هەپەگە ئەرەیاوناش سوپاو تورکی ئەرەگیری جە ١١و نیسانینە بە چەکی کیمیایی و تەقەمەنی قەدەغەکریا هرووژمش کەرد سەرو مەڕەکا گەریلای جە مێڏانو مڏرامانە تەپۆڵکەو جوودی و جە ئەنجامەنە هەردووە گەریلا بەسێ و میترا گەشمەرڏێ بیێ.
ئەرەیاوناکەو مییانو ئەرەیاونا و چاپەمەنی هەپەگەدینە وچیان: "پێسەو ئانەی ڕاو گرڏی ئاگادارا، گەریلێکێ ئازادی کوردەسانی جە ١و ئادارو ٢٠٢٥یۆ ئینێ پێگەو ئایێربەستەینە. بەڵام بە ئیسەیشۆ هیچ فاڕییایێ جە هرووژمەکێ سوپاو تورکینە ڕووەشانەرێنە. بە هرووژمی ئاسمانی و زەمینیۆ، بە تایبەت جە ماوەکا دماینە بە چەکی کیمیایی و تەقەمەنی قەدەغەکریا هرووژمەکێش پەی سەرو مەڕەکا و سەنگەرەکاما زیاتەر کەردێنێ. سوپاو تورکی ئەرەگیری کە مەتوۆنە ئیرادەو هەمڕێیاما ماڕۆنە کە سەرو هێڵەو فیدایەتی ئینێ مڏرامانەنە، جە ١١و نیسانینە جە هەرێمو گەشمەرڏە دەلیلو وەرنیشتوو زاپینە بە چەکی کیمیایی و تەقەمەنی قەدەغەکریا هرووژمی قورسش کەرد سەر و مەڕەکاما جە مێڏانو تەپۆڵکەو جوودینە و جارێوە تەر تاوانەو دژە مرۆڤانەش ئەنجام داوە. جە ئەنجامو ئی هرووژمانە هەمڕێ نەمرێما؛ بەسێ و میترا کە بە تۆمارکەردەو مڏرامانی داستانو ڕێشا جە هرووژمەکا دووژمنی گێرت، گەشمەردێ بیێ. هەمڕێما ئەوەکۆشای و مڏرامان و شکست واردەی میلیتانو ئاپۆییشا نیشانو گرڏو جەهانی دا. دماتەر زانیاری وەرفروان سەرو شناسنامەو هەمڕێیا نەمریما پەی ڕاو گرڏی و گەلەکەیما وەڵا مکەرمێوە."
هەپەگە پێوەس بە هرووژمەکا سوپاو تورکی ئەرەگیری و جوابدایۆ هێزەکا گەریلای جە دژو هرووژمەکا ئی زانیاریێشە وەڵاکەردێوە:
"هرووژمەکێ سوپاو تورکی ئەرەگیری بە تەقەمەنی قەدەغەکریا؛
٢٤ و ٢٦و نیسانی جە هەرێمو گەشمەرڏە دەلیلو وەرنیشتوو زاپینە، مەڕەکێما جە مێڏانو مڏرامان و تەپۆڵکەو ئامێدی ٢ جارێ بە تەقەمەنی قەدەغەکریا بۆمبواران کریێ.
هرووژمەکێ سوپاو تورکی ئەرەگیری بە فڕۆکەی جەنگی؛
٢٤ و ٢٥و نیسانی جە هەرێمو گەشمەرڏە دەلیلو وەرنیشتوو زاپینە، مێڏانو مڏرامان و تەپۆڵکەو باژارێ ٢ جارێ بە فڕۆکەی جەنگی بۆمبواران کریێ.
هروژمەکێ سوپاو تورکی ئەرەگیری بە چەکی قورس، تۆپێ و هاوەنێ؛
بەینو ٢٤-٢٥و نیسانینە جە هەرێمو خواکوڕکینە، مێڏانەکا مڏرامان و لۆلانی و سنین ٦ جارێ، جە هەرێمو گارەی، مێڏانەکا زێڤکێ، دێ‌ڕەشێ، گرگاشێ ١١٧ جارێ، جە هەرێمو مەتینای، مێڏانەکا بێشیلی، شێلازێ و سەرو مەتینای ٦٥٠ جارێ، جە هەرێمو گەشمەرڏە دەلیلو وەرنیشتوو زاپینە، مێڏانەکا مڏرامان و تەپۆڵکەو ئامێدی و کەش وەهاری ٤٨١ جارێ؛ بە گرڏی ١١٦٤ جارێ بە چەکی قورس، تۆپێ و هاوەنێ بۆمبواران کریێ.
دەسوەردای هێزەکاما جە دژو هرووژمەکا؛
٢٣ی نیسانیە سەعات ١٢:٠٠ جە هەرێمو گەشمەرڏە دەلیلو وەرنیشتوو زاپینە، هێزەکێ یەژا ستاریما دەسشا جە ئەرەگیرا کەردۆ، کە جە هەوڵەنە بێنێ هرووژم بکەرا سەرو سەنگەر و مەڕەکاما جە مێڏانو مڏرامان و کەش و وەهارینە.
جە ٢٥و نیسانیە سەعات ١٣:٠٥ جە هەرێمو گەشمەرڏە دەلیلو وەرنیشتوو زاپینە، بە چەکی نیمە ئۆتۆماتیک گورزە جە ئەرەگیرا و حەفارەیەکییا دریا، کە جە هرووژم کەردەی سەرو سەنگەر و تونێلەکاما بێنێ جە مێڏانو مڏرامانو کەش و ئامێدینە."
