ئا فیدایۍ کە خولوو پەرۋەرڎەیشا جە ٣٠ حوزێرانینە تەمام کەرد، جە مەراسیموو بەرشیەیشانە ئەرەیاۋناشا، "جە هەر شۊنێنە هرووژم بکریۆ سەرو گەلەکەیما، ئېمە چا بیمۍ و بە ڕېبازوو زیلانۍ سەرۍ گنمۍ".
فیداییا ئاپۆیی جە کەشەکا کورڎەسانینە خولێوە تازەی پەروەردەیشا بەشێوێوە سەرکەوتانە تەمام کەرد.
فیداییا کە جە ساڵیاڎوو چالاکیە فیداییەکەو فەرماندۍ نەمرێنە زیلان (زەینەب کناجی)نە جە ٣٠ حوزێرانینە دەورەی پەروەردەیشا تەمام کەرد، مەراسیموو بەرشیەیشا سازکەرد.
فیداییا کورڎەسانی کە شۊنکۊتۍ و رێوگارۍ رێبازو فەرماندۍ نەمرۍ زیلانېنۍ، دماو تەمامکەردەی خولی پەروەردەیی بە سەرکەوتانە ڕووەشا کەردە مېڎانەکا ۋێشا.
گەریلا فیداییەکۍ جە مەراسیموو بەرشیەیشانە باسشا چی مژارا کەرد.
'رۆحی فیدایی ئاپۆیی حەجگیز گوم نمەبۆ'
"ئارۆ ٢٨ەمین ساڵیاڎوو گەشمەرڎەبیەو هەمڕا زیلانێن. هەمڕا زیلانە دژوو پیلانگێڵنی جە شام پېسە ۋەرپەرچدایۆ جە ٣٠ حوزێرانو ١٩٩٦ ینە چالاکیێوە گیانبازیش کەرد. هێزە دەسەڵاتدارە هەژمونگەراکۍ جە کەسایەتی رابەرایەتینە گەرەکشابۍ گەلەکەیما و جمیەری ئازاڎیما دلېنەبەرا. بەڵام هامڕا زیلانە بە چالاکیە گیانبازییەکەیش بە پەیاموو ئانەی رابەرایەتی بە تەنیا نییا، گەریلا فیداییەکۍ ئینۍ پەشتەو رابەرایەتیوە و گرڎ کاتۍ پەی گرڎ چێوۍ ئاماڎێنۍ، دوژمنش کەرد ئامانج. پا چالاکیە پەیاموو ئانەیش دا کە گەریلا گرڎ کاتۍ جە دژوو هرووژمەکا سەرو رابەرایەتی ئامادێنۍ، بە دۆس و دوژمنی ئەرەیاۋییا. جە ٧و حوزێرانینە هەمڕا گوڵانە (فلیز یەرلیکایا) و جە ١٧و حوزێرانینە هەمڕا سەما یوجە پېسە ڕێوگارۍ رێبازوو زیلانۍ گەشمەرڎۍ بیۍ. گەشمەرڎۍ سەما واتش، 'پېسە چنی جە ئاسمانەکانە دووۍ ۋەرۍ بیەیشا نمەبۆ، پەی ئێمەیچ تەنیا رابەر ئاپۆ هەن، جگە چاڎیی ئێمە هیچ چێوۍ تەر قبوڵ نمەکەرمۍ'. هەمڕا زیلانە واتش، 'وەشڵەی جە گیانیم بەقیمەتتەر چێوۍ تەرم بیەبیۍ پەی ئانەی فیدام بکەردۍ'. هەر یەرە سەرمەشقە فیداییەکېما، بە چالاکی و واچۍ و گەشمەرڎەبیەو ۋێشا، نیشانەشا دا کە رۆحی فیدایی ئاپۆیی حەجگیز گووم نمەبۆ و مەسەڕیۆوە.
'ئەرکەکەیما میاونمۍ مەنزڵ'
ئارۆ کناچۍ و کوڕا کورڎەسانی جە هەرێمەکاو پارێزنای مەدیاینە جە هێڵۆو زیلانێنە پېسە زیلانەکا جەنگ مکەرا و جە سەنگەرەکاو جەنگینە ۋێڕاگری مکەرا. بە ئازایەتی و ئیراڎێوە بەرزۆ هرووژمەکا دوژمنی دلێنەبەرا. هەمڕایاما جە مەڕەکا جەنگینە جە زاپ و مەتینانە دژوو گرڎ جۆرە تەکنەلۆجیێوە دوژمنی، هرووژمە زەمینی و ئاسمانیەکا و بەکارئارڎەی چەکی کیمیاویی مڎرامانی بێهامتا ئەنجام مڎا. بەچالاکیەکاشا بەردەوام مزانی مڎا بە گەلەکەیما. پېسە هەمڕایا ئاڎیشا، ئێمە گرڎ ۋەرپرسیاریۍ جابەجێ مکەرمۍ کە گنۆنە ئەستۆما.
'بە شێوازو زیلانۍ گژیەیمۍ و سەرکەوتەی مسۆگەر مکەرمۍ'
هرووژمەکۍ دوژمنی جە دژوو گەلەکەیما و هامڕایاما جە زینڎانەکانە، ئارۊیچ بەردەوامێنۍ. گرڎ ڕووۍ خەڵکە وڵاتپاڕێزنەکەما جە جاڎەکانە تیرۆرۍ مکریا، ئەڎایاما جە جاڎەکانە عەزیەت مکریا، جوانەکېما کوشیانە. بە گەلەکەیما ماچمۍ؛ شمە تەنیۍ نیەندۍ، گەریلاکێتا ئینۍ پەشتیتاوە، ئێمە گرڎ ڕووۍ ئاماڎێنمۍ. چکۆ هرووژم بکریۆ سەرو گەلەکەیما، پەی ۋەرپەرچدایۆ ئێمەیچ چا بیمۍ. ئێمە بە دوژمنیچ ماچمۍ کە گەلەکەما بەتەنیا نییا، ئێمە بە شێوەو زیلانۍ جەنگ مکەرمۍ و سەرۍ گنمۍ. ئێمە ئا قەولەیە بە گەلەکەیما و هامڕایاما مڎەیمۍ، بەتایبەتی ئانۍ کە جە زیڼانەکانە ۋێڕاگری مکەرا. ئێمە پېسە هەمڕایا هەورێ، دۆغا، جوان و ئاندۆکی کە جە هەرێمەکاو پارێزنای مەدیاینە بە رۆحوو زیلانۍ ژیۋۍ، سەرکەوتەی مسۆگەر مکەرمۍ. ئێمە جە دما دماینە ماچمۍ: سەرکەوتەی پەی ئێمەن، سەرکەوتەی پەی گەلەکەیمانە، سەرکەوتەی پەی گرڎیمانە".
گەریلا فیداییەکۍ دماو قسەکاشا بە دروشمەکا "بژیۋۆ سەرۆک ئاپۆ". "بە گیان بە ۋنی، ئینایمۍ چنیت ئەی سەرۆک"، "بێ سەرۆکی ژیۋای نمەبۆ"، "ژەنی، ژیۋای، ئازاڎیی" و "بژیۋۆ پارتوو کرێکارا کورڎەسانی"یشا واتێوە و بەرەو مېڎانەکاشا کۊتۍ ڕا.
