گولستان کلچ کۆچیگیتە یاگەگیرەو سەرۆک فراکسیونو دەم پارتی، سەبارەت بە وەڵێکۊتەیەکا ڕۆژەڤو پەرلەمانی، بەیاننامېوەش وەڵا کەرڎۆ و ئەرەیاۋناش که بە مەڵامەتو چارەسەرنەکەردەی کێشەکاوە تا مې جەنگەکې ۋەرکۊتوو مېیامینی قووڵتەرۍ باوە و خەڵکو گەڵا، بانۍ قوربانی و واتش: "پەنەوازا گرڎ کەسێ جە گفتوگۊکا ئاشتینە زیاتەر ۋەرپرسیاری جە ئەستۆ گێرانە".

گوڵستان کلچە ئاماژەش پا کۆمسیۆنەیە کەرد کە قەرارا جە پەرلەمانەنە پێک بۍ و واتش: "ڕەنگە ئېژا کورتولموش سەرۋنەو یاگەگیرا سەرۆک فراکسیونو پارتەکا بڎۆ. پەی کۆمسیۆنو ئاشتی کۆمەڵایەتی و دیموکراتیزەکەردەی خوڵقێوە پەی گلېرۊبیەی هەن. یاگۍ وەشحاڵیا کە گرڎو لایەنەکا خوڵقە کریێنۍ.

گوڵستان کلچ ئەرەیاۋناش ئێمە گەرەکمانە جە کۆمیسیۆنەکەنە جیا جە گوزارشتەکا، مژاری تازە جە ۋێش گێرۊنە چنی وەڵێکۊتەی و پێشنیارەکا. نمەبۆ ئینە تەنیا بە پارتە سیاسییەکاوە سنووردار بۆ، بەڵکم مەشۊم چنی مېیانە جیاوازەکا گلېرگەیچ گلېربۆوە. ئێمە باسو کۆمیسیۆنی تەکنیکی نمەکەرمۍ. پەنەوازا بۆ بە یاردیدەرو ئاشتیێوە هەمیشەیی. ئێمە دڵنیێنمې کە هەرمانەکې کۆمیسیۆنی بانۍ بە ئامرازێوە پەی ئانەی پەرلەمان چا بارۆ هەنگامە بنیۆ و دەورو ۋێش گێڵنۆ.

چی پڕۆسەنە، گەرەکما بۆ یان نا، چەمېما ئینۍ سەرو زینانەکا و داواکارییەکا حکومەتی. ئێمە چەمەڕاو فاڕیای بێنمۍ، بەڵام داخەم نمەشۆ تورکیا بیەن زینان. هەرپاسە شۊنەماو پاشێلکاری جددی مافەکا، چێرپا وستەی مافو زینانیا نەوەشی. ئیتر وەسێن ڕاگیریکەردەی جە ئازادیی زینانیا و پاشێلکاری ۋەرا ۋەر بە زینانییە نەوەشەکا و خراپ بەکارئاوردەی مافەکا. واتما پەنەوازا دەسەو ئیداری و چەمڎاری هۊرشێویۆوە، بەڵام حیچ هەنگامېوە چا بارۊ نەنریێنە.

 گوڵستان کلچ کۆچیگیتە ئەرەیاۋناش، نوعمان کورتولموش سەرۆکو پەرلەمانی، سەبای گرڎو سەرۆک فراکسیونو پارتەکاش پەی ئەرەمەرزنای کۆمیسیۆنو ئایندەی خوڵقەو پەرلەمانی کەردێنۍ. گوڵستان کلچە ئانەیچش ئەرەیاۋنا، کە سەبای شەوې نوێنەراو پارتەکا جە پەرلەمانەنە چنی کورتولموشی گلېرۍ باوە.