گەشمەرڎە هەرەکۊڵ هەزەخ ماچۊ "بەشدار بیەیم جە ڕیزەکا گەریلاینە پێسە زارۊڵێوە پاسەبۍ کە تازە چەمێش ڕووەو ژیۋایرە کەرڎێباوە، ژیۋای تازەم بە تامەزرۊیی و جۊش و خرۊشۊ دەسپنەکەرد، ئیتر تاوێنا بە ۋێم واچوو کە من بیەیم هەن چا ژیۋا شایستەنە".
ئەی وڵاتەکەم متاوی واچی جە یاڎ کەرڎەی ئاسانا؟ ملۋێنان شوڕشگێڵنۍ و جەنگاوەرۍ بۊنەو تۊو وەشەسیایی تۊنە گیانشا بەخت کەرد. تۊ واچە و قسۍ کەرە، ئایا ئێمە ساحیب و ئی خاکیە نیەنمۍ؟ ڕۊڵۍ ئی وڵاتەیە نیەنمۍ؟ چنی پۍ کەسا بێگانەی جیاش مازمۍ؟ ئەی وڵاتەکەم کۍ متاوۊ ۋەرەنگاروو وەشەسیایی تۊ بۊوە و وابەسەو جوانیت نەبۊ؟ سەڎان و هەزاران گەنجۍ تۊ چەکشا هۊرگێرت و لووۍ جەنگۊ. بە دڵێوە ئازا و ڕۊحێوە پۊڵاینۊ دژوو گرڎ هجومە ئەرەگیریەکا جەنگ و کۊشیای کەرا و هەتا هەتایی مەناوە. یۊ چا گەنجە ئازایا گەریلا هەرەکۊڵ هەزەخا.
ڕووە کەروو کەش و گاباری
گەشمەرڎە هەرەکۊڵ هەزەخ سەروو ۋێش پی جۊرە قسێش کەرڎە: "من جە بنەیانێوە وڵاتپارێزینە گەورە بیا، کوردسان، پارتی، ئاخێز، شۊڕشگێڵ ئی کەلیمۍ دوورۍ نەبێنۍ جە یانەو ئێمەنە". پێسە گەنجێوە کوردی گرڎوو خیاڵەکام ئانۍ بێنۍ کە بوو بە گەریلا و بلوو پۍ کەش و گاباری. جە شەوەکاشەنە جەنگەوانۍ بوو ورڎە ورڎە هەناسەو ئازاڎیی پۍ دڵیم کێشوو. چونکی گەریلا پۍ من وەشەسیابۍ. جە لێوەتەرۊ نیایرە جە ڕیزەکاو گەریلاینە شەرتێوەبۍ. ڕۊ دماو ڕۊی ستەم و ئەرەگیری و کۊکوشی سەروو گەلەکەیم ئەنجام دریۍ. بەمەڵامەتوو ئانەیۊ تاکە ڕا پۍ ڕاسگیریکەرڎەی چنەش، ڕاگیریکەرڎەی و بۍ کاریگەرکەرڎەی ئی هەنگامۍ بۍ. پی یاڎەوەری و ئیراڎۊ لووانی کەش و جە کۊشیای ئازاڎیینە یاگۍ ۋێمم کەرڎە".
جە کۊشیای ئازاڎینە گەورە بی
هەرەکۊڵ هەزەخ، نامۍ یانەیش یونس ئوراسا و جە ساڵەو ١٩٩٩ جە شاروو هەزەخینە، جە خێزانێوە نیشتمانپەروەرینە جە ئەڎۍ بیەن و گۊرە بیەن. کولتووروو کوردی، نیشتمانپەروەری فرە کاریگەریش بیەن سەروو خێزانی و ژیۋگەی و بنەیانەکەیش. ئینەیچ کاریگەریش سەروو کەسایەتی یونسی بۊ. یونس بە هەستێوە وڵاتپارێزییوە لکەدریا بە خاک و نیشتیمانیوە گەورە بۊ. جمیەری ئازاڎیی جە سەرڎەموو زارۊڵەیینە مشناسۊ و بە فەرهەنگ و ئەخلاقەکەکەشۊ هەنگامە منیۊ دلۍ ژیۋایۊ. پێسە گەنجێوە پاك و تەمیز، بە پاکی و ڕاسگۊیی مەنۊوە. جە ۋەران ۋەر بە گرڎوو هجوم و فشارەکا ئەرەگیرینە پۍ سەروو گەنجا کوردی، یونس تاواش جە ۋەران ۋەروو سیاسەتەکا ئاسمیلاسیۊنی دوژمنی و حۊڵەکاشەنە وەرگیری جە ۋێش کەرۊ و بۍ کاریگەرش کەرۊ.
چونکوم گەنجێوە ئەنەیاوابۍ و خاس دوژمنەکەش ئشناسابێ، تاواش ئامانجەکاو جینۊسایدی و سیستموو ئەرەگیری بیاوۊنە و بەوریاییوە مامەڵە کەرۊ. پێسە یونسی گەنج بەشێوە نییا چا ژیوایە، کە سەرشرە سەپییان. گرد ورچنیەێوەش ژیواینە ئانەبێ، که ڕوۍ بۊ بە گەریلا و یاگۍ وێش کۊشیای ئازاڎیینە گێرۊ. بەشدارییش لە ڕیزەکاو گەریلاینە پەیش بۊ بە عەشقێوە ئەبەدی. بەتایبەت ٩ تشرینوو یوەموو ٢٠١٤ کە سەفەربەری پەی کۊبانۍ ئەرەیاونیا، حەزوو یونسی پەی بەشداریکەرڎەی زیاتەر سەرە ورمدۊ. وەختوو ئانەی ئامابۍ کە بۊ بە گەریلا و وەرمەکاو زارۊڵەییش بارۊ دی. ساڵەو ٢٠١٥ چەنی هامڕێوەش یەکیدا پەیوەندییشا بە ڕیزەکاو گەریلایۊ کەرد. ئیساتۍ ژیوای تازەنە بە هەرەکۊڵ هەزەخ ئشناسیان. گەریلا هەرەکۊل کەشەکاو گابارینە ڕاپیمای پەی ئازاڎیی دەس پەنە کەرۊ. پێسە وانیارێوە ئازای، کە وێش پەی گرد بارودۊخێوە ئامادە کەرڎەن، بە دڵ و گیان ملۊ دلۍ کۊشیایۊ و بەشداریی خەباتی کەرۊ.
جەنگاوەرێوە وەشەسیا و دڵسۊز بێ
گەریلێوە ئازا بۍ و ئامانجێوە گەورەش بێ، هەبوو. هەوڵێوە فرۍ دۍ بۊ بە جەنگاوەرێوە هەقەتینوو گەلەکەیش جە گرد بوارێوە. بە پەرۊشی و حەزێوە فرەوە ژیوای دەس پەنە کەرۊ و ڕێزوو گردوو هامڕایاش بەدەس مارۊ. بۍ ئانەی حیچ قۊرتێوە بشناسۊ بۊ بە یاگۍ ڕێزوو گرددوو هامڕایاش و کۊشیۊ بە گەنجی دەس پەنە کەرۊ و گەنجیوە سەرگنۊ، گردوو بوارەکاو ژیوای پێسە مەیدانوو جەنگی موینۊ و سەرەمڕ وێش خاستەر کەرۊ.
بەتایبەت پڕۊسەو بەشداریینە فرە ڕازۍ و ئەزموونۍ گەریلاکا، کە قارەمانانە دژ بە ئەرەگیرا گژیۍ و گەشمەرڎۍ بیۍ مەیا دی. ئینەیچ پاسە کەرۊ زیاتەر حەزش جە ئشناسای ژیوای بۊ قووڵایی ڕۊحوو وێشۊ هەست بە سۊز و هەستوو وەشەسیای ئاپۊیی کەرۊ. پێسە گەریلێوە بەئەزموونی کۊشیۊ. چونکوم گرد سەرەتاێوە تازە پەیش ورچنیەیوە تازەن، پێسە وێش ماچۊ "بەشداربییەیم کۊشیای گەریلاینە پێسە زارۊڵێوە، کە تازە چەمۍ ڕووە و ژیوایرە کەرۊوە، بە پەرۊشی و ورووژنای و جۊشوخرۊشۊ ژیواێوە تازەم دەس پەنە کەرد. ئیساتۍ متاوو بە وێم بواچوو کە هەنا و شایەنوو ژیواینا، بە بەشداریم ڕیزەکاو گەریلاینە تاوام جوابوو ژیوای دەووە".
حیچ وەربەسێوە نەتاواش ڕاش ونە گێرۊ
گەریلا هەرەکۊڵ، فرەو ئەزموونی گەریلایی وێش گابارنە بەدەس ئارد. ماوەو چند ساڵێوەنە پێسە شاگرڎێوە توانای فرە چالاکییانە یاگۍ وێش گێرۊ و دەورێوە کارا گێڵنۊ. هەمان وەختەنە ڕەنجی گەورە مدۊ و ساڵەو ٢٠١٧ گەریلا هەرەکۊڵ لە چالاکیێوەنە بریندار بی. سەرەڕاو وەربەسەکان بە ئیرادێوە گەورەوە، مەیدانەکەی جیا نمازۊ.
ڕێبازوو کۊشیای بییەن بە ڕێبازوو ژیوای
گەریلا هەرەکۊڵ، دماو ئەرەئارڎەێوە تەمامی جە هەرێمەکاو سەرنیشتوو کوردستانینە، ساڵەو ٢٠١٨ ملۊ پانیشتوو کوردستانی پەی پەروەرڎەی و ئەرەئارڎەی. دمایی ملۊ ئەکادیمیاو حەقی قەراری، پێسە ئینسانێوە، ڕاسییەکاو ژیوای مزانۊ و لەیەکشا مدۊوە و کۊشیۊ. جگە چانەی پا سەروو ئانەیە گێرۊرە کە خەباتی کەرۊ بە شێوازێوە ژیوای. هەرپاسە ئینەیچ زەمینە پەی وەڵێکەوتەیش وەش کەرۊ و بەسەرکەوتەیی پەروەرڎەکا تەمامنۊ، ملۊ ژووروو قەراریوە. چایچ بە هەمان داوا بەشداری چالاکییە ڕێکوزیایییەکا کەرۊ. جە کەسایەتیی هامڕایاشنە زیاتەر جە حەقیقەتەکاو پەکەکەی و گەشمەردا میاوۊنە.
ئامانجەکاو گەریلا هەرەکۊڵی گەورۍ بێنۍ
هەرەکۊڵ دماو ماوێوە و دماتەر تا بتاوۊ دەورێوە کارا جە سەرڎەمی تازەو گەریلایینە گێڵنۊ و چالاکتەر بەشداریی کەرۊ، بە داواو وێش ملۊ ئەکادیمیاو گەشمەرڎە ماهیری. پا پەروەردا کە چاگە فێر بۊ متاوۊ گردوو فێڵەکاو دوژمنی جە گەریلاو سەرڎەمی تازەینە ماڕۊ. پێسە گەریلێوە ویرۍ چانەیە کەرۊوە، کە چەنی جوابوو هجوومەکاو دوژمنی بدۊوە جە سەرڎەمی تازەنە. بنەڕەتنە پێسە ئینسانێوە پا هۊشیارییوە مامەڵە کەرۊ، کە بە ئازایەتیی وێش متاوۊ گردوو هجوومەکاو دوژمنی ماڕۊ.
جارێوە تەر ڕووەش وەنەو سەرنیشتوو کوردستانی کەرد
هەرەکۊڵ هەمیشە هەرێمەکاو سەرنیشتوو کوردستانینە بێ، بە سەرنجەکاش هەرێمەکاو سەرنیشتی کەرۊ ئامانج و وێش پەی واگەی ئامادە کەرۊ. چونکە هەمیشە بوارێوە چانە ژیوایشەنە ستراتیژی و گرنگا جە کۊشیای ئازاڎیینە. ساڵەو ٢٠٢٣ ملۊ هەرێمەکاو سەرنیشتوو کوردستانی. بێگومان بییەی بە یۊ جە تیمەکاو سەرنیشتوو کوردستانی پەی هەرەکۊڵی مانێوە جیاوازەش هەنە. جارێوە تەر گێڵایۊین پەی سەروو زەمینە پیرۊزەکەیش و کۊشیای بەهاێوە گەورێش پەی وەش کەرۊ. جە گەشتە تازەکەشنە، تا بتاوۊ گۊشەگیری سەروو ڕابەر ئاپۊی ورگێرۊ، بە ئامانجی گەورە و وەرپەرسبییەی سروشتییوە گردوو هەرمانەکا گێرۊ گەرڎەن. تا ئاستوو کۊشیای بەرز کەرۊوە، زیاتەر کۊشیۊ، ماچۊ ئێمە مەمرمۍ و ژیوای بنیات منیەیمێ، پا ڕۊحەوە بەشداریی فرەو چالاکییا کەرۊ.
بە باوەڕێوە گەورەوە کۊشیای ئازاڎیی بەرۊ ڕاوە
هامڕا هەرەکۊڵ ٧ کانوونوو دووەموو ٢٠٢٣، وەختۍ وێش و یۊ جە هامڕایەکاش ئینۍ هەرمانەنە، چەنی دوژمنی تووشوو جەنگی با. ئەنجاموو ئینەیەنە هامڕا هەرەکۊڵ چەنی هامڕا ڕۊدی نالینی وێگەرەکنەبییەیانە گژیا و دماو مدرامانێوە گەورەی، هەردوویشا ئازایانە گەشمەرڎۍ با و ملا کارەوانوو نەمراوە.
هامڕا هەرەکۊڵ گەریلێوە بێ، هەمیشە پەشتی بە بەها تاریخییەکاو وێش بەسێ، سەرمەشقێوە گەنجوو گەلەکەیش بێ. بەبۍ هیچ دووەدڵیێوە بەرڎەوام بۍ کۊشیاینە پەی ئازاڎیی. بە یادەوەری و باوڕێوە گەورەوە دەسش بە کۊشیای کەرد و گەورە بی. ماوەو ٨ ساڵا کۊشیایشنە تاواش بۊ بە سەرمەشقێوە هەقەتینوو گەلەکەیش. پێسە گەریلێوە گەنجی بی بە هێماو جوانی پەی گردوو هامعەمرەکاش.
