تەڤگەرو ژەنا ئازاڎیی 'تەژەئا' چېرو دروشمۊو 'پەی ئاشتیی کۆمەڵایەتی و چارەسەری دیموکراسی ژەنا ڕا مکەرا' هېزی ئامەدەنە ڕاپیمایۍ ۋەرفراوانشا ئەنجامدا. جە شارە جیاجیاکا تورکیای و کوردەسانیوە بەهەزاران ژەنۍ ئامەدەنە کوۍ بیێوە و جە پارکو 'ژیۋا'ـی شەمسە ئەڵڵاقێوە تاوەکو مزگی گۊرەی بەپێ لوۍ.

ژەنە بەشدارەکۍ جە ڕاپیماکەینە جە بارەوو داواکاشاوە پەی ئاشتی قسېشا پەی ئاژانسوو هەواڵوو فوراتی (ANF)ی کەردۍ.                          

'ئێمە تەنیا ئاشتیما مەتڵەبا'

بەیجا ئابیە: ئێمە پەی ئاشتی ڕا مکەرمۍ. ئێمە پەی ئازادی کوردەسانی ئینایمۍ چۍ و ئانەما مەتڵەبا. مەتڵەبمانە رابەر ئاپۆ ئازاد بۆ. ئی ڕاپیمایە ڕاپیماو ئاشتییا. ئەڎایاما کە جە ڕێوە دورۆ ئامێنۍ، تەنیا یەک هیواشا هەن، ئاڎیچ ئاشتییا. با ئا هیلاکییەو ئەڎایا پەی ئاشتی بە زایە نەلۆ. ئێمە چێوە داوا جە دۊڵەتی مکەرمۍ: هەنگامە بنیۆ پەی ئاشتی. مەرامی یووەمما ئاشتییا؛ تا مېیاومۍ پا ئامانجەیما هەر ڕ مکەرمۍ.

'پەنەوازا ئی جەنگە دمایش پنە بۍ'

سەعدیە تاموورە: ئێمە پەی دمایئاردەی بە جەنگی ئینایمۍ مېڎانەنە. تەنیا هیواما ئازادبیەی رابەر ئاپۆی و زینانییەکان. گەرەکم ئیتر جەنگ دمایش بۍ. ژەنی بەشدارۍ پڕۆسەو ئاشتینۍ، گەرەکشا نیا ئیتر سەرکوت بکریا.

'پەنەوازا دۊڵەت پێشوازیی جە هەنگامەکۍ رابەر ئاپۆی بکەرۆ'

فاتمە باڵکا: ئێمە پەی دمایئاردەی بە ستەمی جە گەلەکەیما ئینایمۍ چۍ. پەنەوازا چیولای گەلو کوردی ئازاد بۆ و بە مافەکاش بیاوۆ. ئێمە ٤٠ ساڵۍ چێوەڵیچ ئاشتیما مەتڵەببۍ، ئارۊیچ هەر ئاشتیما مەتڵەبا. جگە جە ئاشتی حیچ داوێوە تەرما نەبۍ. تاوەکو ئاشتی بەدەس نۍ، کوشتەو خەڵکی دمایش نمۍ. ئێمە گەرەکمانە کوشتەی دمایش بۍ.

گوڵچین کاربووکە: ئێمە پەی بەدەسئاوردەی ئاشتی و دمایئاردەی بە ۋنمتەی ئەوەکۊشمۍ. گەرەکما نیا جەرگو حیچ ئەڎێوە سۊچۆ. رابەڕ ئاپۆ هەنگامېوە فرە زەریفە و شەرەفمەندانێش نیێنە، بەڵام تورکەکۍ حیچ هەنگامېوەشا نەنیان. گرڎ ڕوۍ فڕۆکە جەنگیەکۍ گنا هەرمانە، کۆمکوژیی بەردەواما. دۊڵەتو تورکی مشۊم دەمودەس بەشداری چا پڕۆسەنە بکەرۆ کە رابەر ئاپۆ دەسشپنەکەرڎ. ئێمە ئاشتیما گەرەکا، بەڵام ئاڎۍ گەرەکشا نیا.

'ئێمە ئیتر مەردەیما گەرەک نیا'

ساکینە ئاڵتانە: تەنیا داواما ئاشتییا. گەرەکما نیا کەس مرۆ. کورد، تورک، عەلەوی، عەرەب، لاز جیاوازی نییا؛ پەنەوازا ئینسان نەمرۆ، پەنەوازا ئاشتی بەدی بۍ. گەرەکمانە ئیتر جەنگ دمایش بۍ. با چیولای مافەکۍ کوردی دیاریبکریا. ئێمە گەرەکمانە پڕۆسەو ئاشتی دەمودەس بەشێوێوە ئەرێنی جابەجێ بکریۆ.