ئەنڎامەو کۆمیتەو ناوەنڎیی پەکەکەی هێلین ئومیدە سەبارەڎ بە ٢٥ەمین ساڵەو پیلانگێڵنیی میان نەتەوەیی ١٥و شوباتی، کە ۋەران ۋەر بە ڕابەروو گەلوو کوردی عەبدوڵا ئۆجالانی ئەنجامدریا، بەشداریش جە بەرنامێوە کەناڵوو تەلەڤزیۆنی میدیا خەبەرینە کەرد و چا بارۆ هۊرسەنگنایش کەرد.

هێلین ئومیدە جە ئەوەڵۆ بە رێزۆ سڵامش جە رابەروو گەلوو کوردی عەبدوڵا ئۆجالانی کەرد، کە ٢٥ ساڵێن دلۍ سیستموو قڕکەردەو ئیمراڵینە مدرامانی تاریخی بەرۆڕاوە و جە کەسایەتی گەشمەرڎا 'شمە مەتاودۍ ڕۊو ئێمە تاریک کەردۍ' گرڎوو گەشمەرڎا کۊشیای ئازاڎیش ویرئاردێوە.

'ئێساڵ نەک هەر ئێمە، بەڵکم هێزە پیلانگێڵنەکێچ ویستوو بە دەسئاردەی ئەنجامیشا هەن'

هێلین ئومیدە ئانەش وست ڕووە، کە ئاڎۍ بە ویس و ئیراڎەو هۊرشێونایۆ پلانەو پیلانگێڵنیی میان نەتەوەیی دەسشا بە ساڵەو ٢٠٢٤ کەردەن و واتش، "ئا هەڵمەتۍ ١٠و تشرینوو یووەمی دەسشپنەکریا، هەڵمەتەو ئازاڎیی جەسڎەیی رابەر ئاپۆی و چارەسەری پرسوو کوردی، جە بنەڕەتەنە هەڵمەتێوەنە پۍ ئا ئامانجەیە. ئاژێوە پا جۆرە هەن. دیارە کە ساڵەو ٢٠٢٤ ساڵێوە پا جۆرەنە کە هەم ئێمە و هەم هێزە پیلانگێڵنەکێچ گەرەکشانە بیاوا ئەنجام. ۋەروو ئانەی بتاوا پیلانگێڵنی تازە کەراوە جە هەرێمەکەنە جموجوڵی جددی ئینا ئارانە. سەرنج دەیدۍ؛ سەرەتا راوێژکاروو میتی ئیبراهیم کاڵن، دماتەر سەرۆکوو فەرماندەیی گرڎینی یاشار گولەر جە مەنتیقەکەنە گەشتشا کەرد. واتە سەردای عێراقیشا کەرد.

چێگەنە گەرەکما ئاماژە پانەی کەروو. تایبەتمەندی گرنگ ئانەنە. پیلانگێڵیێوە کە ساڵەو ١٩٩٩ ی پلانەش پۍ نریارە، جموجوڵێوە پا جۆرەش چنەبۍ. هەم سەرووئاستی میان نەتەوەیی و هەمیچ جە مەنتیقەکەنە بۍ. بەڵام هێزی سەرەکی هێزە نۆکەرەکۍ بێنۍ. نۆکەراو کوردی بیەیشا بۍ. ئیسەیچ کە جە ساڵەو ٢٠٢٤ینە حۊڵ مڎەیمۍ ئەنجاموو پیلانگێڵنی میان نەتەوەیی دلێنەبەرمۍ، هێزە پیلانگێڵنەکۍ جارێوەتەر هێزە داردەسەکۍ ۋێشا وزا وەڵۍ. حۊڵ مڎا پلانێوە تازۍ پاڎیشا بسپارا. بەڵام متاوو ئانەی واچوو. ٢٥ ساڵێن ئا پلانۍ پا جۆرەبۍ. بڕۍ وەخت بە ئاشکرا، جار جاریچ بە پەنهانی لوواڕاوە. جە ١٠ ساڵی ویەردەنە بە شێوێوە چالاک هامکارەکەشا واتە بارزانیشا جە دژوو ئێمە هانیدا و پی جۆرە حۊڵشادا هجومە ئەرەگیری و قڕکاریەکا سەروو گەلوو کوردیرە سەپنا و رەوایەتیش پنەبڎا. هجومێوە پیلانگێڵنی هەن. ئانە ئاشکرا بیەن. رەنگە جەنگ چڕتەر بۊوە. هەرێمەکەنە مشۊم گرڎ کەسۍ ۋێش پۍ ئانەی ئاماڎە کەرۆ. ۋەروو ئانەی پلانێوە پا جۆرە هەن. جە ئاژێوە چینەنە کە رابەر ئاپۆ گیریان و ئینا گۆشەگیریێوە دژوارەنە، گەرەکشانە جە ۋەران ۋەروو ڕاوەبەروو جمیەرەکەیمانە، هێزوو گەریلای، هێزوو جەنگی هجومێوە پاکتاوکەرانەی پی جۊرە وەڕاوەبەرا. گەرەکشانە پیلانگێڵنییەکەی پەشت قایم پانەی کەرا و درێژەش پنە بڎا".

'گەریلا دووۍ چالاکیێش کەردۍ، سوپاکێشا ۋەرگەش نەگێرت و جە پەیا کۊتە'

هێلین ئومیدە ئەرەیاۋناش، کە هێزە پیلانگێڵن و ئەرەگیرەکۍ گەرەکشانە جە ساڵەو ٢٠٢٤ینە ئەنجام بەدەسبارا و واتش، "بەڵام جە لاوازتەرین سەردەموو ۋێشانە. هەم جە روو دیپلۆماسی و هەم جە روو سەروازییوە ئینۍ لاوازینە. گەریلا دووۍ چالاکیێش کەردۍ. چێش ڕووەشدا؟ یۆ دماو یۊی جە پەیا کۊتۍ و زەنگۊڵێشا مەڕیۍ. ۋێشا وست ۋەربەرەو ناتۆی، ۋێشا وست ۋەربەرەو فڵانە یاگی. چنەشا پاڕیێوە، داواشا کەرد هجومەکا مردنا، لووۍ جە عێراقی پاڕیێوە. واتشا، ئا هجوما مردندۍ. ئاشکران کە پوختەو دیڎارەکا پا جۆرەنە".

'ڕاپیماو ئازاڎیی گەورەی جە ئیساوە ئامانجەکەش پێکان'

جە درێژەو قسەکاشەنە هێلین ئومیدە سەرنجش وست سەروو چالاکیەکا ئازاڎیی پۍ رابەروو گەلوو کوردی عەبدوڵا ئۆجالانی جە دلێینە و بەروو وڵاتی و واتش، " چالاکییەکۍ کە جە کوردسان و چێروو نامۍ 'ڕاپیمای گەورەو ئازاڎیی' ملاڕاوە، فرە بە قیمەتێنۍ. چارەکە سەڎێوەن سەروو پیلانگێڵنیرە ویەردەن. ئینەیچ کەم نییا. ئا زارۊڵۍ کە ڕۊو پیلانگێڵنیی جە ئەڎۍ بیێنۍ، جە دژوو ئا پیلانگێڵییە جە کۊشیاینە گەشمەرڎۍ بیێنۍ. حەقەتینێوە پا جۆرە بیەیش هەن. حەرپۊکەی گەلوو کوردی جە ڕاو ئا ڕاپیمایاوە نیشانەش مڎا کە ماوەو ٢٥ ساڵان بە چ شێوێوە سەروو پەیاوە ۋێش راگرتەن، جۆش و خرۆشێوە گۊرە بیەیش هەن. سڵام ئاراسەو ئانیشا کەروو کە چالاکی ۋێنیشاندایشا ئەنجامدان. جە وەختێنە کە کۆکوشی، قڕکەردەی، نادادی، پاشێلکاری بنەماکا و کردەوۍ نایاساییۍ سەپیا، فرە بەقیمەتا کە بە ئازایەتیۍ فرۆ داواو ئازاڎیی رابەری کریۆ، کۊشیای ئازاڎیی و بیەو گەلوو کوردی بە پا گیریوە بریۆ ڕاوە. ۋەروو ئانەی گەلوو کوردی جە گرڎ یاگێنە باوشیشا پۍ کەراوە. ۋەروو ئانەی ئی ئازایەتیەیە وینا پا جۆرە پێشوازییشا ۋنەکەرا، ئانەی جە نوێنەراو گەلوو کوردی وازیۆ ئی ئازایەتیەنە. ئانەیچ نیشانە مڎا. حەرپۊکەی فرە بە قیمەتا. پەیام بە دوژمنی مڎا، پەیام بە دەوڵەتوو تورکی مڎا".

هێلین ئومیدە دەسنیشانش کەرد کە ئا ڕاپپیمایە جە ئیسۆ ئەنجامش بەدەسئاردەن و واتش، "بێگومان مشۊم زیاتەر ۋەرفراوان کریۆ. رابەر ئاپۆ جە مێڎانوو ۋێشەنە گرڎ وەختۍ ڕاپیمای پی جۆرەی ئەنجام دۍ. بە تایبەتی چنی هەڤاڵا ژەنی.. چایچ هەرمانێوە پا جۆرە کریۍ. پۍ نمونەی واچۍ، "بەیدۍ پێوەرە ڕاپیمایۍ ئازاڎیی ئەنجام بڎەیمۍ'. واتە ڕاپیمای جە تەپێوەنە، ڕاپیمای جە کەشێوەنە، کەشوو ئا ڕاپیمایەبۍ، بەڵێ، ئیسە گرڎ کەسۍ بەشداری جە ڕاپیماو ئازاڎیی رابەرایەتینە کەرا. من پا جۆرە میاونە، پا جۆرە مەعناش پنە مڎەو.

سەرەڕاو ئانەیچ ئەوروپانە گەنجاو ئینتەرناسیۆناڵیستیچ، هەڤاڵا ئینتەرناسیۆناڵیستیچ دەسشا بە ڕاپیمای کەردەن. جە دڵوو مۆدێرنیتەو ئەوروپاینە واتە چا یاگێنە  موهەندیسا پیلانگێڵنیی میان نەتەوەیی حۊڵێوە پا جۆرەو سەرهۊردای گەنجا ئینتەرناسیۆناڵیستی؛ واتە گەنجاو ئەڵمانیای، فەرەنسای، ئیتاڵیای فرە گرنگا. سڵامشا ۋنەکەروو. درێژە بە ڕاپیماکەیشا بڎا و گەورەتەرش کەرا.

 ڕاپیمای جە کۆڵنەنە بێگومان گرنگا. چا بارۆ ڕاوەبەروو جمیەرەکەیما بڕۍ قسێس کەردۍ. چی دماییەنە هەڤاڵ سەبری قسێش کەردۍ. پلانە پۍ گلێرۊبیەیۍ گرنگی نریانەرە. پێسە گلێرۊبیەو ملوێنان ئینسانا پێناسە کریان. ئانە پا مەعنێنە. نەک هەر گەلوو کوردی، چنی گەلوو کوردی ، دۆساو گەلوو کوردی، هۆگراو ئازاڎیی و دیموکراسی جە گلێرۊبیەکەو کۆڵنینە کوۍ باوە. وەختۍ کە پی جۊرە بۆ هامپەیمانی دەسەبەر بۆ.

مشۊم ئانە عال درکش پنەکریۆ. هەر چالاکی و ۋێنیشاندایۍ ئازاڎیی مرۆڤەکا ئازاڎ کەرۆ. واتە پۍ ئانەی ئینسان ئازاڎ بۆ مشۊم گنۆ دلۍ حۊڵ و جموجوڵی. چالاکبیەی شێوێوە ئازاڎبیەی مرۆڤیا. ۋەروو ئانەی ئینسان جە ڕاو چالاکی و ۋێنیشاندایۆ ۋێش ئازاڎ کەرۆ. واتە نەک ۋەروو بڕۍ کەسا، بەڵکم ئینسان بۊنەو ۋێشۆ گنۆ جموجوڵ و چالاکیوە. نەک ئانەی پێسە منەتێوە ئانەی کەرۊ، نەک ۋەروو ئانە واچۆ بۊنەو کورداوە بەشداری جە چالاکینە کەروو، یاخوڎ بۊنەو هەڤاڵا کەشیۆ بەشداری چا ۋێنیشاندا و چالاکیەینە کەروو. مشۊم پۍ ئازاڎیی و دیموکراسی، بۊنەو ۋێشۆ، واتە پەی شکۆمەندی ۋێش، پەی مرۆڤبیەی ۋێش، پەی بیەو مرۆڤی بە ئیرادەی بەشداری کەرۆ. جە ئیسۆ سڵام ئاراسەو گرڎوو ئا کەسا کەروو کە بەشداری کەرا و گەرەکما واچوو، کە پۍ ئانەی جە ١٧و شوباتینە گلێرۊبیەیۍ شکۆدار ئەنجام بڎریۆ، گرڎ کەسۍ مشۊم بێ مردای کۊشیانە".