سوپاو تورکی ئەرەگیری هاموەخت چەنی هجوومەکاش بە بۊمبی ئەتۊمی تاکتیکی، گازی کیمیاوی، گورزی قورسش لاو گەریلاکاو ئازادیی کورڎستانیوە وەرگنۊ. جە چالاکییەکاو گەریلاینە ھەرێموو زاپینە ٢٩ و خواکورکنە ٢ ئەرەگیرۍ سزا دریۍ.
ناوەندوو ئەرەیاونای و چاپەمەنی (هەپەگە) بارەو چالاکییەکاو گەریلاکاو ئازادیی کورڎستانی و ھجوومەکاو سوپاو تورکی ئەرەگیری ئەرەیاوناێوەش وەڵا کەرڎۊ، کە ئینەن:
"سوپاو تورکی ئەرەگیری تا هجوومە ئەرەگیرییەکاش پەی سەروو زاپی بیاوناۊ یاگۍ، ماوەو یەرۍ ساڵان هجوومی دژوار و قورس کەرۊ. کەچی مەتاوۊ سەرگنۊ، گرڎوو زەمینی و عاسمانیچۊ ھەرێمەکاو پارێزنای مێدیای بۊرڎومان کەرۊ و گرڎ تەکنەلۊژیێوە جەنگی بەکار مارۊ، بە تەقەمەنیی قەدەغەکریا، گازی کیمیاوی و بۊمبی ئەتۊمی تاکتیکی تاوانوو جەنگی کەرۊ، نمەتاوۊن بە ئاکامەکەیش بیاوۊ. وەراوەرشەنە گەریلاکاو ئازادیی کورڎستانی بە ڕۊحی فیدایی ئاپۊییوە مدرامانی داستانی کەرا، ڕا و شێوازوو سەرکەوتەی گەریلایەتیی مۊدێرنیتەی دیموکراتیکی بەکرڎار کەرا. شێوازوو جەنگی تیمی پرۊفیشناڵانە، کە پەشتی بە تونێلاو جەنگی و مەیدانی بەسۊ، گرڎ نۊعە هجوومێوە سوپای ئەرەگیرۍ پووچەڵ کەرۊوە، هەمان وەختنە بەرش وزۊ، کە متاوۊ گورزی گەورەش وەنە شانۊ.
سوپاو تورکی ئەرەگیری، کە زاپنە یاوان بنبەس و تەنگەتاو بییەن، سەرەڕاو ئانەیە کە فرەتەرین تەکنیکۍ و تاکتیکێش تاقیۍ کەرڎێوە، نەیاوا ئەنجام. فرەو ھەوڵەکا پەی هجوومکەرڎەی، بە چالاکیی قەوەت مرڎیێنۍ. سوپای ئەرەگیرە کە گورزێوە قورسش وەرکەوت، پێسە هەمیشەی زەرەرە گیانییەکاش ئاشکرا نەکەرڎۍ و تەنیا ددانش بە کوشیا ئەفسەرێوە باڵایرە نیا.
زانیاریی ورڎ بارەو چالاکییەکا و هجوومەکاو سوپاو تورکی ئەرەگیریوە ئینەن:
هەرێموو گەشمەرڎە دەلیلوو وەرنیشتوو زاپی؛
شەوەو ١٢و تشرینوو یوەمی، مەیدانوو مدرامانوو کەشوو جوودیینە، ئەرەگیرۍ تا بە تونێلەکاو جەنگی بیاوا، یەرۍ قۊڵێوە دەسشا بە جموجووڵی کەرڎ. تیمە گێڵیەرەکێما مەیدان و تونێلەکانە ئەرەگیرێشا وستۍ چێروو چەمداریوە و قۊڵی ئەوەڵ سەعات ٢١:٣٠ بە چەکی سووک و تاکتیکوو نیشانەماڕۍ گورزی قورسشا دۍ وەنە. چاگە ١١ ئەرەگیرۍ سزا دریۍ، ٤ ئەرەگیرێچ بریندارۍ بیۍ. ئەرەگیرۍ بە دووۍ گرووپۍ، کە جە ٩ و ٧ ئەرەگیرا وەشۍ بیێبێنۍ، ئامۍ وەڵێوە، سەعات ٢١:٤٠ بە تاکتیکی هجوومبەرانەو گەریلای کریۍ ئامانج. بە چەکی سووک و ڕومانۍ نزیکۊ وەنەو هەرڎووە قۊڵاو ئەرەگیر دریا و بەتەمامی دلێنە شیۍ، ١٦ ئەرەگیرۍ سزا دریۍ. ئانێچ کە دماتەر ئامۍ وەرۊ، بە تاکتیکوو نیشانەماڕۍ کریۍ ئامانج و ٢ ئەرەگیرۍ تەرۍ سزا دریۍ.
سوپای ئەرەگیرە، کە چاگە ٢٩ کوشێێش بێنۍ و گورزۍ قورسش وەرکەوت، بە هەلیکۊپتەری هجوومبەر سەرەمڕ مەیدانەکەشا بۊرڎومان کەرڎ و بە هەلیکۊپتەری سکۊرسکی کوشیۍ و بریندارەکێشا مەیدانەکەنە فاڕێوە.
ھەرێموو خواکورکی؛
٩یو تشرینوو یوەمی، ئەرەگیراو بەینوو کەشوو گەشمەرڎە ئاخینی و کەشوو گەشمەرڎە شاهانی لاو هێزەکاو یەژا ستاریماوە وزیۍ چێروو چەمداری. دماتەر بە سابۊتاژ ئا ئەرەگیرۍ کریۍ ئامانج. جە ئەنجامنە ٢ ئەرەگیرۍ سزا دریۍ.
هجوومەکاو سوپاو تورکی ئەرەگیری بە گازی کیمیاوی و تەقەمەنیی قەدەغەکریا و فڕۊکەی بێفڕۊکەوانی بۊمبچنکریا،
١١ و ١٢و تشرینوو یوەمی، سەنگەرەکاو جەنگی جە مەیدانوو مدرامانوو کەشوو چارچەلینە ھەرێموو مەتیناینە، ٢ جارۍ بە تەقەمەنیی قەدەغەکریا و دووۍ جارێچ بە فڕۊکەی بێفڕۊکەوانی بۊمبچنکریا بۊرڎومانۍ کریۍ.
١٢و تشرینوو یوەمی، سەنگەرەکاو جەنگی جە مەیدانەکاو کەشوو جودی و ئامێدی، ھەرێموو گەشمەرڎە دەلیلوو وەرنیشتوو زاپینە، ٦ جارۍ بە فڕۊکەی بێفڕۊکەوانی بۊمبچنکریا بۊرڎومانۍ کریۍ.
هجوومەکاو سوپاو تورکی ئەرەگیری؛
١٢و تشرینوو یوەمی، هەرێموو زاپی جارێوە، هەرێموو گەشمەرڎە دەلیلوو وەرنیشتوو زاپی، هەرێموو خواکورکی ٢ جارۍ، بە گرڎیوە ٤ جارۍ بۊرڎومانۍ کریۍ.
١٢و تشرینوو یوەمی، ھەرێمەکاو گەشمەرڎە دەلیلوو وەرنیشتوو زاپی، مەتینای و خواکورک بە هەلیکۊپتەری هجوومبەر بۊرڎومانۍ کریۍ.
ھەرێمەکاو زاپی، گەشمەرڎە دەلیلوو وەرنیشتوو زاپی، خواکورکی و مەتینای تۊپوارانۍ کریۍ.
