جوانۍ گەلوو کورڎی پەی ئانەی بەشێوێوە ماناڎار پەشگیری جە ئەرەکۊشای تاریخی گەریلاکاو ئازاڎیی کورڎةسانی بکەرا  و پەی جوابدایۆ بانگەوازو تەڤگەری ئازاڎیی کورڎەسانی پەی جابەجێکەردەی ئەرکی نەتەوەیی ۋێشا، ڕووەشا کەردە دلۍ ڕیزەکاو ئازاڎیی.

جوانۍ کورڎی و کورڎەسانی پەی ماڕای هرووژمە ئەرەگیریەکا ۋەرا ۋەر بە گەلوو کورڎی خاوەن هەڵوێسێنۍ. دژمنا ئەرەگیری بە مادەی هۆشبەر و لەش ورەشی جەنگێوە تایبەت ۋەرا ۋەر بە جوانا و تایبەتتەر سەرو ژەنا ڕاوەبەر مکەرۆ. جوانۍ گەلوو کورڎی پەی پارێزنای ۋێشاو گلێرگەکەیشا دژوو ئی سیاسەتە قیزەونا دەوڵەتو تورکی بە ئایدیایۍ گۆرۆ ڕاو ئەرەکۆشای هۆرچنا. دەوڵەتو تورکی ئەرەگیری پەی ئانەی جوانا جە ویرو بەشداربیەیشا پەی دلۍ ڕیزەکاو ئەرەکۆشای بەراوە و دلۍ سیستەمو ئەرەگیرینە تاویاوە، هەزاران فرت و فێڵۍ بەرۆڕاوە، بەڵام جە ۋەرا ۋەرو ئی سیاسەتە قیزەون و چەپەڵەو فاشیزمو ئاکەپە-مەهەپەینە ئا جوانۍ گەرەکشانە خاک، وڵات، شناسنامە و هۆشمەنڎی ۋێشا پارێزنا و گورزێوە کەمەر ماڕا جە دژمنی بێ ئەخەلاقی بڎا، ڕاو کەشە ئازاڎەکا کورڎەسانی مگێرانە ۋەر.

بە زېڵۍ نەتەوەییوە جەمێوەتەرو جوانا کورڎی بە ئەرەیاۋنێوە بەشداربیەی ۋێشا پەی دلۍ ڕیزەکاو گەریلای ئەرەیاۋنا. چن ڕووۍ چێوەڵتەر جەمۍ جە جوانا کورڎی و ئەنتەرناسیۆنالیستی دمایشا بە پەرەوەردەو ۋێشا ئارڎ و قەرارو ۋێشا بە ۋەنایۆ ئەرەیاۋنێوە پەی ڕای گرڎیی ئەرەیاۋنا.

سەرەڕاو ئەرەیاۋنای بەشداربیەیشا پەی دلۍ ڕیزەکاو ئەرەکۊشای ئازاڎیی، جوانۍ جە ئەرەیاۋناکەیشانە سەرنجشا وست سەرو گۆشەگیری سەختو سەرو ڕابەرو گەلوو کورڎی عەبدوڵا ئۆجالانی و ئەرەکۊشایەکا جە ۋەرا ۋەرو قڕکارییەکا سەرو گەلوو کورڎینە.

ئەرەیاۋناکەی پی جۆرەنە:

"جەنگێوە قیزەون جە کورڎەسانەنە جە ۋەرا ۋەرو ژەنۍ و جوانانە ملۆڕاوە. بە گۆشەگیرکەردەی ڕابەر ئاپۆی گەرەکشا بۍ گلێرگەکەیما هامشێوەو ٤٠ ساڵا چێوەڵی گێڵناوە پەی دلۍ تاریکی و چا ڕێوە گلێرگەکەیما دلێنەبەرا. هەست پانەی مکەرمۍ ئارۆنە سەرو خاکو کورڎەسانی جە گرڎ ڕوێوە هرووژمە قڕکارییەکۍ ڕژێمو فاشیستی بیەیشا هەن. بەتایبەت جە ۋەرا ۋەرو ژەنا و جوانانە ئا جەنگە قیزەوونە ڕاوەبەر مکریۆ. پەی دلێنەبەردەی ئەرەکۊشای ڕزگاری گەلوو کورڎی سەرو؛ زۋان، کولتور، شناسنامەی و چی دماییەیچەنە بە قەڎەغەکەردەو زەماۋنە کوردییەکاما ئا جەنگەشا قەوەتتەر کەردەن. مزانمۍ ژیۋای بە بێ ئاو و نان ئیمکانش هەن، بەڵام بە بێ زۋان، کولتور و بێ شناسنامە ژیۋای نمەبۆ.

سەرو ئی بنەمایۍ پېسە کناچا و کوڕا گەلوو کورڎی و ۋەرکۆتوو مېیامینی جە ۋەرا ۋەرو خیانەتی، نۆکەری و ئەرەگیرینە، جوابدەرەوەو بانگەوازو پارتەکەیما پەکەکەی بیمۍ و بەشداربیەی ۋێما دلۍ ڕیزو گەریلاکاو ئازاڎیی کورڎەسانینە ئەرەیاۋنمۍ.

با گرڎ کەسێ بزانۆ جەنگ جەنگوو ئازاڎییا و هیچ وەختۍ شکس نمارۆ. بانگەوازییما پەی کوڕاو کناچا گەلوو کورڎی ئانەن؛ بەیدۍ جە ۋەرا ۋەرو هێڵۊو خیانەتکاری و هرووژمە ئەرەگیریەکا دەوڵەتو تورکی ئەرەگیرینە خاوەنداری جە شناسنامەی و بیەو گەلوو ۋێما بکەرمۍ و بەشدارۍ دلۍ ڕیزەکاو گەریلای بیمۍ.

قەول مڎەیمۍ هەتا دما قەترەو ۋنەو جەسەیما جە ۋەرا ۋەرو دژمنی ئەرەگیرینە جەنگ بکەرمۍ و پەی ئازاڎیی گەلەکەیما ئەرەکۆشای ڕاوەبەر مکەرمۍ.

بژیۋۆ سەرۆک ئاپۆ.

بە گیان، بە ۋنی ئینایمۍ چنیت ئەی سەرۆک.

بێ سەرۆکی ژیۋای نمەبۆ.

ژەنی ژیۋای ئازاڎیی.

بژیۋۆ پارتوو کرێکارا کورڎەسانی."

دماو ۋەنایۆو ئەرەیاۋناکەی، جوانەکۍ شعرێوەشا سەرو خیانەتو بنەیانەو بارزانی و پەدەکەی ۋەناوە. دماو ئانەی جوانەکۍ بە مۆراڵێوە بەرز و پەڕ جە وزە زەماۋنەشا گێڵنا.

جوانەکۍ کە قەرارو بەشداربیەیی دلۍ ڕیزەکاو گەریلایشا دابۍ، قەولو ۋێشا واوەی کەردۆ و دەسشا بە ۋییەرنای ئەرکەکاشا کەرڎ.