بە پاو گوزارشتەو ئاژانسوو هەواڵوو هاواری (ANHA)، گلېرۊبیەو شاندو ئیدارەو ۋېڕاوەبەری سەرنیشت و ۋەرکۊتوو سوریای و شاندو حکومەتو کاتی سوریای جە دیمەشقەنە دمایش ئاما. بەپاو زانیارییەکا، شاندەکۍ هەردووەلای سەبارەت بە گلېرۊبیەکەی بەیاننامێوە هامبەش ئەرەیاۋنا.

جە میانو دیڎارەکەینە، پەی تاوتوێکەردەی میکانیزمەکا جابەجێکەردەی ڕێککەوتەی ١٠و ئاداری  کە جە ما بەینو مەزلوم عەبدی فەرماندەو گرڎیی هێزەکاو سوریای دیموکراتی (قەسەدە) و حکومەتو دیمەشقی ئیمزا کریا، باس سەرو پلانەو چالاکی هامبەشی کریا.

بەپاو زانیارییەکا هەمان سەرچەمەی گلېرۊبیەکەی ئەرێنی بیەن. شاندەکۍ باسشا جە گرنگی خێراکەردەی جابەجێکەردەی بڕگەکاو ڕێککەوتەی ١٠و ئاداری و وەشکەردەی کۆمیتێوە هامبەش و فایلو ڕائاوردەی کەرد.

شیاو باسیا وەڵۍ ئی گلېرۊبیەینە، یەرۍ گلېرۊبیۍ جە مابەینو لایەنەکانە لواڕاوە. گلېرۊبیەی یووەم جە ١٩و ئاداری و گلېرۊبیەی دووەم جە ١٢و نیسانی و دمایین گلېرۊبیەیچ سەردای شاندو دیمەشقی بۍ پەی کەمپو هۆڵی.

شاندەکەو سەرنیشت و ۋەرکۊتوو سووریای کە جە ١٢و نیسانی بنیاڎ نریا بۍ جە فۆزا یوسفە، ئەندامۊو دەسەو ڕاوەبەری پەیەدەی، عەبدولحامد هەمباش هامسەرۆکو پارتو سووریای دما ڕۊی سەنحاریب بەرسوم هامسەرۆکو پارتو یۊبیەی سریانی، ئەحمەد یوسف هامسەرۆکو دەسەو دارایی جە ئیدارەو ۋێڕاوەبەری، سۆزدار حاجیە، ئەندامۊو کۆنسەو ڕاوەبەری (یەپەژە)ی، مریەم ئیبراهیمە هامسەرۆکۊو دەسەو کاروباری کۆمەڵایەتی و کرێکارا جە ئیدارەو ۋێڕاوەبەری، یاسر سلێمان یاگەگیرو هامسەرۆکایەتی ئەنجوومەنو گەلا دیموکراتی جە سەرنیشت و ۋەرکۊتوو سووریای، پێکئامابۍ.

نوێنەرایەتی دیمەشقی پێکئاما بۍ جە محەمەد قەناتری یاگەگیرو نووسینگەو ئەمریکای جە وەزارەتو جبەرو سووریای، عەبدولغەنی محەمەد ڕاوەبەرو ئاسایشو پارێزگاو حەلەبی، مەسعود بەتاڵ ۋەرپەرسو دۆسییەو عەفرینی جە ڕاوەبەری ئاسایشو دلېینەی، زیاد فەواز عایش یاگەگیرو وەزیرو دلېینەی پەی کاروباری مەدەنی.