جە وەختێوەنە کە هەرێمو هەورامانی و خەڵک و خاک و ژیوگەکەش ڕووبەڕووێ کەمئاۋی و وشەکەشاڵی بیێنێوە کە جە ئاکامشەنە هەزاران هکتارێ باغێ و دارستانێ هەرێمەکەی خەریکەنە بە تەمامەتی وشکێ بانێ و ئاۋەو واردەیۆ جە شارێ و دەگایەکانە تەمام دانش کەمی و خەڵکیش هەراسان کەردەن، کەچی دەوڵەت بە ڕۆی ڕۆشن ئاۋەو هەورامانی مەدزۆنە و مەبەرۆنەش پەی ناوچەکانو تەرو پارێزگاو کرماشانی.
جەئی چوارچوەنە ڕژێم چەندین پەنگاوێش جە هەورامانەنە دروستێ کەردێنێ کە گەورەتەرینێشان پەنگاوەکێ داریانی و هیروێنێ و بە ونەدای تونێلێ دەیان کیلۆمەتریێ ئاۋەو ئا پەنگاوا مەبەرۆنە پەی دەشتە گەرمەسێرەکانو (زەهاو، قەسر شیرین، نەفت شار و سومار)ی و بە ئاۋەو هەورامانی هەزاران هکتارێ جە دەشتە دێمەکان ئاۋیاری مەکەرانێ.

پەی پەلەکەردەی جە ئا پڕۆژە تاڵانکاریەیە، هیزی جومعە (هەینی) یاگەگیرو یوەمینو سەرۆککۆمارو ئێرانی سەردای شارستانو پاوەی و هەرێمو هەورامانی و کرماشانیش کەرد و بانگەشەش کەرد: گوایا پڕۆژەکە خزمەت بە هەرێمەکەی و ختڵکەۆەیش بکەرۆنە.

جە وەانوەرەنە، خەڵکو هەورامانی سەرەڕاو سەرکۆنەکەردەو سەردایەکەی، وازیارێنێ جە دەسەڵاتدارانو ئێرانی دەست جە تاڵانکاری ئاۋەو هەورامانی هۆربگێرانێ و ئاۋی و سامانەکێ تەرێ هەرێمەکەی نەدزانێ و بوزانێش خزمەتو خەڵک و خاک و ژیوگەو هەرێمەکەی. بە تایبەتی جە ئیسەنە کە هەرێمەکە ئاتاجی فرەش بە ئاۋێ هەن و وشکەساڵی زۆرش پەی خەڵکی ئاوردەن، ناهەقیێوی هەر فرە گەورەن ئاۋەکێش بدزیۆنە و بەتاڵان بڎریۆنە بە خەڵکانێ تەری، کە ئانەیچە بێجگە جە زیان یاونای پنەشان، هیچ سودێوش پەی هەورامانی و هەورامیەکان نییەن.