جە ئۆپراسیۆنێوەنە جە کەمپو هۆڵی چەتێوە داعشی باڵبەسکریا
مېیانو ئەرەیاۋنای قەسەدەی ئەرەیاۋناش تیمەکۍ ئۆپەراسیۆنی سەروازی (تۆڵ)ی جە ٣١و ئایارینە ئۆپەراسیۆنێوەشا جە کەمپو هۆڵینە ئەنجام دا و چەتێوە داعشیشا باڵبەس کەرڎ.
مېیانو ئەرەیاۋنای هێزەکاو سووریای دیموکراتیکی (قەسەدە) سەبارەت بە ئۆپەراسیۆنو تۆڵی کە جە ٣١و ئایارینە ئەنجامش دا، ئەرەیاۋنێوەش وەڵاکەرڎۆ.
جە ئەرەیاۋناکەینە کە جە ١و حوزەیرانینە وەڵاش کەردەنۆ ئاماژەش پانەی دان تیمەکۍ ئۆپراسیۆنی سەروازی (تۆڵ)ی ڕۊو شەممەی ٣١و ئایاری ئۆپەراسیۆنێوە ئەمنی کاریگەرشا جە کەمپو هۆڵینە ئەنجام دان و واتش: "ئۆپراسیۆنەکە بە ئامانجو باڵبەسکەردەی یۆ جە ئەنداما شانێوە تیرۆرستی داعشی بیەن. جە ئۆپەراسیۆنەکەنە بە هامکاری هێزو هامپەیمانی مېیاننەتەوەیی، تیرۆریستێوە بە نامۍ ساڵەح عەلی سڵێمان عەلی باڵبەسکریان."
جە بەردەوامی ئەرەیاۋناکەینە ئاماژەیچ پانەی کریان ئا تیرۆریستەی باڵبەس کریان بە ڕەگەز عێراقییا و بە دووۍ نامۍ مشناسیۆ؛ ئەبو خەیروڵا و ئەبو ئەواب، بەشداربیەن جە چڼین جەنگۍ ڕێکوزیا تیرۆریستییەکانە دژو سوپاو عێراقی و دماتەر بەنامۍ کۆچبەرییوە ۋێش یاونان سووریا.
جە دمادماینە قەسەدە جەختش جە بەردەدوامبیەی ئۆپەراسیۆنەکا کەردەنۆ پەی ڕیشەکێشکەردەی شانە تیرۆرستییەکا داعشی جە هەرێمەکەنە و بەردەوام بیەی جە پارېزنای ئاسایش و ئارامی هەرێمەکەی.
