رۊدیارو ڕۊو یەکشەممەی ٢٦-٢-٢٠٢٣ی، جە شارو شێفڵد-و شانشینو بەریتانیا-ی، بە بۆنەو هەشتەمین ساڵڕۊو ئەرەمەڕزنایڕەی پلاتفۆرمو هۆرام-ی و هەرپاسە رۊو جیهانی زوانو ئەڎۍوە، مەراسیمێۋی گەورە رێکۋزیا.
جە مەراسیمەکەنە کە جەلاو رێکوزیاکاو سەر بە پلاتفۆرمو هۆرام-ی رێکۋزیابۍ جەماۋەرێۋی فرە جە هەورامیۍ و کوردستانیۍ ئەرەنیشتۍ ئا وڵاتەیە بەشدارۍ بیۍ. ئانە کە یاگۍ سەرنجۍ بۍ   بەشێۋی فرە جە بەشداربییەکا ژەنی و جەوانۍ بێنۍ.
مەراسیمەکە بە دەیەقێۋ بێدەنگی و رێزگێرتەی پەی گیانبەختکریاکاو ئاخێز و سەرهۆردای (ژەنی ژیوای ئازادی) جە وەراسانو کوردستانی و ئێرانی و هەرپاسە قوربانیەکاو بومەلەرەکاو کوردستانی و ناوچەکەی دەسش پەنەکەرد.
دماتەر، ئەندامۍ یانەو ژەناو هۆرامانی(یەژەرە) مۆمێشا پەی ئا ژەنا گیسێنە جە ئاخێز  سەرهۆردای (ژەنی ژیوای ئازادی) گیانشا بەختکەردەن.
شۆنیەرە رۊچنامەۋان جیهاد هۆرامی ڕاپۆرتێۋش سەبارەت بە ئاژەو زوانۋ هۆرامی و  زوانەکاو تەری جە جیهانەنە واناوە. 
جە درێژەو مەڕاسیمەکەیەنە زەردەشت هۆرامی، پێسەو نمایندەو پلاتفۆرمو هۆرام-ی واتێۋش پێشکەش کەرد و جە میانشەنە سەرەڕاو موبارەبایی جە ڕۊو جیهانی زۋانو ئەڎۍ، سەرو ئاژەو ئارۊو هەورامان، کوردستان و ئێرانی مدرا. هۆرامی پەیۋەست بە زۋانیچ ئەرەیاۋناش: بەهۆکارو بییەی سیستمە ملۆڕەکاوە جە ئێران و پانیشتو کوردستانیەنە، تەنیا ڕاچارە پەی پارێزناو زۋان، فەرهەنگ و بیەو وێما، رێکۋستەی وێمانە. چونکە هۆرامی بە بێڕێکوزیا مەحکوم بە فۆتیایەن. نمەبۆ وێما بەکەم ۋینمۍ، مشیۆم وەڵێ ئانەینە رەخنە جە کەسی بگێرمۍ، مشیۆم ڕەخنە جە وێما بگێرمۍ. نممەبۆ چەمەڕاو کەسی بێمۍ، ئاژەو ئارۊو زوانەکەیما ئانەی موازۆ کە خەمۍ و یگەرانییەکاما بە ڕێکوۋستەی و وێڕێکۋستەی چارە بکەرمۍ.
 
شۆنبەشۆنیەرە، مەریەم فەتحی-یە، راۋەبەرە جە کۆمەڵگاو ژەناو ئازادی وەراسانو کوردستانیرۆژهەڵاتی کوردستانی (کەژار)، باس کەرد؛ جە ڕۆڵ و جایگاو ژەنا جە پارێزناو زۋانی ئەڎایی و ۋاتش: جە هەر یاگێنە ژەنی ئازادێ نەبانۍ، ژیوای و ویری ئازاد و پارێزنای زۋانی و فەرهنگیچ نیەنۍ. پەوچی پەی پارێزناو زوانی و فەرهەنگو هۆرامانیچ، پەنەوازەن کە ژەنی هۆرامانی بەڕۆحوو ئاخێز و سەرهۆردای ژەنی ژیوای ئازادی-یەوە رۆڵو تاریخی وێشا بگیڵنانۍ.
جە دڕێژەو مەڕاسیمەکەیەنە، شاعیر حافز ئەحمەدی ئەژناسیا بە سەروەش و شاعیر ئەمیر عومران چنڎ پارچە شیعرێشا وانێوە. 
مەراسیمەکە بە پەزئیرایی، گۆرانیۍ و سیاچەمانۍ، هۆڕپڕای و وانایۆ شیعرا و هەرپاسە کۆکەردەی هامکاریی دارایی پەی ۋنەقۆمیاکاو بومەلەرزەکاو وەراسان، سەرنیشت و رۊچاۋاو کوردستانی و بەخشای هامکاریەکەی بە مانگەو سورەو کوردستانی، دماییش ئاوما.