دژوو لەشکرکێشی و کۊششە ئەرەگیریەکا و بۆردوومانەکا دەوڵەتو ئەرەگیروو تورکی پەی سەرو پانیشتوو کورڎەسانی، وێرەگاو ئارۆی شارو ڕانیەینە، بە دەسوەڵێوستەی گرووپوو کۆشانی و بە بەشداری هاموڵاتیا و توێژە جیا جیاکا گلېرۆبیەیۍ جەماوەری کریا.

بەنامۍ گرووپوو کۆشانیۆ، خەدیجە موسا ئەرەیاۋنێوەش ۋەناوە، جە سەرەتاو ئەرەیاۋناکەینە ئاگاڎیی دریا بە دەسەڵاتداراو بەغڎای و هەرێمی و ڕای گرڎی دلېینەی و جەهانی دەربارەو ئاستوو مەترسییەکا لەشکرکێشییەکەی و وچیا: "تا مۍ ئاستوو مەترسییەکا سەرو مەنتیقەکەی ئینا بەرزبیەیۆنە بەتایبەت جە لایەنوو ئەرەگیراوە و پەنەوازا دەنگ هۊربڕا".

تەئکیدکریاوە ئامای دلۍ سوپاو ئەرەگیروو تورکی و نیایرەو بنکە و بارەگا و نوقتۍ وشکنای، ئەرەگیرکەردەو ئاشکراو پانیشتوو کورڎەسانیا، وچیا: "هەڵای هێزە سیاسییەکاو پانیشتوو کورڎەسانی جە چوارچيوەو بەرێوە یۆگێرتەینە ۋێشا ڕێکنەوستەن، کە ئینەیچ زیاتەر ڕا وەشکەر بیەن پەی هرووژم و ئەرەگیریەکا".

جە دما دمایی ئەرەیاۋناکەینە داوا جە گرڎ لێوە کریا: "جە ئاستوو ئا پاشێلکاریی، ئەرەگیری و هرووژمانە بێدەنگۍ و بێهەڵوێسۍ نەبا و سنوورێوە پەی ئەرەگیری بنیارە، حەرپاسە مشۆم دەوڵەتو عێراقی پېسە پارېزنای سەروەری خاکی و خەڵکوو کورڎەسانی هەڵوێسوو ۋێش جە ۋەرا ۋەروو هرووژمەکا دەوڵەتو تورکینە نیشانە بڎۆ و هەوڵبڎۆ پەی دووروستەیۆ سوپاو تورکی پەی ئەو ڎیموو سنوورەکا و تێکەڵ نەبۆ جە هیچ ڕێککەوتەیۍ پیلانگێڵنیی دژوو هەرێموو کورڎەسانی".