بزە و خوەو سەروو لچا یان نیگێوە چندە متاوۊ گوزارش جە وەشەویسیی نیشتمانی دلێ دڵوو گەریلێوەنە کەرۊ؟ هەڵبەتە پێسە دایمە وچیۊ ئەگەر تەماشەو چەماو کەسێوە کەری، مزانی جە ناخشنە هەست بە چێشی کەرۊ.
بزە و خوەو سەروو لچا یان نیگێوە چندە متاوۊ گوزارش جە وەشەویسیی نیشتمانی، دلۍ دڵوو گەریلێوەنە کەرۊ؟ هەڵبەتە پێسە دایمە وچیۊ ئەگەر تەماشەو چەماو کەسێوە کەری مزانی جە ناخشنە هەست بە چێشی کەرۊ، بڎیەیدۍ ئا چەما و وەشەویسیی کورڎسانیشا چەنە ویندۍ. بە بزەو سەروو لچاشۊ تاودۍ تاموو وەشیی ژیوای ویندۍ و کەردۍ. وەشەویسیی کورڎستانی تەنیا بە کەلیمۍ نا، بەڵکم بە خوە، بە نیگێوە هەڤاڵ ڕۊنی ئاربابا وینیۊ.
زەخمی گەورە مەگەر بە سەرکەوتەی گەورەی پەترۊک بەسۊ
وەردەوام ئازاڎی ئاواتوو گەلەکەیما بییەن جە وەرکەوتوو کورڎستانینە، پەی ئامایدیی ئی ئاواتی گەل بە چنڎ شۊڕشۍ ئاوا بییەن و مافوو گەلوو کورڎی جە داگیرکەرا سنیان. وەلۍ، پێسە قەڎیمییێ ماچا: "دار کرمەش جە وێش نەبۊ مەڕێزۊ" جە وینگەو خیانەتی و جاشایەتی و نۊکەرایەتیی داگیرکەراو و براورەتەی و براکوشتەی و ئا سەروردایۍ تێکۍ شیۍ و دەسکەوتەکاو گەلوو کورڎی، دیسانۊ جە دەسشا سنیێوە. کۊماروو کورڎستانیچ کە بە دەسوو پێشەوا "قازی محەمەد"ی ئاوا کریا، ئا دەسکەوتە پیرۊزە کە گەلوو کورڎی یاواش پەنە، بە دەسوو نۊکەرا و داگیرکەرا دلێنە شی. ئێشوو ئا زەخمی کە بە دەسوو برای خنجەرە جە برای دریا، حەرگیز کەم نەبییەن و نە تەنیا گەلاو وەرکەوتی بەڵکم گەلوو کورڎی جە حەر چوار لاو نیشتمانیوە، هەست بە ئێشوو ئا زەخمی کەرا. "زانیار حسەینی" ڕۊڵەو بانەی و مەڵبەنڎوو گەشمەرڎە سمکۊی، یۊن چا گەنجا، کە دلێشنە هەست پا ئێشوو زەخمییە کەرێ. زانیار خەیاڵش بێ بۊ بایسوو پەترۊکبەستەی ئی زەخمی. هەڵبەت زەخمی گەورە بە سەرکەوتەی گەورەی پەترۊک بەسۊ. زانیار خەیاڵش بۍ بۊ بە بەشۍ چی سەرکەوتەیە گەورەیا.
بە نامێ ڕۊنی‌ـوە ڕۊشناییش دا بە ڕاو ژیوایش
زانیار وەروو ئانەی بۊ بە پەترۊکبەسوو زەخموو ملوێنان کورڎا، دەسش کەرد بە شۊنیرەلوای و گێڵای. زانیار بزووتنەوەی ئاپۊیی و پارتوو کرێکاراو کورڎستانیش ئشناسا، کە جە دماو ٢٨ سەروردای کورڎا سەرەش وردان و ئاستوو کۊشیای ئی بزووتنەوەیە، حەتا ئێسەیچ جە حیچ یۊ جە سەروردایەکانە نەوینیان. وەروو ئانەی زیاڎتەر ئی ڕێکوستەیە بشناسۊ و جە دلێنەو کۊشیایشنە قووڵ بۊوە، فرە کتێبێ ڕابەر"ئاپۊ"ی و ڕێکوستەکەیش وانێوە. جە ئاستێوەنە کۊشیای بزووتنەوەو ئازاڎییش ئشناسا. وینای چالاکیی گەریلایا جە دژوو داگیرکەراو سەروو خاکیما زیاڎتەر کەمەندکێششا کەرد ڕووەو بزووتنەوەو ئازاڎی. فەلسەفەو ڕابەر "ئاپۊ"ی و ئایڎیۊلۊژیاو ژیوای پەکەکەی ئا چێوۍ بێنۍ، کە حەر جە سەرەتانە کاریگەرییشا سەروو زانیاری نییارە و بی بە بایسوو ئانەی بڕیاروو پەیوەسبییەی پۊو بزووتنەوەو ئازاڎیوە بدۊ. زانیار چی ڕێنە نامۍ وێش نیا "ڕۊنی ئاربابا" و بە نامۍ ڕۊنی‌ـوە ڕاو ژیوایش ڕۊشنە کەرڎۊ.
بە دیای پەی ئی ڕەفاقەتی، ئاسۊو ئینسانی وافرتەر بۊ
ئا دەسکەوتۍ، کە بە ڕەنجوو ڕابەر ئاپۊی، گەشمەرڎا، بزووتنەوەو ئازاڎی و کۊشیای ئازاڎیی گەلوو کورڎی دەسەبەرێ بییۍ، ژڵێویای و موڕاڵێوەشا دلۍ هەڤاڵ ڕۊنینە ئاوا کەرد. چێوۍ کە حەر گەریلێوە جە ئاستێوە بەرزنە پەنەش کاریگەر بۊ، ئا ڕەفاقەتە بێگەرڎ و فیڎاکارانەن کە بەینوو گەریلایانە هەن. بە تەماشاکەرڎەی ئی ڕەفاقەتی وینگەو ئینسانی وافرتەر بۊ و ئا ڕەفاقەتە، کە حەر یۊ جە گەریلاکا ئاماڎەن گیانش پەی ئا ڕەفاقەتی فیڎا کەرۊ، ئا وینگە ڕۊشنەو گەلوو کورڎینە، کە دماییێ ڕۊشنوو ئازاڎیما نیشانە بڎۊ. ڕاویارا ئی ڕۍ ڕووانە بە سەرێعییێ بێوینەوە و بە فیڎاکەردەی گیانیشا ڎووەو ئی وینگەیە گنا ڕا. هەڤاڵ ڕۊنی سوور بێ جە ڕاویاربییەی ئی ڕێنە و بە قووێوە مانیاینەشناسانەوە و بێ ئانەی پێش شەکەتێ با ئی ڕۍ بڕۍ.
هاواروو سروشتی یاوۊ گۊشوو گەریلایا
یۊ جە کۊڵەکەکا پارادایموو ڕابەر ئاپۊی ژیوگەپارێزیین. گەریلێکێ بە زانابییەیشا دەوروو سروشتینە جە ژیوای گیاندارانە نزیکە سرووشتۍ و سرووشتدۊسۍ و عاشقە سرووشتێنۍ. هەڤاڵ ڕۊنی ڕۊحشنە هەست بە پەیوەندیی بەینوو گەریلای و سرووشتی کریێ و وێش دلێ تەدارەکوو ڕەنگەکا سرووشتوو کورڎسانینە تاونابێ. ئەرەگیرەکێ سەروو خاکوو کورڎستانی، حەمە نۊعە تەقەلا کەرا سرووشت و ژیوگەو کورڎسانی کوشا. گرد ڕووۍ بە بۊمبواران ڕەنگینیی سرووشتوو کوردسانی بە دووکەڵ تەنگەنەفەس کەرا. چێوە هاواروو سروشتی گۊشێ گەریلایەکانە دەنگ مڎۊوە. هەڤاڵ ڎۊنی گۊشێش ئی هاواری ئژنەوێنۍ و وەعدش بە سروشوو کورڎستانی دا، کە دەسوو ئەرەگیرا سەروو خاکوو کورڎسانیوە کوڵ کەرۊوە. ڕووانە بە چالاکیی سەرەمڕانە ئی وەعدیشە بەرۍ سەر.
پێسە هێزێوە فیڎایی ڕابەر ئاپۊی کۊشیای بەرۍ ڕاوە
یووەمین ڕا پەی هەڤاڵ ڕۊنی درێژەدای بۍ بە ڕاو گەشمەرڎە سمکۊی و سەرورڎای. ڕاێوە کە هەڤاڵ سمکۊ جە سەرنیشتوو کورڎستانینە و بەحری سیاوش بڕیەبۍ و ئا ڕۍ بۍ، کە هەڤاڵ ڕۊنی ئاواتەواز بێ بۊ بە ڕاویارش. پێسە گەریلێوە سەرکەوتەو کورڎسانی، هەڤاڵ ڕۊنیچ قوربانەو ئی ئامانجینە درێژەش بە کۊشیای دا و پی وەشەویسییوە بەشداریی کار و خەباتوو رێکوستەی بیی. لای سەریی تەوانایی و قووەتیش، پێسە گەریلای و پێسە هێزێوە فیڎایی "ڕابەر ئاپۊی" سەرەمڕ کۊشیی و گیانش سەروو دەساشۊ بۍ. ویرەوەریی ئا گەشمەرڎا کە چەنیشا ژیوابۍ هەڤاڵ ڕۊنییش زیاڎتەر لکەدێبێ بە ژیوایۊ. بەتایبەتی کەسایەتیی گەشمەرڎە "ڕووبار شەرڤان"ی جە مەجالەو ڕەفاقەتی و کۊشیای ئازاڎینە، کاریگەریی فرەش سەرۊ نیابێرە. هەڤاڵ ڕۊنی ئاواتەواز بۍ، کە بە بەرزکەردەیۊ کۊشیای دژوو ئەرەگێرا بێوە جواب و نازۊ حەرگیز ڕۊحوو ئا گەشمەرڎا ویروو کەسی بشۊوە.
دلۍ دڵوو گرڎوو ڕەفێقاشنە، پێسە ڕسمۍ جە جوانیی گەنجاو وەرکەوتوو کورڎستای مەنەنۊ
هەڤاڵ ڕۊنی جە ئاستێ فیڎایی بەرزنە، بەشڎاریی جەنگوو حەفتانین و هەڵمەتەو جەنگوو خابووری بی. جە مەجالەو لەشکەرینە حیچ قۊرتێوە نەشناسۍ و پێسە نیشانەماڕۍ فرە چالاکیی و سەرکەوتەیێش دەس وستۍ و تۊڵەو گردوو گەشمەرڎاش جە ئەرەگیرا کورڎسانی ساناوە. بە قەرارۍ قۊرەتاویوە کووۍ سەروو دژمنی و بە دڵێوە نەتەرس و ڕۊحێوە یاراوە، دژوو دوژمناو گەلوو کورڎی گژیۍ. هەڤاڵ ڕۊنی جە ٢٢ی ڕابڕانوو ١٤٠٠ (١١ی شوباتی ٢٠٢٢) چەنی دووۍ هامڕایاش جە هجوومی هەوایی دەوڵەتوو فاشیستوو تورکیاینە لوا ڕیزوو کاروانوو گەشمەرڎا کورڎسانیوە. ڕوخساری خوەدارش و دڵی یاراو هەڤاڵ ڕۊنی، دڵوو گردوو ڕەفێقەکاشنە پێسە ڕسمێوە جوانی جە جواناو وەرکەوتوو کورڎسانی زیندە و ئەوەمەنەن. ڕایۍ کە هەڤاڵ سمکۊی بڕیە و هەڤاڵ ڕۊنی بی بەڕاویارش، بە ڕاویاری سەڎا جە گەنجا وەرکەوتوو کورڎسانی حەر درێژەش هەن تا یاوای قوللێ ئازاڎی و بەرئامای ڕۊجیاروو ئازادیی گەلەکەیما.
نامۍ ودمانامۍ: زانیار حوسەینی
ئشناسیا بە: ڕۊنی ئاربابا
یاگۍ و وەختوو جەئەڎابییەی: ١٣٧٧ (١٩٩٩) بانە
یاگۍ و وەختوو بەشداربییەی: ١٣٩٥ (٢٠١٨) پێنجوێنە
یاگۍ و وەختوو گەشمەرڎەبییەی: ١٤٠٠ (٢٠٢٢) حەفتانین
