ئا هەڵمەتۍ جەلایەنوو پلاتفۆرمی ئازاڎیی پۍ عەبدوڵا ئۆجالانی چارەسەری سیاسی پۍ پەرسوو کورڎی جە ٧٤ شارۍ جەهانینە دەسش پنە کەرڎ، جە سەرنیشت و ۋەرکەوتوو سوریای دەنگش داوە.

دەسوەڵېوستەی گەلوو سەرنیشتی و ۋەرکەوتوو سوریای دەربارەو ئی مژاریە، جە مېڎانوو گەشمەرڎا ١٢ و ئاداروو قامیشلۆی بە زۋانی کورڎی و عەرەبی ئەرەیاۋنېوە چاپەمەنیش پێشکەش کەرڎ. ئەنڎاما ئیدارەو ۋېڕاوەبەری، ڕاوەبەر و ئەنداما ڕێکوزیا مەدەنی و گلېرگەییەکا، پارتە سیاسییەکا، ڕیش‌چەرمۍ عەشیرەتە کورڎیی و عەرەبییەکا، ڕێکوزیاکا ژەنا و گەنجا، تەڤدەم و سەڎان کەسۍ بەشڎاریشا جە چالاکییەکەنە کەرڎ.

ئەرەیاۋناکەی بە زۋانی کورڎی جە لایەنوو ئەنڎامەو دەسوەڵېوستەی گەلی حەنا خەلیلۍ، بە عەرەبی جە لایەنوو ئەنڎاموو دەسوەڵېوستەکەی ئەنوەر ئەلئەسیریۊ، ۋنیاوە. چنەشەنە باس چانەی کریا، جە ٧٤ شارۍ جەهانینە هەڵمەتەکۍ دەسش پنە کەرڎەن، دەسوەڵېوستەی گەلوو سەرنیشتو و ۋەرکۊتوو سوریایچ بەشڎاری هەڵمەتەکېش کەرڎەن.

جە درێژەو ئەرەیاۋناکەینە ئامان، ملۋېنان کورڎۍ ڕابەروو گەلوو کورڎی عەبدوڵا ئۆجالانی پېسە ئیراڎەی سیاسی ۋېشا مویناش و وچیا "حەرپاسە عەرەب و سریانی و فرەو کەسی جە مەنتیقە جیاجیاکا جەهانینە بە ڕابەروو ۋېشا نامېش بەرا؛ پېسە چارەسەرێوە پۍ قۊرتەو گەلە چەوەسیاکا، گرووپە ئیتنیکی، ئایینی، مەزهەبی، زایەندی، ئیکۆلۆژی و نایەکسانی تەماشە کریۊ. پۊکەی پېسە ڕابەریوو گەلا قبوڵ کریۊ".

جە ئەرەیاۋناکەنە سەرنج وزیان سەر ووگۆشەگیری و پېسە ئامان: "ڕووبەڕوو ئەشکەنجەی و هەرمانەی نا ئینسانانۍ بۊوە. سەرەڕاو ئینەیچ، فەلسەفەو ڕابەر عەبدوڵا ئۆجالانی ئیلهامبەخش بیەن پۍ ئا گرڎ بازنا شۊنەو چارەسەریرە گېڵا، پۊکەی دۆزوو ئازاڎیی ڕابەر عەبدوڵا ئۆجالانی دۆزێوە جەهانیین، جە سەرانسەروو جەهانی، پارت و ڕێکوزیا و ئەرەمەرزیا و کەسایەتیەکۍ بەشڎاری چالاکییەکا کەرا". 

باس چانەی کریان، پەرسوو کورڎی، پەرسێوە میان نەتەوەیین، ماچۊ "مافە سیاسی و چاندییەکۍ کورڎی پاشێل کریېنۍ، کۊکوژ کریان، ملۋېنان کورڎۍ کۆچبەر کریېنۍ. ئا هەڵمەتۍ کە دەسش پنەکەرڎەن ئینا سەروو ئاستوو جەهانینە، ئەگەر ڕابەر عەبدوڵا ئۆجالان ئازاڎ کریۊ جە گرڎ کەسۍ زیاتەر سەرمەشقی کەرۊ پۍ جابەجێکەرڎەی ئازاڎیی و ئاشتی. پۊکەی مشۊم ڕابەر عەبدوڵا ئۆجالان ئازاڎ کریۊ، ئاژېوە گونجیا ڕەخسیۊنە تا بتاۋۊ دەوری سیاسی ۋېش گېڵنۊ و قۊرتەو کورڎی و ۋەرکەوتوو میامینی چارەسەر کەرۊ.

جە دمادمایی ئەرەیاۋناکەینە ئامان، پی بۆنۊ، دەسوەڵېوستەی گەوو سەرنیشتی و ۋەرکەوتوو سوریایچ بە درووشمەو "ئازاڎیی پۍ عەبدوڵا ئۆجالانی، چارەسەری سیاسی پۍ پەرسوو کورڎی" بەشڎاری هەڵمەتەکۍ کەرۊ و ئامان: "داوە جە گرڎوو ڕێکوزیا گلېرگەییەکا ژەنا و گەنجا و پارتە سیاسییەکا و پێکئاماکا کەرمۍ، بەشڎاری ئی هەڵمەتۍ کەرا. ئێمە بەبێ مردای، جەڕای سیاسی و یاسایی و دیپلۆماسی و چالاکیی گەلیۊ، کۊشیای وەڵۍ وزمۍ".