تا وا حەننا ویرما بڕ کەرۆ و ئاوەزما یاوەریما مدٚۆ، تا بیەن پێسە بیەنە و ئێمەمانا پەی یاوای بە تیکێو نانەوشکێ کۆ و کەمەروو وەڵاتیما پرووناینێ و تۆشەبەرەو خەفەتی و مێراقی ترینجیاینەنە ملما!!. سەروو ڕێسکێوێنە کە ئەنقەسی وەششا کەردٚێنمێ پەی هۆرماخلنا، بەڵام ژووژڵ و زیتەڵ ئەجۆ پژمەو پاڵنگ یەنمێ سەروو ئا هێڵە وەش کریایەنە ئامەشۆ کەرمێ و گیرواردٚەیی نانەوشکێوێ بڕیایەنە گۆشما شل نیا و تەقەو تفەنگوو دەساندەسایچ مەچڵاکنۆمارە شاهێدٚیچما کەشە سەربەرزەکێ زاگرۆسی ئەرەمدرایەنێ کە چەنی مەرارەتی نەتاوان بەزنۆما و چێروو پەلامانە زەرێڵ بیەن!!.
ئێگە مەپیویۆوە هیچ یاگێوێ و ئاخروو دنیایا،ئێگە کەی پێسە یاگەکاتەری پیویۆ؟! ئاخر چێگەنە زەمین قەناسا و نەقشەو جەهانیەنە نامێش کۆرە بیێنەوە!!. بە کلکەرە کێشایچ مەیۆزیۆوە پەی ویژدانە بەنامێ زیتەکا!! با وێشا نەمارنا ئەرامەننێ،هەرمانێشا فرێنێ ئاخر دایمە ئینای شۆنۆ ئانەیوە ددٚانوو فیلیوی ساراوو ئافریقاینە پەڕ کەراوە و نازا زەمین شەخەڵ گێرۆشەرە ئەننا پیس بۆ و پەی ژیوەنی بەشەرەکا وەرێژا!!.
ئێگە گەورەتەرین تاوانش کۆڵبەریا و قۆمار کەردٚەی سەروو نانێوێن کە گردٚ وێرەگانێو ئێننە بەی بۆ پەی ژەمەنێوێ و ساعبێو دیسان وەگلەڕاوەکێنە پەی ژەمەنێوێ تەرێ!.
کەی بەشیر پەردٚەچیانش ویروو سیرانوو سەوزەوەهاروو هەورامانی کەرۆوە؟!، کەی ئامان ویرشەورە پەی دڵیش بژیڤۆ و پەی بەگا ئامای ئاواتە چووزەنەپڕاکاش هەرمانە بەرۆ؟!
ئاخر بەشیر و بەشیرەکێ وەڵێ ئانەینە جە ئەدٚای با چارەشانە نویسیان بلا پی لا و پەو لارە بوانا و بەیاوە و وەرێسەو خەمی پێچنانە کۆڵێشا!!.
بە کام تاوان مشیۆم ئەدٚالە مەینەت کێشەکێ تازیەبارێ ڕۆڵە نازارەکاشا با؟!
بە کام تاوان مشیۆم کۆڕە خەپۆڵێو یام کناچڵێوە چەم نەخشینە جیای تەمەدٚاری ئەوەئامای تاتەی کۆڵبەریش تەرمی وناڵینیش بە چەم وینا؟ٚ!
تا کەی سیاوپۆشی مشیۆم بۆ خەڵاتوو ژەنە گیرواردٚەکا؟!
تا کەی هیچ کەس وێش وەراوەر پی تاوانە گەورا نەچڵاکنۆرە؟!
تا کەی گردٚکەس چەمێش قووجنۆ و ڤزەش چنە نەی؟!

٭جە دیوارو (فەیسبوک)و نویسەری هۆرگێریان