گرووپێوە ڤیەنناەوە لوێنۍ پەی ستراسبۊرگی پەی ڕاوەبەرڎەی ٥٥٧ەمین حەفتەو چالاکیی ئێشکگێری، کە پەی ئازاڎیی ڕابەروو گەلوو کورڎی "عەبدوڵڵا ئۊجەلان"ی، کە شاروو ستراسبۊرگوو فەڕەنساینە ملۊ ڕاوە.
چالاکیی ئێشکگێریی ئازاڎی جە ٢٥و حوزەیرانوو ٢٠١٢یۊ شاروو ستراسبۊرگوو فەڕەنساینە پەی بەدیئارڎەی ئازاڎیی جەستەیی ڕابەروو گەلوو کورڎی"عەبدوڵڵا ئۊجەلان"ی و ماڕای گۊشەگیری دەسش پەنە کەرڎەن و چالاکییەکە ماوەو ٥٥٧ حەفتان ملۊ ڕاوە. پەی لوایڕاوەو چالاکیی ئی حەفتەیە گرووپێوە جە شاروو ڤیەنناو پایتەختوو نەمسایۊ، لوێنۍ پەی ستراسبۊرگی و چاگە چالاکییەکەی کەرا.
گرووپە ئێشکگێرەکەو ڤیەننای پێک ئامێنۍ جە :"ئۊزان شێخان ئۊغڵو، یەکتان حیلوان و تاتەو مەتین کۊبانۍ" .
قسەکەروو گرووپەکەی" ئۊزان شێخان ئۊغڵو" واتش، ئازاڎیی ڕابەروو گەلوو کورڎی"عەبدوڵڵا ئۊجەلان" ئازاڎیی گرڎوو گەلان و واتیچش، پێویسا گرڎوو گەلا پێوە ڕابەروو گەلوو کورڎی"عەبدوڵڵا ئۊجەلان"ی ئازاڎ کەرا. "شێخان ئۊغڵو" داواش جە یۊبییەو ئەورووپای و کۊمیتەو ناستەی ئەشکەنجەی کەرڎە و واتش: "ماوەو ٢٤ ساڵۍ ڕابەرایەتیما گۊشەگیرا، ماوەو دووۍ ساڵان حیچ خەبەر و زانیاریێوەما نییا سەرش. ئێمە چنڎین ساڵێن ئینایمۍ وەرڎەموو ئەنجومەنوو ئەورووپاینە، وەلێم ئەورووپا لاڵا، مەوینۊ مەژنەوۊ و دووەڕوون. ئێمە گەرەکمانە دەمودەس هاگاڎاری و خەبەرما جە ڕابەرایەتیما بۊ".
"شێخان ئۊغڵو" بۊنەو کەوتەی بوومەلەرزەکەیۊ، سەرەوەشییش ئۊو گەلوو کورڎی و گەلای تەری کەرد، داواش جە گەلوو کورڎی کەرڎە، کە پەشتگیری جە وەنەقۊمیایا بوومەلەرزەکەی کەرا.
جە دمایی قسەکاشنە "شێخان ئۊغڵو" واتش: "جە خەتەو ڕابەرایەتینە بازنێوە وەش کەرمۍ و جە ساڵەو ٢٠٢٣ێنە ڕابەرایەتیما ئازاڎ کەرمۍ" .
س.ز
