هامسەرۆکا پارتو یەکسانی و دیموکراسی گەلا (دەم پارتی) تولای حاتەم ئۆغوللاریە و تونجەر باقرخان دەربارە و مەڕاسیمو دلێنە بەردەو چەکەکا پەکەکەی ئەرەیاونێوەشا وەڵا کەردۆ. هاوسەرۆکێ ئاماژەشا پانەی دا قۆناغی تازە کە بە بانگەوازو تاریخی ئاشتی جە ئیمراڵینە دەسش پنە کەرد، پەی گەلوو تورکیای و وەرکەوتوو مییامینی ڕاو چارەسەری دیموکراتیکی، یەکسان و ئازادیش کەردەن و واتشا"مەڕاسیمو چەکنیارە و ئەنداما پەکەکەی بانگهێشت کەردەی پەی ژیوایێ دیموکراتیکو، دادپەروەری، یەکسان و ئازادین."

'جە ئیمراڵییۆ دما و ٢٦ ساڵا بانگەوازێ بە دیمەنۆ پری ئاشتی ئاما'

جە ئەرەیاوناکەینە کە بە نامێ هەردووی هامسەرۆکاوە دریا وچیا "ئارۆ خاڵێوە وەرچەرخانا جە تاریخوو سەد ساڵەو وەرکوتوو مییامینی و تورکیاینە. جە ئیمراڵییۆ دما و ٢٦ ساڵا بانگەوازێوە بە دیمەنۆ پەی ئاشتی ئاما. دما و بانگەوازەکەو ئیمراڵی بە مەڕاسیمو سۆچنا و چەکەکا پەکەکەی سەردەمێوە تازە پەی چارەسەری پەرسە و کوردی و بنیادنیاو تورکیایێ دیموکراتیکی دەس پنە مکەرۆ. قەرارو چەک نییارە و پەکەکەی تەنیا پەی پەرسە و کوردی نییا، جە هەمانکاتەنە چارەسەرکەردە و گرڏ و پەرسەکا و تورکیای بە ڕێبازەکا دیموکراتیکی."

'خوڵق کەردەگ پەی ژیوایێ ئازادی'

مەڕاسیمو چەکنیارە و ئەنداما پەکەکەی خوڵقکەردەین پەی ژیوایێ دیموکراتیکی، دادپەروەری، یەکسانی و ئازاد. ئی مەڕاسیمە هیواو گەلەکەیما پەی ئایندەی بە هێزتەر کەرد. چی گەشتە پیرۆزەنە هیچ کەسێ یان بەشێ جە گلێرگەی جیامەمەنۆ. جە خاکە بەپیتەکا ئەنادۆڵیۆ تاوەکو دەشتە بەپیتەکا تورکیای، جە لێوارەکا بەحری سیاوی تاوەکو شارە کۆنەکا میزۆپۆتامیای، گرڏ کەسێ بۆنە گەواهیدەر و هامبەشو ئی فارییا دیموکراتیکییە.

'ئی پڕۆسەیە بە سەرفرازییۆ پارێزنمێ'

گەل سەرگنۆ. ئانەی سەرگنۆ یەکسانی، دیموکراسی و ئاشتییا. ئی پڕۆسە بە سەرفرازی، ئارامی و پاگیریۆ پارێزنمێ. پی ورئێستەیۆ بە دڵ و گیان سڵام جە هەنگامە و چەکنیارەی و فاڕییای پەی سیاسەتو دیموکراتیکی مکەرمێ کە بە ئیرادێوە تاریخی جە لایەنو گروپو ئاشتی و گلێرگە و دیموکراتیکی جە ١١و تەمموزی ٢٠٢٥ دەسش پنەکەرد. ئیسە کاتو ئانەین پێوەرە یاسا مەزنمێرە و بە سیاسەتو دیموکراتیکی بەرەو تورکیایێ دیموکراتیکی هەنگامە بنییەیمێ و ئەوەکۆشای سیاسەتو دیموکراتیکی فراوان بکەرمێ."