سەرسەعبو ئارۆی هۆڵوو مۆنۆمێنتوو گەشمەردانە جە پارێزگاو هەڵەبجەی بە سەرپەرشتی ئەرەمەرزیاو کەریموو عەلەکەی چوارەمین دیڎاروو ڕۆشنویریی هەورامانی، خولوو جیهان ئارا خانمێ پاوەیێ دەسش بە هەرمانەکاش کەرڎ، کە دیڎارەکە تایبەتەن بە ڕۆشنویریی هەورامانی و پەرسەکاو سرووشت و ئەدەب و زوان و تارێخ و جوگرافیاو هەورامانی.

سەرەتاو مەراسیمەکەی بە واچەو ئەرەمەرزیاو کەریمو عەلەکەی جە لایەنو مامۊسا سارێوە دەسش پنەکەرڎو دماتەر شاخەوان سدیق واچەو سەرپەرشتیارو دیڎارەکەیش پێشکەش کەرڎ.

یاگۍ ئاماژەینە کە دیڎارەکەنە چڼین کۆڵیارۍ پانیشتی و وەرکەوتوو کوردەسانی بەشدارێنۍ، ئامانج جە دیڎارەکەیچ لاکەردەیوەن وەنەو کولتووروو هەورامانی و پارێزنایش و بە زانستی ئەرمانایش.

تەمامو دیڎارەکەی جە یەرۍ پانێڵا پێکمۍ کە پی جۆرەنە:

پانێلی یووەم: ڕاوەبەرو پانێلی- شاخەوان سدیق.

١- شیکاریێوە ئۆنتۆلۆژییانە پەی مەعناو هەورامی و هەورامیبیەی؛ "د. لهۆن قادر عبدالرحمن".

٢-هۆنیەی ژەنانێ و هۆنیۍ پەی ژەنا؛ "ئاوێنە ئەحمەدی"ە.

٣-کوڵەداستانێ هەورامیێ؛ "سابیری عەزیزی".

٤-دەسنیشانکەردەی گونجیاتەرین شۆنۍ پەی پەرەپنەداو گەشتوگوزاری جە ناوچەو هەورامانینە؛ "د. ڕێباز لوقمان مستەفا".

پانێلی دووەم: ڕاوەبەرو پانێلی- د. دیلان سەلام فەرەج.

١-مەموزین بەهەورامی، سەرگوزشتەو دووێ دەسنویسا؛ "نامق هەورامی".

٢-تاریخو ژیۋای جە هەورامانەنە، بەپاو بەڵگە ئاسەوارییەکا؛ "م. یوسف باقی عبدالقادر".

٣-قۆناغەکاو نەریتبەزنای و تابۆماڕای جە ڕەوتوو شیعرەو ژەنە هەورامیواچەکانە؛ "ڕەئووف مەحموودپوور".

پانێلی یەرەم: ڕاوەبەرو پانێلی-سوهەیب فاروق

١-کاریگەریی ڕازۍ و داستانۍ و هۆنیۍ جە بیەی نەتەوەیینە؛ "ئەیوب کوێخا ڕۆسەم".

٢- بنەماو خولقنای میلۆدی ئاهەنگسازییەنە؛ "ئەرشەد یامەولا".

٣-ئاوی و ئاوەڎانیی هەورامانی ۋەردەمو هەژموونو ڕاگواستەی و جیهانگیرینە؛ "د. ئیبراهیم حاجی زەڵمی".