سیاسەتمەدارو کورڎی خەتیب دیجلە جە فێستیڤاڵی مېیاننەتەوەیی کەلتووری کوردینە جە فرانکفۆرت قسێش کەرڎۍ، ناڕەزایش نیشانەدا سەبارەت بە بێدەنگی مېیاننەتەوەیی ۋەرا ۋەر بە گۆشەگیری داواش جە گرڎ لێوە کەرد کە دەمودەس دژو گۆشەگیری هەنگامە بنیا.
٣٢ەمین فیستیڤاڵو کولتوری مېیاننەتەوەیی کە گۆرەتەرین مەراسیمو کولتوری کوردان جە ئۆروپا، ئێساڵ بە دروشمەو "گۆشەگیری و ئەرەگیری ماڕمێنە، رابەر ئاپۆی ئازاڎ مکەرمۍ" بە جۆشو خرۆشێوە گۆرۆ بەردەواما.
فێستیڤاڵەکە بە وتەو هامسەرۆکەو کەنەکەی زەینەب مورادی و سیاسەتمەدارو کوردی خەتیب دیجلەی دەسشپنەکەرڎ.
زەینەب مورادە: ژەنی ژیۋای ئازاڎیی بیەن بە سەرچەمەو ئیلهامی
زەینەب مورادە بە شێوەزاری کوردی کەلهوڕی قسێش کەردۍ، ئەرەیاۋناش سڵامو گەلوو ۋەرکۊتو کورڎەسانی بە ڕابەروگەلوو کوردی عەبدوڵا ئۆجالانی میاونو.
زەینەب مورادە ئەرەیاۋناش بە فەلسەفەو ڕابەرو گەلوو کوردی عەبدوڵا ئۆجالانی، گەلوو کوردی ئەرەکۊشای گۊرەش کەرڎەن و مڎرامانێوە گۆرەش وەڵێوستەن.
ئاماژەش پانەی کەرد گەلوو ۋەرکۊتی بە درووشمەو "ژەنی ژیۋای ئازاڎیی" کە فەلسەفەو ڕابەر عەبدوڵا ئۆجالانیا، بیەن بە سەرچەمەو هیوای پەی گرڎو جمیەرەکا ژەنا جە جەهانەنە.
هەرپاسە سەرنجش وست سەرو هرووژمەکا دۊڵەتو ئەرەگیرو تورکی پەی سەرو پانیشتوو کورڎەسانی، واتش: "گەلەکەما دەورو ڕابەر ئاپۆیرە کۆبیەنۆ و جە چوار پارچەو کورڎەسانی سەرو خاکو ۋێش بە شکۆ و ئازاڎی مژیۋۆ. جەنگەوانا ئازادی ئارۆ بە فەلسەفەو ڕابەر ئاپۆی گرڎو هرووژمەکا دژمنیشا پووچۍ کەردێنۍ. پېسە گەلوو کوردی خاوەنداری جە بەهاکاما و کەلتوورو ۋێما مکەرمۍ و ئازاڎۍ بیمۍ".
خەتیب دیجلە: هەڵمەتەکۍ سەرکۆتە
خەتیب دیجلە ئەرەیاۋناش هەڵمەتەو "ئازادی پەی عەبدوڵا ئۆجالانی، چارەسەری سیاسی پەی پەرسو کوردی" سەرو ئاستو جەهانی سەرکۊتەیۍ گۊرەش بەدەسئارڎەن، واتش: "ڕابەر ئۆجالان بە پارادایمە تازەکەیش نەک هەر ڕابەرو گەلوو کوردین، بەڵکم سەرو ئاستو دنیێنە زیهنیەتێوە دیموکراتیک و ئیکۆلۆژیک و ئازادیپارێزو ژەناش وەڵێوستەن. ئی هەڵمەتۍ جە لایەنو پارتە دۆسەکا و گەلوو کوردیۆ بەگەرمی پێشوازیش ۋنە مکریۆ".
هەرپاسە ئاماژەش پانەی کەرد بە بێدەنگی ڕێکوزیا مېیاننەتەوەییەکا ۋەرا ۋەر بە گۆشەگیری، واتش: "بێدەنگبیەی ۋەرا ۋەر بە سیاسەتەکا قڕکەردەی دۆڵەتو تورکی جە ئیمراڵینە بە ماناو پەشتگۆش وستەی و چەمپۊشین جە تاوانەکا دژ بە مرۆڤایەتی".
ڕەخنەس جە بێدەنگی ئەرەمەرزیا مېیاننەتەوەییەکا گێرت و سەرنجش وست سەرو ئەرک و ۋەرپرسیاری ئەرەمەرزیاکا دادگاو مافەکا مرۆڤو ئەوروپای و یۆبیەی ئەوروپای و کۆنسەو ئەوروپای.
جە دما دماینە واتش: "دیسان داواتا ۋنە مکەرو، چی ڕوانگۆ هەنگامەی دەمودەسیە بنیەیدۍ! بزانا کە ئێمە بێدەنگۍ نمەبیمۍ. ۋەرا ۋەر بە ڕژێمو قڕکەردەی ئیمراڵی، بە پاگیریۆ یاسا و بەها مرۆڤایەتییەکا پارێزنمۍ".
فێستیڤاڵەکە بە گۆرانیەکا هونەرمەڼ شەهریبان کوردی بەردەوام بی.
