ساڵەو ٢٠٠٩ی جە مەنتېقەو قلەبان و شرنەخ-ی سەرو دەرەو ھێزلی-ۊ ٢ بەنڎاۋۍ و سەرو دەرەو ڕۊبۊزکېچۊ ٥ بەنڎاۋۍ ۋەشکریۍ. بە ۋەشکەرڎەو ئا بەنڎاوا چنڎین جۊرۍ ڕووەکۍ و ئاژەڵۍ دلێنە بریۍ. ۋەشکەرڎەو بەنڎاوەکا کە کاولکاری و دلێنەبەرڎەو ژیۋگەیش ۋنە کۊتۊو، بێستا بېەن بە مایەو تەرسێچ سەرو ژیۋای مرۊڤەکا.

حەرپاسە دوۋۍ ساڵۍ چێۋەڵتەر باس چانەی کریابۍ کە بە مەڵامەتو ئانەی دیۋارۍ بەنڎاوەکەی بە چیمەنتۊی ھەرزانو کوالێتی خراپ ۋەشکریێنۍ، دیۋارو بەنڎاۋەکا نزیک بە دەگایەکاو" کرۊری و شوێتی و ڕۊبۊزکی"ۊ ئاویشا چنەملۊ. ئەرەنېشتۍ دەگایەکاو دۊرو بەرو بەنڎاۋەکەی نېگەرانێنۍ و بێستا ژیۋای ٤ ھەزار کەسا جە ئەرەنېشتاو مەنتېقەکەی ئېنۍ مەتەرسینە.

چا بەنڎاۋانە بەنڎاۋو کاڤشاکتەپەی پاڵ و دەگاو نێرۋەی جە مەنتېقەو قلەبانی ۋەشکریان. چا دیمەنا کە تۊمارۍ کریێنۍ بەرگنۊ کە دیۋارو بەنڎاوەکەی ترەکان و ئاویش چنە ملۊ. ئا ئاوۍ کە بەنڎاۋەکەنە مجیۊنە بیێنە بە مەڵامەتو نېگەرانی و تەرسېش ۋەشەکەرڎێنە.

"حسێن کاچماز" پەرلەمانتارو شڕنەخو پارتو دیموکراتېکو گەلا(ھەدەپە)ی ۋەڵتەر پێشنیارێش ئا ڕاسەو ۋەزارەتو دارستانی و کشتوکاڵی کەرڎەبۍ، چنەشەنە ئەرەیاۋنابێش،" سکاڵۍ جدیۍ ھەنۍ کە دیۋارو بەنڎاۋەکەی ترەکێش کۊتێنێنە، بەنڎاۋەکە ئاویش چنە ملۊ، ئەگەرش ھەن دەگاکۍ بانە چێرو ئاوێۋە، ئەرەنېشتۍ دەگایەکا ژیۋایشا پارێزیا نیا''و بە مەبەسو پەرسای پرسیارەش ئاراسەو ئا ۋەزارەتەیە کەرڎەبۍ.

سەربارو نیشانداو ئا دیمەنایچە، ۋەزارەتو کشتوکاڵی و دارستانی جە جوابەکەشنە پۍ پەرسایۊکاو کاچمازی ئەرەیاۋنابێش کە حېچ تەرسۍ جە ئارانە نیەنە.

ھ.ش