'جەنگ مەڵامەتو هەژاری و قەیرانەکان و ئاشتی چارەسەرا'

کرێکارێ و زەخمەتکێشێ کە بەشداری ١و ئایارو ئامەدی بیێ و واتشا: "جەنگ مەڵامەتو هەژاری و قەیرانەکا وڵاتین، ئەر ئاشتیی بێ ئاراور ئانە ئایندەو زاڕۆڵەکاما ڕەخسنۆنە."

ئێسالێ جەژنەو ١و ئایاری ڕۆو جەهانی کرێکارا و ڕەنجدەرا بە جۆشوخرۆشۆ بە ڕاپیمای و چالاکی جۆراوجۆر  جەهانەنە بەگرڏی جە کوردەسانەنە بەتایب پیرۆز کریا. مییانو گلێرۆبییەو ئێساڵو ١و ئایار جە ئامەدەنە مێڏانو وێستگەی بێ. بەهەزاران کەسێ بەشداری گلێرۆبییەکەی بیێ و سەرنجشا وست سەرو ئەوەکۆشای ئاشتی و ڕەنجدای و داواو مسۆگەرکەردەو هەلومەرجو ژیوای و هەرمان کەردەی زەخمەتکێشیشا کەرد.
جە مێڏانەکەنە زەخمەتکێشێ و کرێکارەکێ پەی ئاژانسیما قسێشا کەردە و لواپەی و داواکاری وێشا بەربڕی و جەختشا جە گرنگی پێکئاردەو ئاشتی کەردۆ.
'پەنەوازا پرۆسەکە بە هەموارکەردەو یاسێ هەمیشەیی کریۆنە'
یاسەمین نۆیان ئەندامو تممۆبی: ئینایمێ مێڏانەکەنە و دەنگما هورپڕمێ و داواما ژیوایێ دیموکراتیکا. داواما ئانێنە بوجەو وڵاتی پەی ئاشتی خەرج کریۆنە، چونکە مەڵامەتو قوڵی هەژاری و قەیرانەکا تەرخانکەردەو بوجەو وڵاتەین پەی جەنگی. پەنەوازا هاوارێکێما گرڏ پەی ئاشتی بانە و پرۆسەکە بە هەموارکەردەو یاسێ هەمیشەیی کریۆنە.

داواو ڕەنج و مافو وێما مکەرمێنە'
ئەندامو لقو ئەگتیم-سەنی ئامەد ئەحمەد فەسیح: پەی دەسوستەو مافەکاما ئینایمێ چێ. جە ئیسەنە گرڏ یاگێ گیرۆدەو قەیرانی و کاریگەریش سەرو گرڏیما نییانەرە. مەڵامەتو سەرەکی ئینەیچ بێگومان جەنگەکێ وڵاتینی. پەنەوازا زەڕو جەنگەکا پەی خزمەتو گەلی خەرج کریۆوە نەک پەی جەنگی. پۆکری پەنەوازا پێوەرە ئاشتی بنییەیمێ و پەنەوازای گرڏ و گەلان.
'چارەسەرو هەژاری تەنیا ئاشتی و ئازادییا'
ئەندامو کلتووری جەیلان دەمیر: حەر هەنگامێوە پەی ڕەخسناو داواکاما منییەیمێ ڕاش ونە گیریۆنە، بەڵام بەردەوامێ بیمێ جە ئەوەکۆشایما. چارەسەرو هەژاری و قەیرانەکا، تەنیا ئاشتیی و ئازادییا پەی ئەوەکۆشایما پەی ئاشتی بەردەوامێ بیمێ.
'١و ئایاری ڕۆو گرڏ و ڕەنجدەران و ڕۆو هیوا و  ئاشتییا'
ڕاوەبەرو لقو ئامەدی ئەگتیم-سەن، سەلمان ساگ: پێسەو گرڏ کاتێ گەل ئینا چێ و داواما بە دەسئاردەو مافەکامانە چونکە ١و ئایاری ڕۆو گرڏ و ڕەنجدەرا و کرێکاران.  پەنەوازا موخاتەبو هیواو گەلی وینمێنە و بە پاو ئاڏشا هەنگامە بنییەیمێ. جە مێڏانەکانە بیمێ و دژ بە هرووژم و جەنگەکا مدرمێوە.
'مشۆم ئاشتیێ هەمیشەیی بنیادبنریۆ'
ئەندامو تومبیل- سەن، ئایشە ئەردەمچی: ساڵانە قەیرانەکێ قوڵتەرێ باوە، ئینە حەقیقەتو ئی وڵاتەینە کە گیرۆدەو جەنگیا. ئینایمی چێ  پەی دمای ئاردەی بە جەنگو و قەیرانەکا، کرێکارێ ژیوایێ ئازاد و یەکسانشا گەرەکا.  هیوادارێنمێ ئاشتیێ هەمیشەیی بێ ئاروە، بێگومان حەر ئاشتیێ ئایندەو زاڕۆڵەکاما ڕەخسنۆنە.