هاموڵاتیېوە کورد دریا قەنارە و زینڎانیېچ هەمان سزاش سەرەرە سەپیا
دەسەڵاتووو داڎوەری ئێرانی سزاو جە قەنارەدایش سەروو ھاموڵاتیېوە خەڵکوو شاروو بۆکانی جە ۋەرکەوتوو کوردسانی جا بەجېکەرڎ ، هاموەخت ھەمان سزاش سەروو ھاموڵاتیېوە کورڎوو یارسانیچەرە سەپنا.
جەمەو مافوو مرۆڤوو کوردسانی ۋەڵاش کەرڎۊ، ڕۊو پەنجشەممەی ١٢و تشرینی یۋەمی، ھاموڵاتیېوە خەڵکوو شاروو بۆکانی جە ۋەرکەوتوو کوردسانی بە نامۍ "حسێن محەمەدی" عمر ٥٢ ساڵ، دماو ١٥ ساڵا جە زینڎانیکەرڎەیش، جە لایەن و دەسەڵاتوو داڎوەری ئێرانیوە سزاو جە قەنارەدایش سەرەرە جابەجۍ کریا.
ئا ھاموڵاتییە کورڎە کە خەڵکوو دەگاو "تیکان تەپە"و بۆکانین خێزاندارا و خۊتان دووۍ زارۊڵېن، نامبریا وەڵتەر جە شاروو ڕەشتی کە گنۊنە سەرنیشتوو ئێرانی گیریان و جە لایەنوو دەسەڵاتی داڎوەری ئا شارەیۊ بە تۆمەتەو گلیای بە بازرگانی مادڎەی هۆشبەریۊ سزاو قانارەیش سەرەرە سەپیابۍ.
جابەجېکەرڎەی سزاو جە قەنارەدای سەروو حسێن محەمەڎی ئینا وەختېنە کە، وەڵتەر دووۍ برېش بە نامەکا "حەسەن و ئیسماعیل محەمەدی" بە تۆمەتەی سیاسیە جە لایەنوو دەوڵەتوو ئێرانیوە جە قەنارە دریېبێنۍ.
جە لېوەتەرۊ بە پاو ھەواڵێوە تۆڕەو مافوو مرۆڤوو کوردسانی، ھاموڵاتیېوە کورڎوو یارسانی بەنامۍ "ڕەزا ڕەسایی" بە تۆمەتەو بەشڎاری کەرڎەی جە کوشتەی "نادر بەیرامی"، سەرۆکوو ھەواڵگری سوپاو پاسدارا جە شاروو سەحنەی سەر بە پارێزگاو کرماشانی، جە لایەنوو دەسەڵاتی داڎوەری سەر بە دەوڵەتوو ئێرانی سزاو جە قەنارەدایش سەرەرە سەپیان.
سەپناو سزاو جە قەنارەدای سەروو ڕەزا ڕەسایی-رە ئینا وەختېوەنە کە نامبریا جە میانوو لۋای ڕاوەو ئەرەنیشتەییەکا داڎگاینە چنڎین جارۍ تەئکیدش کەرڎەبېوە، جە وەختوو گېرتەینە جە ناوەنڎە ئەمنییەکا شاروو سەحنەینە بە "مەڵامەتوو ئەشکەنجەی و ھەڕەشۍ دەسدرێژیی کەرڎەی سەرش" ناچار بیەن دڎان بە تاوەانێوەرە بنیۊ کە نەکەرڎېنەش.
