە جە میانوو سەرهۊردای ئاخێزوو ''ژەنۍ، ژیۋای، ئازاڎیی''نە و دمابەدماو پێشکەشکەردەی وتارۍ جە تەعزیەو یۆ جە گیانبەخشایا ئا سەرهۊرداینە گیریابۍ، لە ماوەی وییەردەنە بە تۆمەتەو "خراپەکاری سەروو زەمینیۆ"و، زەرەر یاونای بە یەکپارچەیی و سەربەخۆیی وڵاتی" و "پرۆپاگەنڎە دژوو دەسەڵاتی" جە تەرەفوو لقوو یەرۍ دادگاو ئاخێزیۆ جە ورمێ سزاو جە قەنارەدای و ١٦ ساڵا زینڎانیش سەرەرە سەپیابۍ.
