هامسەرۆکایەتی دەسەی ڕاوەبەری کەجەکەی پێشوازیش جە هەڵمەتەو "ئازاڎیی پۍ ئۆجالانی، چارەسەری پۍ پەرسوو کورڎی'' کەرڎ کە دۆسا گەلوو کورڎی سەروو ئاستی میان نەتەوەیی دەسشا پنەکەرڎەن، ئەرەیاۋناش، "بەگرڎ نەوعۍ پەشتیوانی چا هەڵمەتۍ کەرمۍ".
هەڵمەتەو "ئازاڎیی پۍ ئۆجالانی، چارەسەری پۍ پەرسوو کورڎی'' جە ٧٤ شارانە چانیشا ستراسبۆرگ بە داواو ئازاڎیی پۍ ڕابەروو گەلوو کورڎی عەبدوڵا ئۆجالانی و چارەسەری پەرسوو کورڎی سەروو ئاستی میان نەتەوەیی هەڵمەتێوەشا دەسپنەکەرڎ. هامسەرۆکایەتی دەسەی ڕاوەبەری کەجەکەی پێشوازیش جە هەڵمەتەکۍ کەرڎ. هامسەرۆکایەتیەکە ئەرەیاۋناش کە مردایۊ ۋەران ۋەر بە گۆشەگیری جە هەمان وەختەنە بە ماناو داواکارین پۍ چارەسەرکەرڎەی قۊرتەکا و پۍ سەروستەو هەڵمەتەکۍ داواش جە گەلوو کوردسانی، دیموکرات، رۆشنۋیر، وڵاتپارێزا، هێزە دیموکراسیەکا تورکیای، گەلا ۋەرکەوتوو میامینی و جەهانی کەرڎ کە مرۆڤایەتی هۊربېزنا سەروو پەیا.
ئەرەیاۋناکەو کەجەکەی پی جۊرەنە:
" پېسە رای گرڎی مزانۊ هېزی سەروو ئاستی میان نەتەوەیی و بە دروشمەو "ئازاڎیی پۍ ئۆجالانی، چارەسەری پۍ پەرسوو کورڎی'' هەڵمەتێوە دەسشپنەکریا. کە ڕېکوزایاکۍ چەپ، سۆسیالیست، دیموکرات، ئازادیواز، کەسۍ خۊتان ئەخلاق و بەویژدانۍ و رێکوزیا دیموکراتیکەکۍ کەمپینێوە پا جۆرەشا دەسپنەکەرڎەن و ئانە فرە بە ماناو بەنرخا. سپاسوو گرڎوو دۆساما کەرمۍ کە ئا ئەرەیاۋناشا دان. ئا کەمپینە جە ساڵیاڎوو پیلانگێڵیی میان نەتەوەیینە دەسش پنەکەرڎ و ئانەیچ مانېوە گۊرەش هەن. گۊرەتەرین و ماناڎارتەرین جوابا جە ۋاران ۋەروو پیلانگێڵیی میان نەتەوەیینە، بە دڵنیاییوە ڕاوەبەرکەرڎەی هەرمانە و هەڵوێستۍ پی جۆرەینە.
گەلوو کوردسانی وڵاتپارێزی حەجگیز ئا پیلانگێڵیەشە قبوڵ نەکەرڎەن کە دژوو ڕابەر ئاپۆی دەسشپنە کریابۍ. پېسە جمیەری و گەلی ٢٥ ساڵېن ئێمە دژوو پیلانگێڵیی میان نەتەوەیی کۊشیەیمۍ. چی کۊشیایمانە بەردەوام ئا دۊسېما بېنۍ کە چنیما بېنۍ و دڵشا چنی گەلوو کورڎی مڎۊوەنە. ئارۊ ۋینمۍ کە دۆسەکېما ئیتر جە ئاستی سەرمەشقینە بەشدارۍ ئی کۊشیایە با. ئینە ڕووەدایۍ فرە گۊرەن. بێگومان ئینە سەرکەوتەی گەلوو کوردسانی وڵاتپاڕێزی و گرڎوو ئانیشان کە دژوو پیلانگێڵیی کۊشیېنۍ. پېسە جمیەری ئازاڎیی کورڎی ئێمە سڵام چا کەمپینە گەورە و ماناڎارەیە کەرمۍ و ئێمە بە گرڎ جۆرۍ پەشتیوانیش ۋنەکەرمۍ.
ئێمە قەناعەتما پاسەن کە ئامانجوو ۋېش پېکۊ
ئا کەمپینەی ١٠و تشرینوو یۋەموو ٢٠٢٣ ئەرەیاۋیا، خاڵێوە یەکلاکەرەوېنە. بە دەسپنەکەرڎەی کەمپینێوە پی جۆرەیە ئانە سەلەمیان کە جە دژوو پیلانگێڵیی میان نەتەوەیی کۊشیای یاۋان بە ئاستێوە پەنەواز و جە ئیسە بەدماوە بە چالاکی کاریگەر میاۋۊ بە ئامانجەکاش جە دروشمەو کەمپینەکەینە بە پوختی وچیان. پی جۆرە کۊشیای جە دژوو پیلانگێڵیی میان نەتەوەیی یاۋان بە ئاستێوە جەهانی و پاش وستەنۊ قۆناغوو کۊشیای هەمەلایەنەی و ئەنجامگیری. پی ئەنەیاوای و ۋەرپرسیاریۊ ئێمە قەناعەتما پاسەن کە کەمپینەکە ئا ئامانجا پېکۊ کە دەسنیشانش کەرڎېنۍ.
ئازاڎیی کۆمەڵایەتی جەهانیچ بە کۊشیای جە دژوو گۆشەگیری دەسەبەر بۊ
کۊشیای دژوو پیلانگێڵی میان نەتەوەیی سەروو ئاستی میان نەتەوەیی بریۊ ڕاوە. ئانە نەک هەر پۍ گەلوو کورڎی، پۍ کۊشیای ئازاڎیی و دیموکراسی گەردونی وەڵېکۊتەیۍ فرە گۊرەن. ڕابەر ئاپۆ بڕواش بە کۊشیای و بەها گەردونیەکا مرۆڤایەتی بۍ و دەسش بە کۊشیای کەرڎ. ئاخېزوو کوردسانی پېسە بەشێوە جە کۊشیای دیموکراسی و ئازاڎیی جەهانیی گەلاو جەهانی و چېردەسا، وەڵېکۊتەن. هەڵوێسوو ڕابەر ئاپۆی دژوو پیلانگێڵیی میان نەتەوەییچ، سەروو ئا ئەساسیە بۍ. ڕابەر ئاپۆ زیاتەر قورساییش وست سەروو کۊشیای و بەها هامبەشەکا گرڎوو بەشەکا گلېرگەو چېردەسا و گەلا و ئانەش یاۋنان بە چوارچێوېوە ئایدۆلۆژیک و تیۆریک و گۊرەتەرین جوابش بە پیلانگێڵیی میان نەتەوەیی دانۊ. هەڵوێستوو ٢٥ ساڵەو رابەر ئاپۆی جە دژوو سیستمی گۆشەگیری و ئەشکەنجەو ئیمراڵی پا جۆرەبیەن. ئینە هەڵوێسېوە پارېزنای مرۆڤایەتی، ئازاڎیی، دیموکراسی، سۆسیالیزم، گەلا، ژەنا و بندەستان. بە ماناو پەشتیوانیېوە فرە گرنگین. حەرپۊکەی خۊتانکەرڎەی جە ڕابەر ئاپۆی بە ماناو خۊتانکەرڎەین جە ۋېت، جە گلېرگەی، جە ئازاڎیی و شکۆو مرۆڤایەتی ۋېش. ئی کەمپینە ئا راسیەشە سەلەمنا. ڕابەر ئاپۆ جە ئیمراڵی ئینا چېروو گۆشەگیری تنکریاینە، بە دڵنیاییوە مشۊم مرۆڤایەتی دژوو ئانەی کۊشیۊنە. ئازاڎیی گەلوو کورڎی، گەلا ۋەرکەوتوو میامینی و گلېرگەی گەردونیچ چا ڕېوە بۊ.
قۊرتەکۍ بە ئەقڵیەت و ئامرازەکا مۆدێرنیتەی سەرمایەداری چارەسەر مەکریا
قۊرتەو کورڎی و قۊرتەکۍ ۋەرکەوتوو میامینی بە دمایی ئامای سیستموو گۆشەگیری و ئەشکەنجەو ئیمراڵی و دەسەبەرکەرڎەی ئازاڎیی جەستەیی ڕابەر ئاپۆیوە پەیوەنڎیوە نزیکش هەن. جە ڕاو ئا ڕووەدایاوە ڕووە مڎا ئانە سەلەمیۊ. هجومەکۍ دەوڵەتوو تورکی پۍ سەروو ۋەرنیشتی و سوریای، ئانۍ جە ئیسرائیلو فەلەستین ڕووە مڎا نمونەو ئانەینۍ. جە ۋەرکەوتوو میامینی قۊرتەکۍ بە ئەقڵیەتوو نەتەوە-دەوڵەتی و ئامرازەکاش چارەسەر مەکریا. قۊرتەکۍ مرۆڤایەتی پېسە یەکسانی، ئازاڎیی و دیموکراسی بە ئەقڵیەتوو ئامرازەکا مۆدێرنیتەی سەرمایەداری چارەسەر مەکریا. ڕابەر ئاپۆ بە هەڵوێسوو نەتەوەی دیموکراتیکی و مۆدێرنیتەی دیموکراتیکی ماقووڵتەرین فۆرمولەو چارەسەرکەرڎەی قۊرتەکاش وستەن ڕووە. مردایۊ ۋەران ۋەر بە گۆشەگیری تن کریان، جە هەمان وەختەنە بە ماناو داواکارییا پۍ چارەسەری قۊرتەکا.
ئێمە پا هوشیارییۊ بانگەواز ئاراسەو گرڎ کەسی کەرمۍ:
بانگەواز پۍ گەلوو کوردسانی
یۋەم بانگەوازما پۍ گەلوو وڵاتپاڕێزوو کوردسانین. گەلی وڵاتپارێزوو کوردسانی تا ئیسە جە چوار لاو کوردسانی، جە زینڎانەکانە، جە کەمپوو مەخموری، جە شەنگال و جە بەروو وڵاتی دژوو پیلانگێڵیی میان نەتەوەیی بێ مردای کۊشیېنۍ. ئەنجاموو ئا کۊشیاینە کە ئارۊ گەلا چېردەسەو جەهانیم ژەنا، گەنجا و هەڤاڵ و هۆگرا خۊتانکەرڎەی جە کۊشیای کورڎاو رابەر ئاپۆی کەرا. ئی گەلە ۋەرپرسیاری ئێمەش یەکجار زیاڎ کەرڎەن. پا ویرەوەری و پەیوەستبیەی بە رابەر ئاپۆیۊ و بڕوا بە ئازاڎیی کوردسانی مشۊم ئینسان بەشداری چا کەمپینەینە کەرۊ کە دەسشپنە کریان، جە ۋەرکەوتوو پانیشت مشۊم گەل هۊرزۊ سەروو پەیا. مشۊم رۆشنۋیرا و رێکوزیا دیموکراتیکەکۍ گەلی سەرمەشقی گەلی کەرا. خەڵکوو پانیشتوو کوردسانی مشۊم فشار و تەوقەو دەسەڵاتوو ئاکەپە-مەهەپەی فاشیستی ماڕۊنە و بە شێۋېوە بەقوەت جماوە. جۋانۍ وڵاتپاڕێزوو کوردسانی مشۊم جە چالاکیەکانە وەڵۍ وەڵېوە با. ۋېشا بە شێۋېوە بەقوەت رێکوزا و با بە سەرمەشقۍ گەلی. ماڕای گۆشەگیری دژوار سەروو ڕابەر ئاپۆی و پارېزنای کۊشیای ئازاڎیی بە تایبەتی ئەرکوو جۋانا کوردسانین.
بانگەواز پۍ گەلی و هێزە دیموکراسییەکا جە تورکیا
بانگەوازی دووەمما پۍ دیموکراسیوازا، ڕۆشنۋیرا، وڵاتپارێزا و گرڎوو هێزە دیموکراسییەکان. گۆشەگیری تنکریان، گۆشەگیرکەرڎەی کورڎی و گەلا تورکیاین. دەسەڵاتوو فاشیستی ئاکەپە-مەهەپەی، پۍ ناستەو ئاخېزوو ۋەرنیشتی، کۆکوژکەرڎەی کورڎا گرڎوو قوەتوو ۋېش وزۊ هەرمانە. پانەیچ تورکیای بەرەو تاریکی بەرۊ. ئیتر پەنەوازەن گرڎ کەسۍ ئا ڕاسیا بۋینا. کۊشیای ڕاستەقینە پەی دیموکراسی جە تورکیانە، مرڎاین پاڵ و کۊشیای ئازاڎیی کورڎی و مردایۊن جە دژوو گۆشەگیری. ئەگەر ئینسان ئانەی نەکەرۊ، ئەگەر جە ۋەران ۋەروو گۆشەگیری تنکریاو سەروو ڕابەر ئاپۆینە خۊتان قەرار نەبۊ و نەکۊشیۊنە، هەڵوێسوو ئینسانی ڕاس و دیموکراسی و وڵاتپارێزانە مەبۊ. پا جۊرە تورکیا ڕۊشن و دیموکراسی مەبۊ. دەسەڵاتوو فاشیستی ئاکەپە-مەهەپەی پاشەکشە مەکەرۊ و لاواز مەبۊ، تورکیا جە تاریکی نەجاتش مەبۊ. ئیتر پەنەوازەن ئینسان بە شێۋېوە بەقوەتتەر و بە هەڵوێستێوە ئاشکرا دژوو گۆشەگیری مرڎۊوە. ئانە پیمەروو دیموکراسی، وڵاتپارێزی، وەڵېکۊتەی، ئەخلاق و ویژدانین.
مشۊم هەرمانۍ کەرمۍ کە گرڎوو مرۆڤایەتی هۊرزا سەروو پەیا
یەرەم بانگەوازما پۍ گەلا ۋەرکەوتوو میامینی و جەهانیا. دڵوو ڕابەر ئاپۆی نەتەنیا پۍ کورڎی، بەڵکم پۍ ئازاڎیی گەلا ۋەرکەوتوو میامینی و جەهانیچ مڎۊوەنە. ڕابەر ئاپۆ هەمیشە پەی ئانەی خەباتش کەرڎەن. پا مەڵامەتۊ ۋېڕاگری و پا گیریش کەرڎەن، ئەنجامەکېچش چنی مرۆڤایەتی هامبەش کەرڎېنۍ. چا ھەلومەرجە قورسانە ۋېشا جە گلېرگەی و مرۆڤایەتی بەدوور نەگرتەن. پەنەوازەن زیاتەر ئا ڕاسییە بۋینمۍ، بزانمېشوو باسش کەرمۍ و خۊتانکەرڎەیش ۋنەکەرمۍ. ئانەیچ پەنەوازۍ مرۆڤایەتی، دیموکراسی و ئازاڎیوازیین. مەبۊ بە حیچ جۊرۍ گۆشەگیری تنکریاو سەروو ڕابەر ئاپۆی قبوڵ کریۊ. پەنەوازەن جە دژوو گۆشەگیری تنکریای هەڵوێسما بۊ و ڕابەر ئاپۆی ئازاڎ کەرمۍ. حەرپۊکەی مشۊم هەرمانۍ کەرمۍ کە گرڎوو مرۆڤایەتی هورزا سەروو پەیا.
پا هەست و بانگەوازیا مبارەک بایی جە کەمپینوو ''ئازاڎیی پۍ عەبدوڵا ئۆجالانی، چارەسەری سیاسی پۍ پەرسوو کورڎی'' کەرمۍ، تەئکیدیچ کەرمېوە کە بڕواما بە سەرکەوتەیش هەن و پەشتیوانیش ۋنەکەرمۍ.
