پاشێلکەردەی مافو زینانیا سیاسی جە گێرتەخانەو ژمارە ٢ې ئاسایشو باڵاو خارپێتی بە سەختەرین شێوە بەردەواما. ئی پاشێلکاریې جە گوزارشتەو ڕێکوزیاکا مافو مرۆڤیچەنە تۆمارکریان و ئاماژە پانەی کریان بەشێوێوە سیستەماتیک ئەشکەنجە، دایوەنەی، هەڕەشې، دماوستەی وەردایشا و گۆشگیری جە دژو زینانیا سەپیۆنە. دژو ئی پاشێلکارییا زینانیا خارپێتی ماوەو حەفتێوەن مانیشا جە واردەی گێرتەنە.

یۆ جە زینانیا گێرتەخانەکەی، لوقمان ئاسڵانا کە ماوەو ٢٦ ساڵان ئینا زینانەنە، جە ڕاو تەلەفونیوە بە بنەیانەکەیش ئەرەیاۋنان، بە مەڵامەتو ئەزیەتکەردەی و مامەڵەی خراپو ئیدارەو گێرتخانەکەیۆ کە گرڎ جۊرە تنووتیژیێوە بەکاربەرانې، پېسە ناڕەزایێوە مانگێرتەی جە واردەیشا دەس پنەکەرڎەن.

چا بارۆ بنەیانەو ئاسڵانی ئەرەیاۋناشا، ئەشکەنجە و ستەم کەردەی دژو زینانیا بیەن بە ئاژێوە کاریگەری مەترسیڎار و واتشا ژیۋای لوقمانی و زینانیا تەری تەرسی جدیشا ئینا سەر. بنەیانەکە داواشا جە دەم پارتی و ڕێکوزیا مەدەنییەکا کەرڎ جە دژو ئەزیەتکەردەی و مامەڵەی خراپی دژ بە زینانیا کۊششەکاشا دەس پنەبکەرا و شۊنیرەلوای پەی مژارەکەی دەسپنە بکەرا.