پلاتفۆرو هۆرام-ی، تیرۆرو دۆکتور عەبدوڕەحمان قاسملۆی، بە تیرۆرو دیمۆکراسی نامۍٚ بەردەن و دەسنیشانش کەردەن: شێوەو جەداردای و تیرۆرو ڕابەرا کوردی سەڵمنانش باوەر کەردی بە دژمنا و داگیرکاراو کوردستانی ئەنجامێ ناوەش و تاڵش پەی میللەتەکەیما بییەن.
راوەبەریی پلاتفۆرو هۆرام-ی، جە ٣٣مین ساڵەو تیرۆرو دۆکتور عەبدوڕەحمان قاسملۆ-ینە، ەیاننامەشدان و تیرۆرکەدەکەیش بە تیرۆرو دیمۆکراسی نامۍٚ بەردەن.
هۆرام و دەسنیشانش کەردەن: شێوەو جەداردای و تیرۆرو ڕابەرا کوردی سەڵمنانش باوەر کەردی بە دژمنا و داگیرکاراو کوردستانی ئەنجامێ ناوەش و تاڵش پەی میللەتەکەیما بییەن. تیرۆرکەردەی ”موحموود سانو هۆرامانی (مەحموود خانو دزڵیۍٚ) ، سمکۆ شکاک ، قازی محمد ، شەهید فۆئاد موستەفا سوڵتانی ، شێخ ڕەزا، شێخ سەعید و دۆکتۆر قاسملۆ و شەرەفکەندی گێرە و بڕفانای ڕابەر ئۆجەڵانی و تیرۆرو ساکینە جانسز-یٚ و ڕەفێقەکاش جە پاریسەنە بە نمونە ئاوردەنەوە.
پلاتفۆرمو هۆرام-ی، سەررەڕا بەرزیاکەردەیۆ دۆکتور قاسملۆی و سەرجەم شەهیداو ڕاو ئازادی کورد و کوردستانی، یۆگێرتەی نەتەوەیی و خەباتی هامبەش بە تاکە ڕاو یاوای بە کۆمەڵگایە ئازاد و دیموکراتیکی مزانۆنە.
تەمامی بەیاننامەکەی:
بە بۆنەو ٣٣ مین ساڵڕۆ تیرۆرو دۆکتور قاسملۆ-ی …
گەلو کوردی یۆ جە میللەتانە کە جە درێژەو سەد ساڵۍٚ ویەردێنە تا بە ئارۆ بە گرد شێوە دژایەتیی کریان . دۆژمنا کوردی بە ئینکار ، ئەشکەنجە ، سێدارە و تیرۆر جوابو داواکارییە ئینسانیەکاو میللەتو کوردیشا دانەوە . گەر تەماشەو ویەردەو ئاخێزەکاو کوردی بکەرمێ، وینمێ کە نەیاراو کوردی بە چ شێوێوە و بە نامێ ئاشتی و گوفتمانیوە ڕابەرەکاو کوردیشا تیرۆر کەردێنێ . ئانە ئا ڕاسیەیە بەر موزۆ کە داواکاریەکاو گەلو کوردی ، داواکاریۍٚ بە حەقێ بێیەنۍٚ. شێوەو جە سێدارەدای و تیرۆرو ڕابەراو کوردی سەلەمنای ئا ڕاسینە کە باوەڕکەردی بە دوژمنا و داگیرکاراو کوردستانی ئەنجامێ ناوەش و تاڵش پەی میللەتەکەیما بییەن .
هەر جە تیرۆرو موحموود سانو هۆرامانی ، سمکۆ شکاک ، قازی محەمەد ، شەهید فوئاد موستەفا سۆڵتانی ، شێخ ڕەزا، شێخ سەعید و دۆکتۆر قاسملۆ و شەرەفکەندی بگێرە ، تا دماجار بڕفانای ڕابەر ئۆجەڵانی و تیرۆرو هەڤاڵ ساکینە-ی و ڕەفێقەکاش جە پاریس-ـەنە ، گرد بە شێوە نا ئینسانی و بە دوور جە ئەخلاقی سیاسی جە سێدارە دریەنێ یا تیرۆر کریەنێ. تیرۆرو دۆکتور قاسملۆی یۆ جە ئا کەردەوە نا ئەخڵاقیانەو نەیارا کوردی رژیمو جمهوری ئیسلامین کە جە چێرو نامێ چارەسەری پەرسەو کوردینە بە شێوە فێڵاوی ڕووەشدا . نەیاراو کوردی ئانەشا سەڵمنان کە پەی مەنیەیۆ وێشا جە دەسەڵاتەنە ، پەنا پەی گرد کەردەوێوە قیزەونی مبەرا . تیرۆرو دۆکتور قاسملۆی جە دماو ٣٣ ساڵا پەڵێوە سیاوا بە ڕوخسارو جمهوری ئیسڵامی ئێرانی و دەسەڵاتداراو وەڵات و ئۆتریش-یوە . جە وەختێنە ٣٣ مین ساڵڕۆ تیۆرو دۆکتور قاسملۆی یاد مکەرمێوە کە وەڵاتە ئەرووپائیەکا پسۆ سۆئێدی و فینڵاندی و ئەنداماو هامپەیمانی ناتۆ-ی، جارێ تەر پەی قازانجی ئابووری ڕاشا پەی کۆمکوشتەو میللەتێ پەی دیکتاتورێ پسۆ ئەردۆغانی کەردەوە .
پسۆ پلاتفۆرمو هۆرام-ی جە ڕوێ پسۆ ئاڕۆینە سەرەراو شەرمەزار کەردەو تیرۆرو دۆکتور قاسملۆی و گردو ڕابەرە ئازادیوازەکاو کوردی جە لاو دەسەڵاتدارا رژیموو جمهوری ئیسڵامی و ڕێمەکۍٚ تەرۍٚ ئێرانی، سیاسەت و دەسەڵاتدارا هەرێمو کوردستانی و پێشوازیکەردەیشا جە بکوشەکاو دۆکتور قاسملۆی (جافر سەحرا نەوەردی) جە ساڵەو ٢٠١٤ینە چێرنامێ سیاسەتینە شەرمەزار مکەرمێ . هەر پاسە باوڕما ئانەن کە بەشبیەو حزبو دیمۆکراتو کوردستانو ئێرانی جە دیسامبرو ٢٠٠٦ینە سەروودوێ باڵارە بە نونگەو دەسەڵاتوازی ڕابەراو ئا حزبیە ، لادایا جە ڕاو شەهیدا کورد و کوردستانی و بە تایبەت شەهید قاسملۆی و ڕەفێقەکاش . باوەڕما ئانەن گەر ڕەفێق و هامسەنگەرەکاو دۆکتور قاسملۆی ڕاو ئا شەهیداشا پسۆ وێش دڕێژە دێبیۍٚ ، ئاژەو ئارۆ حزبو دیموکراتی و هەر پاسە کورداو وەرکەتو کوردستانی و یۆگێرتەی نەتەوەیی بە ئاڕۆی نەیاوۍٚ .
دماجار پسۆ پلاتفۆرمو هۆرام-ی، یادو دۆکتور قاسملۆی و گرد شەهیداو ڕاو ئازادی کورد و کوردستانی بەرز وینمێ و پەی سەروستەو ئامانجەکاشا تا یاوای بە کۆمەڵگایە ئازاد و دیموکراتیک، دڕێژە بە کۆشیای و خەبات و وێما مذێمێ . باوەڕما ئەنەن کە تەنیا بە یۆگێرتەی نەتەوەیی و خەباتی هامبەش متاومێ ئاوات و شەهیدەکاما سەر بوزمێ .
ڕاوەبەریی پلاتفۆرمو هۆرام-ی ١٢-٧-٢٠٢٢
